لا اله الا الله محمد رسول الله

ورب المصحف الواحد عندنا يايصير خبل وغبي والا مهبول عشان يعيش

القصه اللي صارت معاي صارت قبل صلاة العصر المهم

اليوم مثلي مثل 95%من ابناء هذا الشعب يوم عيد لان الرواتب(المعاش وسمي معاش لانه يعيشك الى اخر الشهر بحب الخشووم )ينزل اليوم

المهم طلعت من الدوام وانا مبسوط اليوم رواتب الواحد يقدر يتنفس شوي والنفسيه تمام المهم

مريت صرافه من بقالات الراجحي (طبعا مو بنك لان خدماته خدمات بقاله وازفت بعد)

ومريت الصرافه المهم بكل ثقة وحيويه حطيت بطاقة الصراف واضغط فيها لغه اعربي حط اعربي رقم سري وحط رقم سري الين طلع سحب نقدي

واحط مبلغ5000 ريال المهم المكينة سوت حركات ... تعرفون الطقطقه اللي تطلع منها قبل لاتطلع

الفلووس استانست انا ..ومديت ايدي ناوي اخذها بااصبعين (طبعا عرفتو حركة الاصبعين يعني مثل

قولة منتك بالتراب هات الفلوس)المهم القهر طلعت الفلووس بس مو كلها طرف صغير منها وسكرت

على الباقي احاول اسحب (وهات ياسحب وهات ياسحب)احاول افتح اللي تطلع منها الفلووس مارضت

المهم ثواني وتطلع صووت وحركات وطقطقه داخل(فرق بين الطقطقه الاولى والثانية) ..وترجع الفلووس اااااااااه يالقهر بغيت اطب براسي

داخل المكينه من القهر المهم ادخل البطاقة مره ثانيه واشيك واسوي استعلام عن رصيد

طلع المبلغ مسحوووووب قلت مبدهاش خل اصلي العصر واراجع البنك صليت وانا اهوجس

الله لايبلانا وطرت سريع للبنك واقابل شاب سعودي ينقش ضروسه بااصبعه يحاول يطلع باقي الرطب اللي ماكله لانه فالها قهوه ورطب ..تحس وانت تتكلم معها انك مراجع مصلحة

المياة والا البلديه يكلمك بشين نفس قلت يااخي هذي السالفه ومافيها قال ايه اصبر 24 ساعه

اذا مارجع المبلغ تعال وقدم طلب.......قلت طيب كم يقعد الطلب.....قال والله من خمسة الى

عشرة اياام قلت يااااحلاووووه طيب يعني هذا هو الحل قال مافيه الا كذا قلت ياشيخ مو ذنبي

شارين المكينه مستعمله من الصين هذي خدمات بنك بالله بعام 2007 وداخلين بالثمانيه

قال والله مافي الا هالحل قلت حسبي الله ونعم الوكيل فيكم.

انا بيني وبينكم اتوقع صاحب السمو الراجحي اكيد محتاج له كم فلس تعرفون اليوم الاربعاء

ويمكن بيجتمعون ارحامهم وعياله عنده بالبيت وتعرفون الرز غالي والمواد الغذائيه كلها

قلت اكيد احتاج ويمون على الشعب اكيد...... وقال اخذ منهم لانهم شعب طيب وارهب احد

وشعب قوووي مهما يصير فيه عادي عايش ومدرعم براسه.....

المهم يعني انواع الاحتقار وضياع الحقوق وعدم الاهتمام بك حتى لو كنت صاحب حق عاجبك والا اقرب جدار

قلت لنفس اخر شي.... فعلا لانامت اعين الجبناء!!!!

على الباقي احاول اسحب (وهات ياسحب وهات ياسحب)احاول افتح اللي تطلع منها الفلووس مارضت
يمكن محلق ولا شكلك متغير .. ولا ليش الفلوس تطالع فيك وتنحاش اكيد ماعرفتك ؟!!!!!!!!
هذا ونا خوك عادي السعوديه ...غييييير