سوبرماركت الضاحية بحي الفيصيلية مرتع الصراصير
 

يا اخوان البارح كنت رايح من الدوام للبيت ومريت سوبرماركت الضاحية الي في حي الفيصلية بالدمام على شارع الضغط العالي في تمام الساعة 4:45 مساءً.

المهم اخذت بعض الاغراض ومريت قسم الخضار والفواكة ... وشفت لي عنب وبغيت اخذه وانادي العامل اسأله عن سعرة وهو كان لاهي مع زبون ثاني وانادية وهو مطنش يوم التفت لي رفعت صندوق العنب بسألة عن السعر وقال لي السعر... يوم جيت ارجع الصندوق مكانة فوق الطاولة الخشبية تفاجأت بعدد والله لا يقل عن 5 صراصير كانت تحت الصندوق.. بصراحة انصدمت وكان فيه واحد مطوع شاف المنظر قام ونزل الأغراض الي في عربيتة كلها ... قمت انا والمطوع نادينا العامل وسألناه وش هذا ... قال وبكل برود (خلاص انا يجيب بف باف ويشيل) قام المطوع الله يجزاه خير يشيل كل الكراتين الي فوق الطاولة علشان يتأكد والمفاجئة ان لقينا الصراصير في كل مكان ... رحنا للمدير حقهم (يماني) نتفاهم معاه وننصحة وتفاجأنا ببرود ما عمري شفته وبكل وقاحة يسألنا ويقول (وش تبغوني اسوي خلاص العامل بيشيلها وبينظف مكانها) هنا عاد المطوع استجن وقام يصيح في العالم الي على الكاونترات تحاسب ويجبرهم يرجعون كل اغراضهم الي شروها ويشرح لهم الموضوع (مع ملاحظة ان الكاونترات مليانة بالناس لان وقت صلاة المغرب باقي عليه 5 دقائق والناس تبغى تحاسب قبل الصلاة) ... الناس رمت اغراضها والي حاسب صار يطلب فلوسة ويطالبهم يرجعون الاغراض ... هنا اليماني خرج من البرود الي كان فيه (يوم شاف الدراهم ترجع لأصحابها والاغراض ترجع لأماكنها) وصار يترضى في هالناس ويهديهم ويحاول يستضرف.


والله يا اخوان ويحاسبني ربي على كلامي في الدنيا قبل الاخرة انها صراصير بأعداد تخوف في قسم الخضار.


طبعاً ان من اول بعيني شفت فئران بأحجام كبيرة جداً Xxl في سنابل الشرقية وفي سنابل الجنوب بس كانت منخشة في قسم الاجبان في سنابل الشرقية وقسم الرز في سنابل الجنوب اما ان الصراصير تطلع فوق الطاولة وبأعداد كبيرة كذا فهذا يدل على ان الاستهتار لا حد له.


الي قهرني اكثر زوجتي يوم رجعت البيت تسألني كالعادة (وين الاغراض) قلت لها السالفة.

قامت تقول انت لا تقعد تسوي مشاكل مع العالم وتنتقد كل شي وكل ما دخلنا محل سويت لنا فضيحة وفشلتنا بصياحك على العالم والناس ساكتين وما غير انت الي تدقق في كل شي وانت بيجي يوم وبيتولونك هالعمال وانت وانت وانت بصراحة تهاوشت معاها ولين الحين ما اكلمها وما برجع البيت الا بعد اسبوع (فرصة) :)

تدرون ليش لانها حسستني اني موسوس او فيني مرض نفسي واحب اتهاوش مع العالم وحاولت تهبط عزيمتي وتنتقدني.

والله كل المشاكل الي اسويها مع هالحرامية لي حق فيها.


ما اقدر اشوف صراصير في محل ياكلون منه العالم واسكت ولا اقدر اشوف احد يبيع شي منتهي صلاحيتيه واسكت ولا اقدر اشوف عامل المطعم يحط يدة في خشمة ويرهو يرتب المخلل ولا اقدر اشوف الحلاق يحلق لطفل بموس قذر واسكت ولا اقدر اشوف احد يكذب واسكت او اشوف اي غلط او سرقة او نصب واسكت ... احب اقول للغلطان انه غلطان في وجهه وعند الحق والله ما اسكت وهذا عهد علي.

يا جماعة هل انا فعلاً مبالغ في تصرفاتي والا لا ؟؟؟؟!!!!

هذا المفروض والواجب بس عاد احد يرد من هالي تتصل فيهم ؟؟؟

إلا و إنت صادق الضغط المرتفع صار في رؤوسنا من الشوارع في جده. :D

بس بصراحة .. إما زوجتك (الله يخليها لك) موسوسة زيادة عن اللزوم أو غاوية مشاكل و إنت بتتفادى شرها بإنك تعطيها أرقام هذول الناس تفش غلها فيهم. ;)


خير ماسويت أخي صرخة مواطن .. مثل هؤلاء يستاهوا كل إللي يجيهم.

هذا الي يقهرك لما تقوله ان محلك فيه صراصير او جرذان يضحك او يعاملك ببرود ولا كأن فيه شي !!!!


بكرة لا احد يستغرب اذا دخل بقالة ولقى أسد او كلب اجلكم الله والا يمكن افعى متدليه معى السقف والا سحليه تقطع السلطة.

لا ورافع الاسعار شوف الرابط للموضوع..قريبي يقول ان هذا اليماني ماهو جايب خبر لأحد وقدم شكوى..
https://mqataa.co/vb/showthread.php?t...D6%C7%CD%ED%E5

نبي الديرة تنظف منكم
بالعكس ماأديت كل اللي عليك
اتصلت على البلدية شكيتهم ؟؟؟؟؟؟؟؟؟أسمح لي ياصرخة مواطن
الرجال الملتزم يوم شال وفضحهم عند المحاسب أدى اللي عليه أكثر منك

اي بلدية الله يرحم والديك

اقولك مدوام من الساعة 6 الصباح وراجع البيت المغرب تقولي لي رح البلدية وين انا ما اشوف الدرب من التعب.

وهذا الي يقهرني دوامي ما يسمح لي والا والله ما اخلي بلدية ولا امارة ولا حقوق انسان ولا وزارة تجارة الا اجيها بس خليها على الله يا والدة.

وبعدين احنا عارفين النتيجة مسبقاً ما احد بيجيك وان احد جاء ما بيجي الا بعد ما يكون العمال شالوا اثار الجريمة وحسبنا الله ونعم الوكيل.

الا اذا بغيتم يالرجال شفتوا الدرب هذا انت هشت حرمتك الضعيفة :mad:
كان الأولى ان تكمل اجرك وتتصل عليهم :cool: