تجربتي مع المكيفات 2008 - 2010 , احذروا مكيفات المطلق !!
اولاً احذروا كل مكيفات المطلق بدون استثناء , مو عشان مكيفاته تعبانه , ولا عشات موظفينه , عشان العماله الرخيصه السيئه الي تكسر وتخرب المكيفات عنده !! واليوم وانا اكتب الموضوع في 2010 , راجعت سوق المكيفات ولا لقيت اختلاف كبير , والمكيفات من يومي اشتريها 2008 وهي الى الآن اغلبها صيني او تجميع سعودي وبحريني , عشان كذا قلت افيد واكتب تجربتي ... عندي عادة من يومني ورع في المدرسه وانا ماشي عليها : لاتحط كل البيض في سله وحده ! ولا كل اقلامك في محفظة اقلام وحده ! , ولا كل بطايقك في مكان واحد ! وما عمري استفدت من هذي القاعده إلا مرتين !! , مره وانا في الملاهي العب مع زوجتي وعيالي واركب لك قطار الموت وخذ ياصراخ واستهبال رجعني لزمان اول , والنتيجه طارت المحفظه بكل مافيها ولا شفتها بعد كذا ابد ولا حسيت فيها اصلاً لما اختفت !! والحمد لله ماكان فيها إلا رخصة القياده وشوية فلوس , ودبرتها وطلعت غيرها ... اما بعضهم كل ابو البطايق في محفظه وحده , تضيع , ينتهي مستقبله ! المره الثانيه لما جيت أءثث بيتي الملك , اشتريت سبع مكيفات , كل مكيف من شركه غير شكل , حتى الفرن والثلاجه والغساله , ماتركت شركه ماشريت مكيف من عندهم , مع العلم اني كنت اشتري الأفضل , ما اشتري من المكيفات الخياس الي ماتدري وش اصلها , بس ينقال لها صينيه , كنت اشتري ابو سمعه والناس مجربته ... اشتريت من عند المطلق ثلاث مكيفات انواع مختلفه , والله انها احسن مكيفات في السوق , بس عمالته البنقاليه التنك انهم يكسرون المكيفات قدامي وانا اصيح مو قادر اقول لهم شي . اول مكيف اشتريته : اشتريت ميديا شباك 18 كمبروسور روتاري صغير في غرفة هامشيه عندي في البيت من المطلق من زود غباء العمال نسيو قطعة فلين مع قراطيس في المروحه وركبوا المكيف , والحين جاك واحد منهم نافخ صدره ينقال له المدير البنقالي الكبير والدكتور حقهم , ويوم استفسرت وش قصته وليش يجي لوحده , قالوا لي انه : الكهربائي الي يشبك فيش المكيف !! , اثر البقيه ادمر من الدمار في كل شي ولا يعرفون حتى تشبيكة الكهرب الي لو انادي جدتي سوتها ! المهم انه وصل المكيف بالكهرب وشغل المكيف , عيا المكيف يشتغل , حاول بدل اللمبه تولع وتحس فيه صوت مروحه ودها تتحرك بس محشوره , برضوا عيا , في الأخير طلعوا المكيف وانا اشوفها وادري ان العالم ماحولك احد , دخلت يدي وطلعت الفلين والقرطاس وهم يقولون لي , مو هذا , اكيد في سبب ثاني !! المهم انهم ماسوو شي ورجعوا المكيف واشتغل وقالوا ايه , صحيح يمكن القرطاس والفلين كانت موقفه المروحه ! المكيف يبرد موت , بس ببطئ شديد , واذا عليته على اعلى شي , جربت انام في الغرفه لوحدي وانا اثث الشقه , تتجمد الغرفه في الليل و اقوم مريض الصبح , عشان كذا اخليه واطي بس انتظر الله يعين لين يبرد ... صحيح نسيت اقول لكم ان العماله البنقاليه سرقوا علي سكروب صغير انا عاطيهم اياه , ولما رجعت للمطلق , استحيت وش اقول له , قلت للعامل هناك شف يمكن اخذتوه بالغلط , قال : بابا انا ماياخذ شي ! اذا كان الشعره الاقيها في بيتي ماتضيع , وانا متذكر مليون انه الدلخ ماكان عنده سكروب واني ماده له بيدي ولا رجعه , وبعد سرقوا علي اطار المكيف وتركوا جوانبه مفتوحه كذا سفري , رجعت جبت نجار يقفل لي الفتحات بـ 10 ريال , ووالله ان مشواره والقلق عندي بـ 100 ريال عشان يقفل الفتحات مضبوط لأني جربت اقفلها من قبل بشقتي قبل وحست الدنيا ولا تقفلت مضبوط ... ثاني مكيف اشتريته : كان متسوبيشي , اخذته من محل مكيفات مجهول في الحراج , بس كان جديد وعطوني فيه سعر عشان كذا اخذته , ووالله انه اسد وجبار , وافضل المكيفات على الإطلاق الى الآن عندي , مافي مثل متسوبيشي التايلندي , مكيف جباااااااااااار , خلك من كل المكيفات , مافي مثل متسوبيشي ... مكيف جبار , متسوبيشي شباك 24 الف وحده كمبروسور برستول كبير , في حجم الغرفه ( دبل ) عن الغرفه الي ركبت فيها ميديا 18 , ويبرد اسرع مليون مره منه , مافي مثله نهائياً , حتى احسن من كل المكيفات الي ممكن تركبها , ما اشتكيت منه ابد ولا حتى حسيت بأي احساس نفسي سلبي . ثالث مكيف اشتريته : كان يورك شباك 18 كمبروسور كبير , صحيح ان صوته اعلى من ميديا ومتسوبيشي , بس ممتاز وتبريده سريع مثل متسوبيشي , وراكد مافيه مشاكل , مع العلم ان كل المكيفات لها الحين عندي سنتين ... واشتريته برضوا جديد من الحراج ولا اشتكيت منه , ممتاز مع انه شغال مع باقي المكيفات تقريباً 24 ساعه , ماعدا كم ساعه يرتاحها لما نكون برا البيت ... كلها ممتازه ولااشتكيت منها ابد الى الآن سنتين كامله , شغاله فل تايم ولو بتخرب او فيها بلا المفروض انها تخرب على كرفها الحاصل . نجي للمكيف الرابع : وهو عله بصحيح لأن صوته عالي هو كارير شباك 18 كمبروسور كبير , صوته فعلاً عالي , ودفعه للهوا بطيء , بس يبرد ويحتاج وقت وشغلته اسبوع كامل 24 ساعه ولا اشتكى ولا قال شي , والى الحين شغال وممتاز ولا قل تبريده , بس تبقى مشكله الصوت العالي وضعف دفع الهواء مقارنة بمتسوبيشي الأسد .... طبعاً المكيفات الي راحت كان يجي معها اطارها , يركبونها العمال وبترتيب وتنظيف وشغل مرتب , ماعدا مكيف المطلق هو وعمالته البنقاليه الحراميه ! المكيف الخامس الي اشتريته : رجعت للمطلق , واشتريت من عندهم مكيف او جنرال شباك 24 كمبروسور كبير , ياباني تجميع تايلندي , ونفس العماله الحراميه دخلت البيت , واسمع الحرامي الكبير حقهم يقول : بابا بيت انتا كبير , كم غرفه ؟ قلت له : الحمد لله على كل حال وصرفته ... المهم انهم ودهم يطلعون المكيف من اطاره عشان يرفعونه ويركبونه في الجدار , والله انهم متسدحين على الأرض يمسكونه من كل جهه عشان يطلعونه لين سمعت صوت كسر , من دلاختهم يحاولون يسحبونه من المواصير الجانبيه للمكيف , الله يقلعكم من عماله دمار ويقلع المطلق الي بيكسر لي مكيفاتي قبل ما تركب ... سمعت الكسره , واناظر اشوف , احاول اشوف شي , ما حسيت بشي متغير , بس نفسي قلقانه حيل ... المهم حتى العامل اخترع , وجلسوا يحوسون , حتى موب عارفين يركبون الصندوق في الجدار , وطقطقوا تكسير وتخريب في الجدار حتى عرفوا يركبون الصندوق , ثم رفعوا المكيف وحطوه بالفتحه , وهرب العامل الي كسر لي المكيف , وبقي الثاني الدلخ يتصل على الدكتور عشان يركب سلك الكهرب ! وشغل المكيف واشتغل ... وبرضوا سرقوا لإطار وركبوه سفري وانا افكر بالكسر , ويوم اتصل على المدير الدلخ الكبير حقهم , يقول لي : مستحيل , اكيد ماركبوا لك الإطار لأنهم نسيوا , احنا نطلب منهم انهم يركبون اطارات ! المفروض انه يقول : بنرسلهم لك يركبونه , مو يتعذر لهم ويقول لي : هي كلها خمسه ريال , ياراحل انا جي اركبها بنفسي الحين لك , ينقال له بيحرجني .. وفعلاً احرجني ! , ورجعت جبت نجار تعرفت عليه سوى لي الإطارات ... جربت المكيف يومين , واشوفه مو طبيعي , المكيف يبرد شوي ويفصل الكومبرسور حقه , ويشتغل شوي ويفصل مره ثانيه مع العلم ان كل مكيفاتي على الشارع وماعندي مكيف على المنور نهائياً ... المهم واتصل على الدلوخ في المطلق واهزئ فيهم على عمالتهم المتخلفه , مع ان مكاتبهم شيك وحلوه مره , بس يرسلون لك في العماله الرخيصه ابو 400 ريال راتب يخربون ويكسرون !! اتصلوا على الوكيل وجا الوكيل وحاول يلعب علي ويقول ان المكيف يبرد وقلت له ان مكيف ميديا الصيني 18 يبرد احسن من او جنرال 24 !! وشال المكيف اسبوعين , خلال الأسبوعين هذا , من زود الدلاخه اشتريت المكيف السادس !! المكيف السادس : كان ودي سانيو سبيلت 24, واحسن سعر لقيته عند مكيفات المطلق !! وقلت لهم بشتري المكيف من عندكم , بس اخصموا التركيب لأن عمالتكم رخيصه وسيئه وفاشله , مجمعين لي شلة بنقاليه , والله ان شعر راسه ملزق بالصمغ والوصخ والبويه من زود ماهي عماله فقيره وراتبها ضعيف ... قال لي اذا ركبته برا , مانضمنه لك , واذا عمالتنا خربوا , تقدر تحاسبنا واحنا نصلحه ونبدله لك , بس برا , يمكن العمال الي تجيبهم يخربونه عليك وتبلشنا !! ووالله ان عمالة الحراج نظيفين ومرتبين وفاهمين الشغل زين ويربكون المكيفات بسهوله وسلاسه مثل ما يلبسون ثيابهم , وان بنقالية المطلق تقول يخترعون نووي ... قلت له : والله لو كسروا علي المكيف اني اشتكي عند الغرفه التجاريه ! قال مستحيل , الحين بنرسل لك احسن عامل عندنا , له عشرين سنه ! مع انه كذاب لأن شكل العامل صغير . المهم جابوا المكيف سانيوا سبيلت , وطبعاً الدلاخه بطبعهم , جابوا المكيف ونسيوا كرسي المكيف , واتعطلت ساعتين لين راح ورشتهم وجاب الكرسي وانا منتظرهم بالشقه مع كراتين المكيف ... وجلس يحوس المكيف , وساعه يجيب الماصوره من هنا وساعه يجيبها من هنا , وشال انبوبة تصريف المويه من جهه وحطها من هنا ... وكل ما انبهه على شي , يقول لي : انا عشرين سنه خبره وفاهم ! طبعاً الصلاة مايصلون , صليت المغرب والعشا جنبهم ولا سائلين ولا يقولون نصلي جماعه ... واحد منهم اسمه منير والثاني ابو الحسن ! واذكرهم الى الآن لأني توقعتهم هندوس او مسيحين , طلعو مسلمين واسمائهم جميله كمان :) واشغل المكيف معهم بعد اربع ساعات تركيب !! ويشتغل المكيف ساعه وهم واقفين معي , بس هالمره يرفض يطفي !! حاولت اطفيه , جو كل العمال حاولو يطفونه بالريموت لين حسيت انهم بيخربونه , قلت لهم خلاص انا بتعلم اطفيه , وافصل الكهرب اطفيه الحين مؤقت واشوف وش قصته بعدين !! وضبطت وضعه , وعرفت كيف اعايره في الريموت عشان يطفي ويشتغل . وبعد يومين اشغله مره ثانيه , وساعه إلا بدأ ينزل مويه وكميات كبيره ! تقل حمام ! واتصل على المطلق واهزئ فيه هو وعماله الفاشلين , اقل له انا داري ان فيه مكيفات تنقط مويه , بس تنزل المويه تقل حنفيه بالغرفه تعدم لي الأرض !! ويرسل ( الدكتور ) حقه البنقالي , بيكسر المكيف من رفعته ونزلته بيده , وانا اقول له , شوي شوي عليه , المهم , طلع مركب موية تصريف المويه غلط , ونسي يسد الفتحه الإضافيه , يعني كانت تصب من قلب في الغرفه , كل المويه بدل ما تنقط برا , تنزل كلها داخل ! وجلس برضوا ساعه يضبطها !! الله يقلع المطلق ويقلع عمالته البنقاليه الفاشله ! والله اني شاري من عنده احسن مكيفات في السوق سمعه , خربها وكسر ابوها كلها !! المهم رجع لي او جنرال من صيانته بس مثل مشكلته الأولى , دريت انه مستحيل يصلح وان وكيله الحرامي مستحيل يبدله ولا براسي اشغل نفسي مشاكل , واني مستحيل اعتمد عليه في التبريد , بس يمشي الحال , واصبر عليه كم شهر وابيعه بـ 800 ريال بالحراج , واشتري متسوبيشي شباك 18 الف وحده مكانه وافتك ... والمكيف السابع : كان صيني رخيص بس العالم يمدحون فيه , هاس شباك 18 كمبروسور صغير ركبته للمطبخ , وممتاز يبرد احسن من او جنرال 24 الي كسروه المطلق !! وله سنتين الحين شغال تمام ويثلج المطلخ ماتحس فيه , بس مشكلته الوحيده الحين صرت اسمع له صوت خرخشه خفيف ... الله يقلع المطلق هو وعمالته الرخيصه السيئه الي يلقطها من الشوارع حتى توصيل كهرب مكيف مايعرفون , اصلاً ماقدر المطلق وامثاله يكبر وينتشر لوما انه يلقط له العماله من الشوارع عشان يركب للعميل بأسرع وقت ممكن ! نصيحه للجميع عن تجربتي وتجربة واحد من الزملا اشترى له مكيف سامسونغ من عند المطلق وهو الي حمسني اكتب الموضوع بعد ما اشتكى لي من المكيف , اذا ودك تشتري من المطلق , اشتر الله يستر عليك , بس عطه كلمتين في العظم على عمالته الرخيصه السيئه , وخل التركيب عليك عشان يخصم لك حق التركيب , شوف لك محل محترم عنده عماله من اي جنسيه كانت ويفضل الباكستانيه او المصريه لأني مجربهم من الحراج , فاهمين وناعمين بالتركيب , بدون عفاشه , لأن اجسامهم قويه اصلاً بخلاف البنقاليه الي يقتل نفسه عشان يرفع المكيف ويتعافش ويكسر لك الدنيا ! وفوق تحت , بالطول بالعرض , متسوبيشي يهز الأرض ! اذا عندك للغالي , اشتر متسوبيشي , حتى احسن من او جنرال , انا شريت متسوبيشي , واخوي شرا او جنرال , واختبرتهم الإثنين مع اللعلم ان او جنرال حقي الي كسروه المطلق الغيته ولا اعتبرته مكيف نسيته اصلاً قبل ما ابيعه ! , والله ان متسوبيشي اسد , لا يوقف بوجهه لا او جنرال ولا فوجي ولا بقية المكيفات ... واذا مالك والغالي وودك توفر , عندك يورك قوي و ممتاز ويبرد في اسوأ الأجواء واشدها حراً مثل متسوبيشي , بس صوته عالي مايصلح لغرفة النوم , يصلح للمجلس وحتى المطبخ ممتاز برضوا .. اخوكم النوّحي والسلام :) |
الله يعين ههههههههههههههههههههه
والله العظيم لو عامل وهو يركب مكيف وكسر شئ راح اخليه ينزله ولا استلمه وليش اسكت عن حقي بعدين عندك ضمان سنه شامل وخمس سنوات علي الكمبرسور اما مكيف ميتسوبيشي قسم بالله مكيف احترافي ولو انه غالي كمكيف شباك صوت هادي وتبريد ممتاز حتي لو تجميع سعودي مشاء الله مريح جدا |
أخوي خبير مكيفات /
ليتك وضعت اسعار المكيفات التي اشتريتها - وبالفعل كثرت الماركات عندنا للمكيفات تضيع الواحد وختلط الحابل بالنابل وفعلا من قصتك يجب ألا نتساهل في حقوقنا ،،،،،، خاصة الواحد يدفع فلوس وما هو فاضي لوجع الراس وضياع الوقت ،،،،، بارك الله فيك |
:lol::lol:
خبرة عشرين سنة وهو شكله صغير, هذا استقدموه يوم كان بالإبتدائية الله يعطيك على قد نيتك وصبرك وجزاك الله كل خير على نقلك لخبراتك وتجاربك لإخوتك في المنتدى |
والله ما تنلام
أنا جلست أدور ثلاثة شهور لمكيفات اسبلت والمشكلة إنها ستة مكيفات وأخاف أطيح ولا أحد سمى علي |
قاعدلهم حسب فلوسك
التوب o-general وكيله الزقزوق مابعده مشكلته غالي غالي جدا بعده كارير وميتسوبيشي الي اهم من المكيف ليات التركيب تكون اصليه والفني الي يركب |
اقتباس:
|
انتم تقصدون ميتسوبيشي دايا ؟
ماهي صناعته وكم سعر 24 وحده وهل اخذ كمبرسور كبير او صغير مقاس الغرفة 4*5 |
اقتباس:
يعني ذهنك بحاجه وتصادفك حاجه ثانيه مره توقفك عن التفكير , غير كذا كنت ناوي اوقف العامل , بس لما شغله واشتغل شوي , كن نفسي هديت يوم شيكت عليه بعد كذا ارتعبت ! الحمد لله على ذا الحال , الله خارجنا منه والله يخلي متسوبيشي , وعلى فكره متسوبيشي له اكثر من 20 سنه يتجمع في السعوديه واكثر من ممتاز من يوم بدا تجميعه مش مثل مكيفات العيسائي وبقيتهم , مالهم كم سنه يجمعون في السعوديه ... المشكله ان المكيفات الي تتجمع في السعودية ( لعب ) ساعه يركبون كمبروسور امريكي وساعه تايلندي وساعه صيني وساعه يقول لك مركب فيها كمبروسر متسوبيشي ! يفكفكون فيها ويركبون على كيفهم مافي مواصفات تجبرهم على شي واحد ... يعني بالله وستنغ هاوس جيت اشتريه قالو لي : وش ودك ؟ ابو كمبروسر صيني ولا كمبروسر متسوبيشي ؟ :) ولا قبسون , قال لي ودك فائق الهدوء ولا مش فائق الهدوء ؟ يضحكون علينا هذول , شغلتهم اثنيناتهم كلهم نفس الصوت , مدري يفكرون الناس مالهم عقل ؟ مايفكرون , والله سرقه عيني عينك عن باعة الأدوات الكهربائيه , ليت يسرقونك من وراك , هذول ناس تخاف ماتختشيش ! متسوبيشي مافي مثله جد والله ... والله ياخذ المطلق هو وعمالته الرخيصه ابو 400 ريال ! |
اقتباس:
والله ان المكيفات حاجه لك وللعمر , لا تغامر بمكيفات رخيصه , بفرق سعر 200 و 300 ريال تجلس تندم عليها عمرك ... اعتبرها فاتورة جوال ضربت معك شهر ولا كنب شريته ولا اغراض رمضان ولا حتى طلعه مع الأهل ... متسوبيشي فيه اربع انواع شباك .. 24 كمبروسر كبير وصغير ... 18 كمبروسر كبير وصغير ... انا مجرب الكمبروسر الكبير والصغير كلها , الصغير يبرد , لكن ببطئ ... حتى الهوا , مش سريع يصير بارد وهو طالعه منه , الكبير من تطق المكيف إلا والهوا يطلع منه بارد , سريع ولايضيع عليك وقت وانت واقف قدامه ولا حتى تنتظر نس سعه وساعه عشان يبدأ يبرد ... عندي الصيني كمبروسر صغير 18 ومتسوبيشي كمبروسر صغير برضو 18 ... مشكله في الكمبروسر الصغير كلها , لكن المتسوبيشي احسن مليون مره برضوا من الصيني .. افضل واقوى المكيفات على الإطلاق , مكيف متسوبيشي 24 كمبروسر كبير , ماتلاقي ( نهائياً ) مثله ... وصدقني عن تجربه هو افضل من فوجي عند زميلي وافضل من فوجي الي عند اخوي ( بقياس درجة حرارة الغرفة ) مع العلم ان الغرفه وضعها تقريباً نفس بعض من حيث الحجم والإطلاله على الغرب .... فوجي واو جنرال , جيدين ومحترمين تدري وش مركبين لك , لكن متسوبيشي عن تجربه افضل منهم من ناحية التبريد , وحتى لو كان متسوبيشي دايا تجميع سعودي , فهو تجميع سعودي من اكثر من عشرين سنه للمناسبه , وثابت على قوته , وكمبروسره معروف في السوق , مش مثل الزامل كل يوم مركب له كمبروسر شكل , ولا قبسون , ركب له كمبروسر تايلندي دمر البشريه , ثم ركب له قبل ثلاث شهور كمبروسر امريكي , لخبطه في لخبطه , عك وعجن في المكيفات بس الواجهه ثابته ولا يدري الواحد وش يركبون له ... ماودي ادفع عن متسوبيشي ولا اسوي دعايه لهم زايده , لا انا موظف عندهم ولا اعرفهم , لكن والله في بيت الوالد متسوبيشي سبيلت عمره 18 سنه شغال ويبرد ولا سوينا فيه إلا اننا غسلناه بـ 350 ريال من الأتربه مره وعليها عشان تبريده ضعف ثم رجع يبرد ... فيه مكيفات كثيره زينه , بس والله تجربتنا مع متسوبيشي ناجحه 100% ... وتجربتي في بيتي خاصه , بدون ما ادخل بيوت الناس , متسوبيشي ناجح , والواحد مو رايق كل يوم صلح وبدل في المكيفات , عندنا شغل مش فاضيين احنا !! نصيحه , وفر في كل شي , إلا المكيفات وفي السعوديه !! والله قهر لما قيمة احسن مكيف في السوق اقل من قيمة الآي فون وفوق كذا تلاقي ناس توفر وتدور الصيني الرخيص ... |
اقتباس:
والله مايندرى عنهم , وااياك اخوي الكريم , والله والحد ينقهر وهو يشوف التجار ينصبون على الناس وواحد ورا الثاني ينضحك عليه منهم من هذول الحراميه ! |
اقتباس:
عندك متسوبيشي واوجنرال وفوجي ودايكن , وكلها غاليه حيل ... مالك بعدها إلا الصيني الرخيص او السعودي , وعندي اثنين ممتازين عن تجربه , ل جي السعودي ممتاز وزين بالنسبه لسعره و ماندو ... اذا لك في الغالي لا تاخذ إلا من الي فوق , واذا مالك عندك ماندو وال جي , قريبي مركب له ماندو اربع سنين مايشتكي منه , بس ماتدري يعطيه عمر بعد كذا ولا لأ ... المكيفات الي فوق هذي الناس مجربينها من عشرين وثلاثين سنه , من اول قطعه لآخر قطعه ياباني تتجمع في تايلند في عشرين سنه ... حسب وكالة متسوبيشي . ودك نصيحتي , خذ لك احسن شي وفك عمرك , العمر مش بعزئه ! عندنا عيال نربيهم وشغل نشوفه , بنجلس نطرد ورا مكيفات الحراميه والوكلا حقينها ! واذا سبيلت , انت اخترت الغالي , تحمل الغالي :) |
اقتباس:
اول ماتشوف العمال بنقاليه انحش , مصريين وباكستانيين ممتازين عن تجربه وكرماء مايرضون البخس والظلم الرهيب الي يتعرض له البنقالي ... هؤلاء تجار نخاسه , يتاجرون بالبشر والعمال ولا يهمهم اكثر من تكديس رأس المال ولو كان السبب في تحويل هؤلاء البنقاليه الى لصوص وحراميه ... |
باستولوف ...
بالنسبه لكارير , تعبان لأن مكيفه ماعاد امريكي الكمبروسر , صار هندي , وهو نفس مكيف الزامل على فكره ! وعن تجربه مكيف الزامل الجديد , بواب الشركه ركبنا له الزامل عند البوابه ست شهور وفقع الكمبروسر ماتحمل الحراره , مع انه كان سانيو اكثر من 14 سنه قبله ما اشتكى منه ... انا ماشفت مكيفه , بس يقول ان مكيفه قبل الزامل كان سانيو وكان يبرد لين اتعطل وبدله وجاب الخيبه الزامل وضرب عليه بسرعه رهيبه ! |
حياك خبير ..
ويعطيكم العافية يا اخوان على سرد تجاربكم وخبراتكم بالمكيفات .. خبير محل المطلق باي ديرة ؟ |
اقتباس:
وراجعت فرعين له , كلهم قايمين على العماله البنقاليه الرخيصه والفقيره مهنياً ومعرفياً ومالياً ... مشكلة المطلق انه يعطيك وجه حلو مره في البداية وموظفيه شيك ومرتبين في المحل , لكن عمالته من اسوأ ما يكون , الي بيشتري من عندهم برضوا الله يستر عليه , يمكن يلاقي عندهم اسعار افضل من غيرهم , وممن يضربوه بالسعر مايندرى , اهم شي يعطيه كلمتين بالعظم , مع العلم ان شكلهم مريشين , تو موظفهم قايل لي في آخر زياره "تفقديه" بعد كتابة هذا الموضوع انهم باعوا 200 مكيف كارير على جهه حكومية او شركه مدري والله ... |
خبير
ماودك تجاوب على سؤالي ؟ الله يسامحك |
اقتباس:
شوف كيف تحسب عدد الوحدات المطلوبه للغرفه , لك المعادله الي اخذتها من المختصين في التكييف من توشيبا , وكيف يحسبون عدد المكيفات المطلوبه للمساجد والشركات وكذا والمركزية خاصه ... عرض في الطول في الأرتفاع في 300 = عدد وحدات المكيف يعني طول الغرفه 5 متر عرض العرفه 4 متر ارتفاع الغرفه 3 متر 5*4*3*300 = 18000 الف وحده كفايه ... بس على حسب فيه ابواب مفتوحه , زاويه مش زاويه , منور ولا على الشارع , فوقك سطح ولا شقه بارده ... كلها تلعب دور ... وعلى حسب انت تحب التبريد السريع ولا بالك طويل ؟ اذا ودك مكيف من تطقه يجمد الغرفه , خذ لك متسوبيشي 24 كمبروسر كبير , واذا بالك طويل , وراح يبرد لك الغرفه , 18 متسوبيشي كمبروسر كبير يكفي .. او حتى صغير .. لأن الصيني الي عندي ممتاز , ويبرد رهيب , بس مشكلته في ( البطئ ) ياخذ ساعه لين تبرد الغرفه ويمكن اكثر ! توصل ساعتين لين احس الغرفه بارده . ومره وصلت ست ساعات ولسه احس الغرفه حاره في موجة الحر !! 24 كمبروسر كبير متسوبيشي 1950 وصلته مع البايع , بس لو تروح تسأل الحين بيقولون لك 2100 , وبينزلونه لك بالسر ! |
ياخوي خبير
انا نويت على ميتسوبيشي لكن ابغى رايك اخذ 18 كمبرسور كبير والا 24 كمبرسور صغير |
اقتباس:
او 18 كبير , وعلى طول ثبت كمبروسورات كبيره , ترا تجيك ايام في السنه , الصغيره ماتستحمل التبريد بسبب تقنيتها الـ مافيها تبريد ذاتي مثل ماقال لي فني التوشيبا ... |
اسمحولي ان اضيف
عند اختيار المكيف لاتخدع ببعض الماركات المغمورة وانتبه للصيانة ومدتها ولاتحاول كماذكر الاخوان تصلح المكيف عند اي فني او عامل نسبة كبيرة منهم يتعلمون |
تم نشر الموضوع على صفحة مقاطعه على الفيس بوك
|
اخوي خبير مكيفات
ميتسوبيشي مادري وين تباع عندنا في القصيم لم اجد الا محل واحد ويقول مافيه 18 كمبرسور كبير يقول لا يوجد ! والاسعار 18 كمبرسور صغير 1550 24 كمبرسور صغير 1850 24 كمبرسور كبير 1990 الضمان سنه شامل وخمس سنوات على الكمبرسور يقول عندنا نوعين تايلندي وسعودي والتايلندي اغلى |
وين رحت ياخبير
لا تخلينا |
اقتباس:
وكنت اتمنى اني اشوفهم عشان اسألهم لأن معلوماتك غريبه , قلت يمكن قطعوه عن السوق .. لأن كل يوم لهم قصه ... تخيل ممكن تجيهم هالأسبوع ويقولون لك ماعندنا كمبروسرات كبيره وانتهى الموضوع , بعد اسبوعين تجيهم يقولون لك : تفضل , هذي هي ... على حد علمي من شهرين كنت عندهم زياره تفقديه :) وكانت كل الأنواع الأربعه موجوده .... مدري ليه الحيره في منتج راح يجلس معنا العمر كله , محد يبدل مكيفه مثل جواله , هذا شي تشتريه وتعيش حياتك ... اذا اشغلت بالك فيه كثير يعني فيه حاجه غلط ... وكلها على حاجه مو مستاهله , الفرق كله 300 ريال , عده فاتورة جوال وانتهى الموضوع ... |
الي عندي ميتسوبيشي دايا 18 كمبرسور صغير هادي
الغرفه 5x4.5 ممتاز جدا الي جرب كمبروسر كبير هل هو مزعج ؟ |
اقتباس:
اصلاً الإزعاج الحقيقي تسمعه اثناء فصلة الكمبروسر عند اي مكيف , وانا بعمري ماسمعت ازعاج مثل ثلاث مكيفات , جبسون الشبح ابو كمبروسر كبير , سمعته في اكثر من محل بحراج الرياض , كلها نفس القرقره وهي جديده للمناسبه مش مستعمله ... وكارير تحس صوته مثل جبسون , ويورك والزامل .. الى ان اكتشفت ان الثلاثه الأخيره كلها كمبروسراتها ( الكبيره ) يصنعها مصنع واحد في الهند ... واذا ودك نصيحتي الشخصيه , خذ لك او جنرال , صحيح ان صوته الطبيعي عالي وان متسوبيشي افضل منه في التبريد , لكنه صوت هوا بسبب قوة دفع الهواء والمروحه , لكن صوت الكمبروسر حقه يادوب تسمعه اذا اشتغل او اذا فصل ... ولو استقبلت من امري ما استدبرت كان اشتريت او جنرال لغرفة النوم .... |
او جنرال 18 ح ب
ب 1770 |
موضوع رائع !!
مشكوووووور والله يعطيك الف عافيه |
اقتباس:
|
اقتباس:
والله يدمر المطلق وشلتهم على الجشع وعمالتهم البنقاليه ! |
بعد مامسحت البلاط في السوداني مع احترامي لجميع الإخوة السودانيين ... بعد انتظار دام شهر لإصلاح تركيب المكيف السبليت ...
ولأني اعلم يقينناً انه ينمسح فيه البلاط كل يوم من الزبائن واصحاب الشكاوى , زرته اكثر من مره في المعرض وانا انتظر عماله عشان يصلحون المشكله بمكيف اسبليت وهو يوعدني كل شوي ويقول شوي , اصبر شوي , او تعال بكره ... قلت بكره مين ؟ قاعد ياحبيبي ماوراي شي ... لين جاك زبون بدفتر طلبات بيأثث عماره كامله وبيشتري شغلات مركزي وسبيلت وشباك ووده بعرض كامل لعمارته وكل شوي يكلم المهندس ... قلت مابدها ... وفتحت لك النار على السوداني الله لايعيده ... وهنا حمّر وجهه وصفر وهو مستغرب قلبتي عليه ... لين دخل الزبون الجديد معنا على الخط وقال للسوداني وهو يناظر فيني : كيف عمالتكم كذا , ليش الناس يشتكون منها ؟ هنا السوداني قل ادبه وبدأ يتكلم علي بس عطيته فوق راسه ... وآخرتها على ان الزبون الجديد يهدي اعصابي انا والسوداني وشكله هون من شرا المكيفات من عند المطلق التعبان , والسوداني مولع ان زبون طار منه ... المهم ان السوداني ماعاد نساني ابد , وقال لي خلاص بكره اسويه واصلحه لك ... انا مكيفي السبليت برا ... والله اني نمت وصحيت ووالله مادريت إلا والجماعه ركش جابوا العمال ركبوهم السلالم لفوا مواصير المكيف النحاس المكشوفه , وانا اقوم من النوم وانا اضحك على الشغل السريع التمام بدون مايكلموني او يستأذنون نهائياً , والله انهم مره من المرات جو العمال عند بيتي , دقو جوال علي , وانا اعزكم الله في دورة المياه , خمس دقايق وارجع ادق عليهم , إلا والسوداني يقول لي : ايش مواعيد عرقوب هذي ... خلاص مشو العمال لزبون ثاني ! قلت الله ياخذك انا منتظركم اسبوع وكل يوم تقولون اسفين بكره ... وكل يوم اتجهز وانتظركم بعد العصر وتعتذرون ساعتها .. المهم المره هذي لا استأذنوا ولا اتصلوا ولا سووا اي شي , جوك , ركبوا , صلحو .. اشتغلوا ثلاث اربع ساعات وانا نايم والله , ومشو وانا صحيت منتفض ابي اروح للسوداني مره ثاني إلا واقوم اشوف الوضع ممتاز ومرتب كأني في حلم والله واجلس اضحك ههههههههههه |
| الساعة الآن 05:11 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by