قدر الله لي اني اشتريت غرفة نوم من شركة تناتل للأثاث المنزلي من فرع بريدة وكانت الغرفة غير مصبوغة من الداخل وكان منظرها مقرف شوي وسألت الموظف وقال لي ان لو صبغناها انه يثبت فيها رائحة اللون فقلت مو مشكله توكلت على الله وشريتها وقلت التسليم بعد ثلاثة شهور تقريباً وطلب مني العربون وقال تراى الغرفة ما تصبغ بويا الا بعد ما تكمل المبلغ كامل وقبل ما تبيها تبلغنا قبلها بـ 15 يوم قلت طيب المهم سألت ناس مختصين في انواع الغرف والصبغات هل يمسك فيها رائحة البوياء قالوا لا نهائي بس المقصد توفير البويا المهم جاء الموعد اللي طلبت فيه تسليم الغرفة ودفعت كامل المبلغ وطلبت انها تصبغ من الداخل وقالي نصيحة تراه بيمسك الرايحة في الملابس قلت على مسؤوليتي المهم جاء 15 يوم ولا جات صارت حوالي 25 يوم وبعد اكثر من اتصال يالله جات يوم جات وركبوها كانت مغبره وطلبت تنظيفها وطلع في بابين منها انه جايه غبره وداخله بين صدوع الخشب وفيه درجين كان عليها نقاط وقلت للعمال اللي ركبوها وش فيها قال يمكن غبار بس وخلوني اوقع على الاستلام وهذي اكبر غلطه اني استلمت شي مغبر وقالوا لي العمال اذا ما طلعت اتصل على موظف الفرع وهو طبعا سوري الجنسية رحت وجبت منظفات خاصة بالاخشاب وانه نفس الحكاية واتصلت على السوري وقال خلاص فكهم وجيبهم فكيتهم وجبتهم له وقال لي البابين جايهم غبره قبل ما تنشف وبالنسبة للدرجين طاير عليهم بويا وراح ارسلها للرياض للمصنع هذا الكلام في شهر في تقريبا نصف شهر ثمانيه وقالي انه تصل تقريبا بعد اسبوعين قلت مو مشكله المهم طولت عن الاسبوعين جيته وقلت له قال راح تصل خلال اليومين هي جاهزه بس راح تطلع في اول سيارة انتظرت اسبوع شفت ما جاء شي ورجعت له قافله اخلاقي بسبب المماطله وطلبت رقم المدير وعطاني رقم مدير الفروع وكان سوري برضه وكلمته وقال راح اشوفلك الوضع واتصل فيك اتصل فيني وقال راح تصلك على اول سيارة بعد يومين وانتظرت وماجاني شي واتصلت عليه وقال خلاص بشوفلك الوضع وارد عليك ولا رد عليه وصرت اتصل فيه ولا عاد يرد عليه ابدا والله اني اتصلت عليه بشكل متواصل وانا طالع من الرياض حتى وصلت القصيم وكان يوم خميس في رمضان لين وصلت فرع بريدة وقلت ليش ما يرد عليه مديركم قالي انه يوم الخميس اجازه عندهم ويداومون يوم الجمعة وطلبت من السوري موظف الفرع انه يعطيني تلفون صاحب الحلال صاحب المصنع وعطاني رقم وتحويله والله ما احد يرد عليه ما خليت وقت ما كلمت فيه ما احد يرد عاد قالي موظف الفرع اول ما عطاني الرقم يوم شاف العلم وصل حده انها راح تجي السبت وتركب الاحد بدون ما يكلمهم ماشاء الله عليه نزل عليه وحي وكلمت خدمة العملاء وطلبت صاحب المصنع لان عندي شكوى وابيه للضروره القصوى واخذ رقم جوالي واسمي وانتظرت وما اتصل ومن بكره اتصلت وطلبت صاحب المصنع انه يرد علي كان هذا في اواخر رمضان برضه مارد علي واتصلت من البكره ورد علي واحد ثاني جديد توه متوظف حسب كلام صاحب الحلال وكلمني واحد يقول انه شريك في المصنع وباشرته بسؤال كم تاخذ غرفة النوم واستلمها قال اسبوع قلت واللي له بابين ودرجين لها شهرين علشان استلمها قالي مصيبه طبعا المكالمة مسجله قالي راح اتصل فيك وابلغك اتصل فيني وقال امس واصله وراح تركب بكره ان شاء الله جاء بكره وما ركبوها واتصلت فيه وطلبت منه انه ياخذ الغرفه ويرجع لي فلوسي بصراحة مليت قال خلاص ابشر راح يصلك شيك وسكر بوجهي وهو معصب بعدها بدقايق اتصل علي السوري اللي بالفرع هذا الكلام تقريبا الساعة 12:30 بالليل وقال نص ساعة وتكون عندك قلت خلاص ما ابيها المدير يقول انه بيرجعلي فلوسي واكتشف ان المكالمة مسجله وبعد ما سكر اتصل علي اللي بيرسل لي الشيك اللي كان معصب واول شي طلب مني تسكير مسجل الصوت وقام يعتذر لانه عرف ان جميع المكالمات مسجله وصاير يعتذر ويطالب انه يسكر المسجل وقال علشان التأخير بنرسلك مرتبه غاطين هديه راح تطلع سيارة خاصه لك والله الى الآن ما وصلت عاد وصلت الابواب والادراج الساعة 2:20 الفجر وكان فيها بقايا من الغبره اللي داخل الصدوع والبويا اللي في الدروج حاكينها شوي بس الحمدلله اللي وصلت ، اترككم مع الصور مبين فيها شعار الشركة على ممسك الباب ومبين ايضاً العمال ويهم يركبونها وشكل الدولاب والدرج قبل التركيب وباقي الغبره اللي بين الصدوع.

غصن البان أفضل بكثير كبديل ولاحد يقول تسوي دعاية

المشاركة الأصلية كتبت بواسطة جمرة غضا (المشاركة 166160) تفصيل غرفه يأخذ 3 شهور ! الفله العظم تقوم بثلاث تشهر ... المشكلة لا ارميها على العمالة بل على من جلبهم ولم يراقبهم المفروض من كل مصنع وشركة وضع رقم للشكاوي بـ الفاتورة يربط بتلفون المدير مباشرة هذا إذا كان يهتم بأمر العملاء.. ولا يقول المدير أنه مشغول بأعماله فالعميل هو رأس المال التاجر و هو سر بقاء ونجاح المعارض والشركات ========= تم تصغير الصور

المشاركة الأصلية كتبت بواسطة شايب متخلف (المشاركة 166167) والله اخي شتان بين تناتل والمماطلة وبين حياة :zx:... والله ياخي حياة ابداع .... شريت منهم طقم مقاعد للاستراخ بـ 4500 ولا حظ ان السعر ممتاز ... قالوا نجيك بكره الساعة 4 ,,, وفعلا الساعة 4 بالضبط هم عندي بالبيت:thumbsup: ... وان شاء الله تناتل ما اقرب منهم:mad::mad:..

المشاركة الأصلية كتبت بواسطة ماجد2002 (المشاركة 166188) السلام عليكم كان الله بعونكم شكراً للتنبية وخلط وراء حقك

المشاركة الأصلية كتبت بواسطة عبدالله بن علي (المشاركة 166191) المثابرة +الاستشارة + الاستخارة ___توفيق الله_______________ = النجاح والتوفيق

المشاركة الأصلية كتبت بواسطة سفير (المشاركة 166441) اخ من القهر فيك يا بلد واذا صرخت تنادي بحقك ماتلقى من يرد الصوت مدري وش خلاك تتحملهم كان من البدايه واول ماشفت الملاحظات ما اسلمهم ولا اوقع لهم الا بعد انتهاء الملاحظات بس بصراحه ثوب العيد يجنن ههههههههههههههههههه

المشاركة الأصلية كتبت بواسطة ابو نواف (المشاركة 166548) انا يوم نويت اشري غرفة نوم رحت لهم وحسيت ان ما عندهم سالفة من يومها طلعت من المعرض ولا طبيته مرة ثانية .... غصن البان أفضل بكثير كبديل ولاحد يقول تسوي دعاية

المشاركة الأصلية كتبت بواسطة ماقبل الكارثه (المشاركة 166626) اخي شايب متخلف هذا والله من حسن حظك انهم جوك بسرعة بس المشكله والله اني محذرهم اني راح انشر بالنت لكن ما اهتموا بالوضع ولا اعطوه ادنى اهميه لكن حسبي الله ونعم الوكيل.

يا اخي انا في الرياض واشتريت منهم غرف نوم وشوفونيرات وكان الضمان ماشي اتصل عليهم
وبرقم جوالي يطلعون العقد ويرسلون النجار يسوي المطلوب
الآن بدو يتهربون وحطو نظام جديد يقولك جب العقد علشان نشوفه وبعدين نرسل معاملة للإداره وهم يقررون يرسلون الصيانة او لا , قلتلهم العقد ماقد طلبتوه من ست سنوات اتصل وتجون وانتم تعرفون بضاعتكم يعني ماطلبت صيانة بضاعة جايه من مصدر آخر قال لا والله من يوم اشترا الشركة الشيخ العريني طلع نظام انه مايتم الصيانة الا بصورة من العقد وعندهم مدير مبيعات اسمه يوسف شامي , الله لايوريك كذاب ويلف ويدور مع الزباين .
الزبده تناتل تحاول التخلي عن عملائها وتعطيهم ركبة في الضمان اللي المفروض انه ممتد لعشر سنوات من تاريخ البيع , لا وفصالات الدواليب دائما تخرب والله عندي دولاب مسوية عند باكستاني من 13 سنة وحتى الان ماخرب ولا فصال في الابواب وهذولا شركة وسمعة وكل شهر خربانة الفصالات , خله على الله
حسبي الله ونعم الوكيل .....