بروستد بيت الفروج ...زيادة بخبث
رحت يوم الخميس لبروستد بيت الفروج - حي الملك فهد شارع الامام سعود بجنب عصير50 فاكهه- وطلبت كان البروستد ب13 ريال ويعتبر غالي لكن قلنا كل شيء غالي :)واليوم الثلاثاء رحت وطلبت وبعد ما طلبت شفت لوحه مكتوب عليها نعتذر عن تقديم الحمص مع الوجبة قلت للكاشير طيب ليه ما تخفضون السعر قال ان السعر ما يوفي معهم بالحمص:eek: وهنا اطالب بمقاطعة هذا المطعم وللمعلومية المطعم جديد ماله 3 اشهر ولكن الطمع يعمي |
اقتباس:
حتى الحين فيه مطاعم تحط الحمص مع البرستد ولا زادوا بالسعر |
فـعلاً الناس أذواق .. هذا المطعم جربته من حوالي شهر بالصدفة أنا وواحد من الشباب
بصراحة ما أدري كيف الناس تمدح فيه دجاج مجمد ساديا وواضح من حجم الدجاجة وسواد العظم بصراحة ارتفع ضغطي منهم والخدمة ذاتية وعمالة بلا أخلاق تطلب منه كاتشب أو ثوم يرد عليك بنفس شينة ..!! البديل موجود وقريب من هالمحل محلات كثيرة |
تعرفون مطاعم بروستد مميزة
|
اقتباس:
1 -دستو ........ طريق الملك عبدالله مقابل الجامعة . 2 - الافندي ..... اعرف الرئيسي شارع الخزان . 3 - الكيان الذهبي ... السويدي الشارع اللي فيه المعهد العلمي . 4 - وهذا بيت الفروج ... شارع الامام ( الجامعه ) للمعلومية هذا المطعم رجع الحمص اللي هو بيت الفروج. |
فعلا يا شباب انا قبل اسبوع اكلت من بيت الفروحج رجع الحمص بس للاسف المايونيز مو زي اول ولا الحمص
|
مشكورين جدا
الافندي رفع سعره |
مابتوفي حلوه
يذكرنى بالخطوط السوريه كانت لها رحله من الرياض عبر دمشق الى اوربا وكان صديق حاجز عليها المهم جاء وقت الرحله راح مااحصل احد فى الكاونتر اتصل على مكتبهم فى الرياض سالهم وليه الغيتوا الرحله قالوا الركاب قليلين ومابتوفي معنا |
مع انى سامع ان صاحب البروستد المذكور مواطن الا ان الارتفاع عليه التراجع عنه
|
السلام عليكم ...
عدنا بعد غيبة ... فكل عام أنتم بخير. لمن سأل عن مطاعم البروستد فهنالك : - الأفندي (الخزان , النسيم) - غصن التوت (مخرج 15) <<< دجاجه صغير لكنه متميز بظني - مذاق الريف - الليوان. |
قاطعوهم .. اتركوه لهم
|
و الله انا اشوف من وجهة نظري انه ما في داعي للحمص اصلا مع البروستد
و الانسان ممكن يتخلى عنه في سبيل تخسيس الوزن و لا مانع ابدا من زياده السعر طالما ان الجوده ستظل كما هي ..... و أما زيادة الريال و الريالين او حتى الخمسة ريال فيمكن ان تحتسبها عند الله و تعتبرها صدقه للعامل او لراعي المحل وفق الله الجميع لما يحب و يرضى |
حسبنا الله ونعم لوكيل
|
اقتباس:
انا سجلت في المنتدى هذا وفعلت عن طريق الايميل واشغلت نفسي بس علشان اوضح لكم شي بسيط القاصي ليش حاسد الناس ياخي بكره انت بتفتح محل تبي الناس تشره عليك لانك تبي تحصل على طبقة راقية ورفعت السعر ؟ طيب ياخي انا توني جاي منه وتعشيت ومعة حمص وكل شي مرتب والموضف ابو شنب يازينه اول بنقالي اشوفه مقبول بس تدري انا ادفع 13 ريال علشان شي بنفسي مشتهية واكله وانا مرتاح يعني ادفع 100 ريال علشان اروح اكل في مطعم الخليج الصيني ليش ؟ لان شي يفتح النفس الاكل مشتهيه ما يهم السعر يهم المزاج مزاجي انا لنفرض راعي المطعم رفع السعر بشكل خرافي بدفع 15 ريال لبروستد + 10 ريال حمص ما دفعت غصب عني برضاي وانا ابي عشاهم ما عجبني السعر ليش اتكلم بشكل التشويه وكانه مسوي معصية للرب هو حر عجبك حياك ما عجبك رح للمطعم الي يعجبكم والله انقهرت وانا مالي دخل في الموضوع بس اتخيل بكره افتح مشروع يجي واحد زيك يخرب علي ليش النذالة ؟؟؟ وكل هذا علشان حاط الحمص لحالة والله حالة اجل وش المطعم الي عاجبك بالله خلك في مطعم بيتكم اصرف وخل المطاعم الي بفلوس لاهلها كبر عقلك وخله ياخي ما فتح علشانك هو :( |
هل تبيح ام تقبل ام تدعو الي استغلال المستهلك !!!!
اقتباس:
|
اقتباس:
القسم اللي فيه الموضوع اسمه "مطاعم رفعت أسعارها" بإعتقادي أغلب أعضاء المنتدى من الناس اللي تعتبر رفع الأسعار من غير مبرر إستغلال. الناس عقلها في راسها و كلٍ مسؤول عن قراراته. إذا انت شايف الأسعار مناسبة فـ بكيفك. و الأخ كاتب الموضوع ما عجبه السعر و برضه بكيفه. إذا انت شايف ان رفع الأسعار هو بحث عن الطبقة الراقية فليش زعلان؟!! اللي قرأ الموضوع و ما عجبه السعر و رفض يدفع ليس من الفئة المستهدفة! و على قولك ما فتح علشانهم. ممكن أكون معاك في كلمة "زيادة بخبث" ما لها داعي. اسم المطعم مع الأسعار تكفي. |
والله احترنا وين نروح قسم بالله في ناس مايقدرون يدفعون قيمة الاكل
وحصل قدامي الشيء هذا شايب مسافر دخل مطعم مندي يوم الثلاثاء الماضي وسألة عندك لحم مندي قال موجود قالة طيب عندكم مكان للعائلة قال موجود قال طيب عطني نفرين لحم سألة اخونا محلي او سفري قال محلي معي العائلة قال الحساب 90 ريال قسم بالله الشويب المسكين طير عيونه في البائع قال النفر بكم قال 45 ريال قسم بالله ان العبرة نزلت من عيني من الحصل بعد ماقاله 45 ريال النفر قعد المسكين يدور في جيوبة مالقا الا تقريبا مبلغ في حدود الثلاثين 30 ريال في جيبة سألة طيب بكم الدجاجة مع الرز قال 30 ريال اخرتها الشويب المسكين قالة عطني نص دجاجة مع الرز وخل الطلب سفري يوم طلعت برا لقيت مع في السيارة عجوزة وبنت وولد صغير والله ان دموعي نزلت قال الشويب طيب |
اقتباس:
لا حظت عدد مشاركاتك وعرفت السبب في دفاعك ولوالمطعم يوم فتح يبيع الوجبه بـ20 مافيه مشكله لكن انه كل يوم يسوي حركه مالها داعي ..لا ... والف لا عموما احترم اي رأي اذا كان من عضو ليس له مأرب او مسؤول يدافع بطريقة اقل مايقال عنها انها تدينه اكثر من انها تبرئه . تحياتي |
يوجد مطعم برستد 123 على طريق الامير نايف حي الملك فهد جنوب محطة الصفر الدولي
بسعر12 ريال |
حتى حنا السعرررررررررررررررررررررر
مايركب معانا |
اقتباس:
والله انت اللي كبر عقلك 00 وهذا المنتدى لتثقيف وتنوير المستهلك وما أوجد الا لمثل هذه الزيادات بغير وجه حق 00 اذا زاد عن السعر المتعارف عليه لو ريال واحد يعتبر جشع ويستاهل المقاطعه وفضح أمره حتى يرجع سعره زي الباقين وش يفرق يعني عن المطاعم الباقيه اللي زيه لو كان من المطاعم ذات الفئه المميزه زي كنتاكي مثلاً نقول معليه لكن زيه زي المطاعم الباقيه اللي تبيع بروستد يأخذ له حبة دجاج ويحط عليها شوية دقيق وينطلها في الزيت ولا اقصد هنا بأن لكنتاكي الحق في رفع سعره ولكن بلا شك يكون يفرق عن تلك المطاعم الاقل فئه منه ولو رفع سعره المتعارف عليه لا شك أننا لن نرضى بهذا00 بعدين اذا سكت المستهلك عن أمثال هؤلاء بيجيك الثاني والثالث والرابع .... الخ ويقولون وش هو احسن منا فيه ومع ذلك الناس تشتري خلنا نرفع السعر مثله 0 |
| الساعة الآن 10:54 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by