السياحه الداخلية و معاناة العزاب @!
اكتب هذا المقال من واقع تجربه مريت فيها قبل يومين
اكتب لكم من ابها البهيه احدى مصايف بلدنا الحبيب قدمت الي ابها قبل يومين وهذه المره لوحدي ( عزوبي ) لارتباطي بدوره لمدة اسبوع في ابها. واول مانزلت من المطار استأجرت سياره ( وزين سويت ) وذهبت لابحث عن سكن ماشاء الله الشقق المفروشه ماليه البلد ولكن للاسف مايسكنون رجل لوحده لو معك عشر كرووووت عائله !!!! يقولون لك عزوبيه مع اني مبطي عن سماع هالكلمه @@!!! بالعلم ان معظم الشقق المفروشه فل فل ( العماره فل بالكامل) .. لايوجد سكن وسألت عن الاسعار وهي فوق الخمسيه ؟!! المهم رضيت بالواقع وجلست ابحث عن سكن عزاب تصدقون ياجماعه في ابها هناك ثلاث عماير بس سكن عزاب 2 بالسوق ووحده خارج السوق وللاسف ماتسكنها البسسه .. عفوا للكلمه ولكن هذا الواقع غرفه مترين في متر وسرير وبدال التكييف حاطين مروحه شفط كأنك في حمام وجدراهن المنيوم والحمامات مشتركه ( تمنيت اني صورت الغرف ) انصدمت مدري استغربت مدري ذهلت من الامر المهم اقتنعت ان هالسكن مايصلح رحت للفنادق الكبيره طبعا فل بالكامل ولمدة شهر تقريباً ( بسبب الزحام هذه السنه والاقبال الكبير على ابها ) المهم جاء نص الليل وانا مازلت ابحث عن سكن اخر شي اقتنعت اني ماراح احصل ومريت السوق وشريت بطانيه ومخده ورحت لمسجد على طريق بعيد ونمت فيه وحمدت ربي اني بهالجو الحلو وبعد حوالي نص ساعه الا باص جاي وفيه حوالي عشرة طلاب مع مدرسه ( شكله بالمرحله الثانويه ) وكلهم ماشاء الله ملتزمين وكل واحد ينزل بطانيته او فراش النوم حقه وكلن يمسك زاويه عارفها شكلهم لهم يومين بهالمسجد !! لانهم عارفين المحل .... الله يعينهم ومن بكره داومت وتعرفت على احد الاخوان وبالواسطه والمعرفه لانه من اهل المنطقه اجاد لي سكن في احد الفنادق غرفه تعتبر فايف ستار عند اللي شفت وهي فعلا جيده ونظيفه ومعقوله ( لاتنسون بالواسطه ) وبعدها عذرت الشباب يوم يسافرون برااا ماحد يقولك شقق عوائل وعماير عزاب من الطريف ان احد العماير كان مكتوب عليها سكن عزاب فرحت كثيرا كاني مبشر بترقيه دخلت الا خمس اوراق مكتوبه باليد كاتبها سوداني صاحب الاستقبال مفادها لايوجد سكن حتى هذا اليوم الرجاء عدم الازعاج !! بعدها حسيت بمعاناة شبابنا ولا اعلم من لم يجد سكن اين يسكن هل يضطر لشراء خيمه وعدة كامله @!!!!!!! اما كيف يتصروفون .. كان الله بعونهم .. وملاحظه اخري .. لم اجد لها تفسير حتى الان لم ارى في ابها اي تكسي او لموزين !!!!!!!!؟؟ مدري يكدون خصوصي او وش السالفه بالضبط .. (اهل ابها ابخص بوديانهاااااااااااااا ) اسف على الاطاله وعلى الشطح بالموضوع ولكن حقيقه اردت ان ابينها من واقع تجربه والي اللقااااء في سياحه داخليه اخرى |
حياك يامقاطع ابها البهية ومناطقنا السياحية ينقصها الكثير اقتباس:
لكن شي جيد ان مساجدهم مفتوحة :rolleyes: شكلها مساعده من ادارة الاوقاف والمساجد للشاب السعودي الاعزب لكن تجارنا وينهم ؟؟:confused: خبري بهم يدورون القرش وينه :cool: لو ينشئون مشاريع سياحية خاصة للعزاب تشمل سكن و مطاعم وملاعب و حدائق وغيرها,, واتوقع ان العائد المالي منها ممتاز |
هلا فيك مقاطع فعلا عندنا سياحه جميله ولكنها معاقه ينقصها الكثير من الثقافه والامكانيات حتى نسميها سياحه.. سواء نمت في المسجد او في السياره فهو مصيرك لانك في النهايه تبقى مواطن فاللي عليك اكثر من اللي لك.. تصدق وان اقرا قصتك الطاش ماطاشيه اتخيل لو ان اللي منتدب الماني كيف يبي ينام بالمسجد وهو مهب مسيحي؟؟ تتوقع انه يبي ينام مع شيوخ البابون في الجبال؟؟ فعلا امر مضحك مبكي بالانظمه العقيمه ضاع جيل كامل وانعدمت فيه الوطنيه. |
هلا وغلا مقاطع من الجبيل
الحقيقة وضع مضحك مبكي من جد السياحة عندنا بالمملكة توجد بالمسمى فقط لكن لو بحثت عن سياحة حقيقية فلن تجدها على ارض الواقع للاسف فلا بنية تحتية ولا مشاريع ولا اهتمام وكل من زار المناطق السياحية لمس هذا الشي بنفسه وعايشه على ارض الواقع واللي نقدر نقول عسى الوضع يتحسن مع مرور الايام بإذن الله سبحانه وتعالى |
اقتباس:
فعلا مضحك في بلد التجار ....!! على قولتك يدورون القرش ليش مايبنوون عماير ويستغلونها بالصيف كما هي عادتهم وبالشتاء اجار عاااااااادي اظن وزارة الاوقاف ناسيه سالفة المساجد ثانكس |
اقتباس:
اسف على الاخطاء الاملائيه واللي بعض المرات تجيب العيد |
اقتباس:
جمله كتبتها اثرت فيني _ اللي عليك اكثر من اللي لك _ فعلا اتوقع لو الزائر الالماني كان كل الفنادق .......... يطردووون اللي فيها عشان سموه :) لاتخاف على اهل البنوز مسنعين انفسهم منذو مبطي خف على ابو سعود لاخلصت مصاريه بالشام وإلا في سياحتنا الداخليه لاصار عزوبي مايحصلوو مطرح يبات فيه همسه وملاحظه على كل مسافر يصطحب معه فراش نوم للطواري :) |
اقتباس:
هلابك اخي الغالي مقاطعهم فعلا لا مشاريع ولا اهتمام .... وبصراحه لا اعلم ماهو دور وزارة السياحه اللي بس تصرف فلوووووووووووووووووس ولها ميزانيه .... يعني بس شغلها تسوي احصائيات ؟؟؟ الي متى اقتر ح عليهم وضع مكتب لهم في منطقه سياحيه للارشاد السياحي |
ننظر الى دبي
جو حار & رطوبة ومع ذلك صنعت السياحة عالمية اذاً السياحة صناعة وتطوير وابداع هنا مطر وجو بارد وونقول هذه السياحة كفانا ضحك على أنفسنا أنا اطالب بالسماح للشركات العالمية للفنادق والمدن السياحية بدخول المملكة وانهض بالمجال السياحي |
اقتباس:
|
هههههههههههههههههههههههههههههههههههههههههههههههههه هههههه
حصل لي والله نفس موقفك .. دائما اروح اصيف بالعائلة فما فيه مشكلة في السكن لكن كان عندي انتداب ولما رحت حسيت بمعاناة الشباب العزاب الله يرحم حالهم وحالنا اذا تعزبنا اللهم زوج كل اعزب . |
قبل فترة ليست بعيدة ذهبت مع العائلة والأقارب إلى الباحة وهذي حدي بس " جبالها تخوف" المهم كنت متخيلة أماكن نظيفة وفخمة وخدمات راقية -على قدي- واستنكرت على بعض رجال العائلة شيلهم لقدور وصحون ومستلزمات الرحلة البرية حتى خيام وفرش ومخدات كل شي ( بيت متنقل ) المهم رحنا لشقق قال مفروشة والله فشيلة اضطرينا نفرش فرشنا اللي معنا على موكيتهم المعفن وطبعاً السرر استغنينا عنها لأنها واضح معشش في المراتب الحشرات والكائنات التي لا ترى بالعين المجردة ، من جد ماهون علي إلا مناظر السحب التي تأتي من بعيد مسرعة متراكمة من وراء الجبال والمطر الذي غسل خاطري كأنها ترحب بنا وتعتذر لنا عن قصور أهل المنطقة حتى ملاهي للأطفال بائسة يارب لك الحمد....ياناس حتى المنتزهات مافيها خدمات ولا بلدية تمارس دورها في النظافة طبعاً الناس للأسف أغلبهم عقلهم زي الأطفال يرمون قمامتهم مكانهم غير تخريب البيئة ..
الله انعم علينا لكن المشكلة سوء الادارة غزارة في العطاء من الخالق وسوء تدبير من الخلق....بعدها قلت توبة أروح للجنوب ... |
اقتباس:
والله شقق معفنة وبعوض لعب فينا الصراحة إهمال ما بعده اهمال .. ويقولون سياحة داخلية مشكورة اختي |
هلابك اخوي مقاطع
قبل اسبوع صار لي نفس ماصارلك بالظبط طلعت انا ولثنين من الشباب كنا ناوين ابها ومشينا بالسياره من الدمام الى مكه واعتمرنا الحمدلله وطلعنا من مكه الى ابها ووصلنا ابها واحنا تعبانيين طبعا وبدت مشكلتنا مع السكن حتى خيام ماحصلنا والمشكله اننا اول مره نروح لأبها وبعد مرور تقريبا4ساعات حصلنا عماره على الشارع العام مكتوب عليها (شقق فاخره للعزاب ) ووقفنا عنده طبعاً الشقه يوم شفتها لاهي فاخره ولا شي بس تمشي الحال وشرط علينا ان العقد لمدة يوم وكل يوم نجدد طبعا خذنا اليوم الاول بـ 300 يوم رحت اجدد لليوم الثاني قالي 350 وعرفت ان العزوبي مغلوب على امره وخذنا قشنا وديورنا سيده للدمام والله لايعودها من سفره (والسنه الجايه إن شاء الله للخارج ) |
اقتباس:
زين اللي ماهو بنا بلحااااااااااالي الله يعين |
اقتباس:
نوره مشكوره على سرد هذه القصه التي تضيف شهادة للموضوع وحلوه جملتك الاخيره حقت بعض الناس اللي يرموووووون قمامتهم بالشارع فعلا شي غريب نشوفه ... ان شاء الله تتحسن الاوضاااااااع قريب وإلا ......... |
اقتباس:
ماودي انك تروح للخارج لانه بصراحه مامثل المملكه رغم حرها وبردها وقلة شققها اقل شي مرتاااااااااااااح نفسياً ( بالنسبه لي ارتاح بالمملكة اكثر ) الحمدلله على سلامتك ونورت الدمام يالغالي |
| الساعة الآن 05:38 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by