يوم المزارع
 

بداية ماادري اذا هذا المكان ام لا ..لكن الحمدلله الحين المشرفين كثار محللتكم انقلوه للي تبون :)
..............
امس لقيت في مطبخنا انواع واشكال من الخضار وافره جدا كميات من زمان عنها ..
وتساءلت عن السبب فجات الاجابه انه يوم المزارع <--حسيت انه موضوع في كتاب القراءة حق ولدي :)
يوم المزارع يقام كل خميس في اسواق الشمال في الرياض فكرته حلوة واسعارهم زينه

لايفوتكم الخميس الجاي ان شاءالله

وش يوم المزارع ؟؟؟؟؟
هل يقصد به
انهم سمحوا للمزارع بالبيع مباشرة للمستهلك :)
إذا كان كذا فهذا عيد عند كل مزارع

هلا جمرة غضا ..بالضبط مزارعين من المزارع حوالين الرياض يبيعون مباشرة للمستهلك

الله يفرح قلبك ام العيال مثل ما فرحتيني

مساكين والله المزارعين مهضومه حقوقهم بالمره

مشكوره اختي الله يجزاك خير واللي اقترح هالفكره ونفذها

بلورة هلا بك ..ايه والله انها فكرة زينة عاد دورنا حنا نشجعها

والله فكرة حلوة
المزارع ما يحصل حق تعبة من زراعته

مشكورررررة يا أم العيال

شيء رائع جدا
الأكيد أن الأسعار راح تكون منافسه جدّا .. لأن بالسابق المزارع بيع للشريطي بربح قليل والشريطي يبع للمستهلك بسعر عالي !!!
ياليت نشجعهم وندعهم بالشراء منهم مباشرة
ونتمنى من البلدية أن تعمم هذه التجربة على بقية الأسواق المركزية

والله ياليت يا ام العيال

نعم كلامك صحيح وانا زرت السوق
والمزارعين يبيعون مبااااشره في السوق كل خميس
والاسعار حلوه جدا ومنافسه قويه

شكرا للجميع

يوم المزارع سبق وزرته قبل ثلاث اسابيع تقريبا وكانت اسعاره عاديه ومافيها رخص ولقيت جرم الجزر الكبير يبيعونه بعشرين ونص الجرم يبيعونه بعشره ولما طلعت من السوق وانا شاري نص جرم لقيته بالمحلات ارخص من سعرهم بالسوق
مريت على البائعين بسوق يوم المزارع وسألت احدهم عن الاسعار لقيتها نفس السعر ما تغير شي وكانوا شباب باين عليهم من البائعين على الارصفه وسألته انت مزارع ولا تاجر شلون اسعارك كذا ورد علي انه تاجر واشترى البضاعه من صاحب مزرعه

يعني المشكله قائمه لآن المزارع يبي يبيع بالجمله ولا يبي يبيع بالمفرد وكل بضاعه ترجع معه بعد نهاية السوق تعتبر خساره عليه وبنفس الوقت مريت على مسئولي البلديه ونقلت لهم ان البائعين تجار مو مزارعين والاسعار مثلها يعني ما يبيلك تمشور نفسك من شرق الرياض لشماله عشان تلاقي نفس السعر ومافيه مكاسره ابد وهنا الفرق بينهم وبين اهل المحلات الي تكاسرهم ويكسبونك بالسعر

ولكن المشكله موظفي الامانه في يوم المزارع ما عندهم تسعيره يطبقونها على البائعين وكل واحد يحط السعر الي يبيه ومن هنا اصبح حضور موظفي الامانه شكلي وبرستيج فقط

على العموم انصح الجميع اتباع طريقة شراء كيلو واحد يشمل اصناف الخضار ما عدى الطماطم والخيار والجزر

انا اشتري كيلو مشكل خضار بخمسه ريال يبقى معي اسبوع بحكم اني ما عندي بالبيت الا زوجتي

بكذا آكل طازج كل مره ولا يروح شي للبلديه لأن الشراء بالكميات نهايته برميل الزباله تكرمون

شكرا لكِ ام العيال وتوقيع جميل جدا جزاكِ الله خيرا