يوميات أبوعلي
 

بالانتظار يا ابو علي

يوميات أبوعلي ج 2
 

بسم الله ولجنا وبسم الله خرجنا وعلى ربنا توكلنا اللهم إني اسألك خير المولج وخير المخرج .

ياأم علي.. ياولد..
السلام عليكم ورحمة الله وبركاته
انتم فوق أو تحت , ياناس ردوا

لاحول ولاقوة إلابالله العلي العظيم . من يوم ماجا الانترنت وحنا متفرقين لانجتمع على طعام ولاشراب كلن مسكر غرفته وماغير مقابل الشاشة . ماصارت والله حاله .


اشوى هذي أم علي

أم علي : نعم وش عندك ؟

أبوعلي :ابد حبيت اتعرف عليس
أم علي :هههههههههههه , الله يرحم ايام زمان , ماتترك حركات الغزل .
المهم وديت الثلاجة والغسالة ؟
أبوعلي :ودينها ,والفرن مواعديني الفني اليوم
أم علي :تكفى لاتنسى الميكرويف
أبوعلي :لاتخافين بعد شوي اصلحه من محل التبريد القريب عندنا في الحارة.
أم علي :بغيت شي ء ؟

أبوعلي :لامشكور ؟ وين العيال؟
ماشوف احدمنهم .
أم علي : شغالين مناوبة ؟ناس تقوم وناس تنام على الانترنت ؟
أبوعلي :شغالين حراس أمن!؟ وش هذا الكلام مايصلح . شوفي حل مع سهرهم.
أم علي : أنا ولانت , انت ابوهم ويخافون منك .
أبوعلي : اصبري ابشوفهم .
طق طق طق , افتح ياعليان
علي : نعم
أبوعلي : ياوليدي افتح الغرفة عشان ادخل , ممكن
علي : نعم , تفضل .وسكر الباب لايطلع الهواء بسرعة تكفى لايضيع وقتي .
أبوعلي : ياوليدي وش هذا غرفتك ثلج وش رايك احط عند راسك ماء تشرب تبل ريقك 24 ساعة متسمر على الشاشة , لانشوفك لاغداء ولاعشا, حتى الصلاة مقصرفيها
على : ايزي , وش المشكلة ؟ انا اعرف مصلحتي .
أبوعلي : المشكلة كبيرة الله يصلح حالك وقليبك , تضيع الصلاة وتضر جسمك , وضيع دراستك , ابوك يحتاجك امك تحتاجك .
علي : هذي مشكلتي , وبعدين تارك اخواني كلهم وجاين عندي تنصحني
أبوعلي : ابي مصلحتك وبعدين انت قدوة لهم .
علي : سم ابشر , في شي ثاني ؟
أبوعلي : فيه ؟ الكهرباء اذا طلعت من الغرفة سكرها امس حصلت مكيف غرفتك شغال
علي : صح كان عندي ضيوف سهرانين في الملحق نشوف مبارة اليوفي والانتر , ونسيته .
أبوعلي : مانسيته ياوليدي , كل مرة اروح وسكرالمكيف بنفسي ومكيفات اخوانك .
هذا الحال مايصلح شف لك حل .
فاتورة البيت 650ريال
علي :طيب ابي فلوس
ابوعلي : هذا الفالح فيه , قبل اسبوع توني معطيك 300ريال ,ولاتنسى ان الجامعة تعطيك 850ريال وين تودي الفلوس ؟؟؟ قلي اشرح لي ؟
علي : صرفتها بالسيارة , تضليله وزينه وركبت مراتب جلد .
أبوعلي : انت صاحي , ياوليدي ,حرام عليك , حنا مانغرف من بحر , خف رب العالمين .
علي : انت , تبي تعطيني ؟ ولادبرت عمري .
ابوعلي : وشلون دبر عمرك ؟ تسرق ولاتسأل امك تعطيك .
علي : هذا عاد شغلي , ولاجيت اسألك صفقني . تجيبونا ولاتصرفون علينا تبونا نضيع , وين التربية؟ موب انت مزعجنا كل شوي التربية الصلاة وفاتحن اذاعة القران وقناة المجد
وكل ماجينا ندخل ونطلع صلوا صلوا وتسألني صليت وفي اي مسجد؟؟؟ يعني مافي ثقة .

أبوعلي : لأني ماشوفك في مسجدنا تصلي .
علي : صلاتي لي .وكم مرة قلت لكم هذا الكلام
أبوعلي : بس تترك مسجدنا وتروح تصلي مسجد ثاني ليش ؟؟؟

علي : بالعربي جماعة مسجدنا ملاقيف , ويسكرون المكيفات , والامام مدري وش يبي يطول في الصلاة
ابوعلي : الامام يبي الخير لنا .
علي : نسيت اقول شي ء؟سيارتي فيها صوت, مدري وشو؟
ابوعلي :صوت مسجل يمكن ماسكرته.
علي : ههههههه . حلوه , صاير تنكت ,
ابوعلي : وش الصوت اللي فيها ؟
علي : مدري الظاهر صوت الفحمات او المكينة يبي لها خرط.
ابوعلي : وش جاب المكينة للفحمات ؟ وجع يوجع العدو سيارتك جديدة مالها الاسنة والله لو انك تكد عليها .
علي : المهم علمتك .
ابوعلي : طيب لاتمشي عليها ودها للورشة يكشفون يشوفون وش فيها .
علي : اليوم , ماني فاضي , ابروح عندي تجمع في التحلية استعراض .
وبعدين طالع للملعب مبارة الشباب والاهلي , وفي الليل متواعدين نشتري ملابس من محل في العليا يبيع بدل فخمة ماركات واتعشا وبعدين ارجع بدري قبل الفجر , اوكي
أبوعلي : عرفت الفلوس اللي طلبت مني وين تروح .


يتبع غدا ,,,

و الله أعجبني أبوعلي ...

باله واسع و أخلاقه رياضية..

لو أنا مكانه كان سطرت الولد على وجهه من أول رد.

ههههههههههههههههههههه

تهاويل ابو علي ...

الله يعينه ويصبره ..

الا اقول وشلونك ابو هشام وش اخبارك ... لا يصير هشومي من ربعه

هع

الله يستر على هشومي ... لسه ماجاه الدور ..

الله يعيننا بس على حسن التربية.

ههههههههههههههههههههههههههههههههههههه


الله يعين على هالعلي .....

لو انه ولدي يا ابوعلي كان عطيته تأشيره نهائيه لأقرب .............

اكرمكم الله

يرفع الضغط الا يجيب كل مرض .. الله لا يبلانا بمثل هالعلي ..

كمل كمل ...

نشوف اخرتها معه

:lol::lol::lol::lol:

أكمل :thumbsup:

ج 4

علي : الوو, يبه, تسمعني ؟ اقول 3500 ,بسرعة تعال , الهندي حاجز سيارتي .
لازم تجي الحين تكفى يبه.

يقوم أبوعلي فجأة من صوت السيارات
أبوعلي : حسبي الله ونعم الوكيل , مادافع الله كان اعظم , صدق من قال يجي من صلبك مايلهد بطنك ,يوليدي انت غشيم , ولاتنكة , اصبر شوي وانا عندك , لا الأمر ماينسكت عليه أبد .

يركب السيارة ويذهب للورشة ويتصل على ولده

ابوعلي : طووووط, طوووط , الخط مشغول , جالس يكلم واحد من ربعه وتاركن على الخط
ازهم مرة ثانية يمكن يرد علي طوووط طوووط مشغول

وجع يوجع العدو .

طوط طوط طوط ياوليدي رد ماصارت والله حاله

اكيد جواله خربان ولافيه بلا

طوط رد الولد

أبوعلي : يا وليدي وراك ماترد
علي : مادق عندي , متى اتصلت عليّ اصلا
ابوعلي : الشبكة مشغولة ولاتكلم ؟المهم وين الورشة
علي : شفها اول ورشة على اليمين .
ابوعلي : اول ورشة !!!كلفت على عميرك ياوليدي
علي :يبه لاتفلسف , هذا موب وقته , تعال ذبحتني الشمس .
ابوعلي : طيب انا عندك اطلع , انت جو الورشة
علي : لا انا في غرفة الاستقبال
ابوعلي : السلام عليكم ورحمة الله وبركاته
علي : وعليكم السلام , جب الفلوس يبه
ابوعلي : تو تقولي ذبحتني الشمس , وانت جالس عند المكيف ومبسوط , والعمالة يلعبون بسيارتك
علي : والمطلوب ,وش تبيني اسوي , عساك تبيني اشتغل معهم ميكانيكي ولاسمكري ولاكهربائي
أبوعلي : اقول منتب كفو , هذي للرجال مهوب لك واشكالك .
علي : الله يسامحك , يعني انا ماانفع , قلها , عادي مايهمني .
ابوعلي : ياصبر ايوب على بلواه , رح ازهم العامل اللي زين سيارتك.
علي : صديق تعال , سرعة
الهندي : اهلين , مين ابوعلي .شوفتوا سيارة
ابوعلي : لاماشفتو سيارة , وينها
الهندي : شويه يجي .
ابوعلي : وين راحت السيارة ؟.
الهندي : هذا ميكانيكي روح مشوار هو لازم شوف سيارة صوت يروح ولامافي روح لومافي روح لازم غير قطع غيار تاني .
ابوعلي : راح بطنك من عالوقه , انت مجنون .
علي وشلون تتركهم ياخذون السيارة , ياوليدي الناس هذي ماينفع نثق فيها ابد , تسلمه الموتر وتتركه يروح عليها . حسبي الله ونعم الوكيل ولاحول ولاقوة الابالله العلي العظيم .
الهندي: صبر ,شويه مافي تأخير ممكن نص ساعة بعدين نفر يجي .
علي : صديق كلم شوف نفر بعيد ولاقريب .
الهندي يكلم صديقه بالهندي
"كهال هي لو قرم روتي "
بالعربي
" السلام جب معك خبز حار وانت جاي "
ابوعلي : ياصديق مرت نصف ساعة , هذا نفر يجي ولا لا؟؟
الهندي : انا اتصال هو في يقول طريق زحمة كتيير
ابوعلي : امرنا لله , ابعد ياعلي ابجلس على الكرسي.
الهندي : ايوه , الحمدلله , نفر يجي.
ابوعلي : وين السيارة ؟

يفتح باب السيارة ويشاهد الغبار ودهن العمال على القزاز والقير والدريكسون "الطارة" والاوراق منثورة على الأرض . والدرج مفتوح .
ابوعلي : شفت هذا الي انا خايف منه
علي : وش السالفة ؟!
ابوعلي : وجع انت ماتشوف شيء
علي : اشوف السيارة تشتغل مافيها شيء, يعني بيه لو فيها شي ءكان ماتشتغل .
ابوعلي : اقول , انت غبي , يوم تجيبها عنده تشتغل ولا لا ؟؟!
علي : تشتغل
ابوعلي : نظيفة ولامثل الحين؟!
علي : اكيد نظيفة
ابوعلي : اغراضك مسكر عليها ولامنثورة؟؟
علي : وش قصدك , يعني السيارة ملعوب فيها؟
ابوعلي : لاوالله ما اقول الا الله يعوضني خير فيك
ياربي لاتغضب عليّ .
علي : يبه , هذا مهوب وقت الدعاوي , الله يرحم والديك , عط الفلوس للهندي مليت من الوقفة من الساعة 12الظهر وانا عندهم وتبي تجي 1 وانا ناقع والأغراض المنثورة بعدين نتفاهم عليها.
ابوعلي يخاطب الهندي
ابوعلي : صديق كم حساب ؟ وين فاتورة ؟
الهندي : خلاص انا في اتفاق سو سو ولد انت
ابوعلي : مافي مشكلة , جيب الفاتورة فاتورة اصلاح وفاتورة قطع الغيار
الهندي : ايش فاتورة ؟ يعني انا حرامي ؟!!
علي : يبه , مايحتاج الفاتورة .
ابوعلي : اقول انطم ولاتكلم سمعت ولا يجيك شين ماشفته .
الهندي : فاتورة ورشة كثييير كيف انا معلوم فاتورة انت ؟؟
ابوعلي : هذا مهوب شغلنا . شغلك
الهندي : شوف صديق معلوم انت نفر كويس ميه بالميه
انا اقول لازم سوي خصم كويس حق انت , خلاص آخر شي 3000ريال , ايش قول ؟
علي : ممتاز , شكرا صديق , شفت يبه الرجال محترم وعلى نياته.
ابوعلي : اقول لاتلقف , خلنا نشوف وش عنده , الدعوى مهيب فوضى .
الهندي : شوف صديق فاتورة مافي انت يبغا يدفع فلوس ولا مايبغا؟انت مزاج
ابوعلي : شفت ياعلي , ماعنده فاتورة
الهندي : مافي مشكل اناروح دور قريب ممكن حصل فاتورة.
يذهب الهندي لزميلة من نفس الجنسية ويكتب له فاتورة مزورة ويسجل فيها 2500ريال قيمة قطع الغيار .
الهندي يجي ويدخل الورشة وينادي وهو مبسوط ابوعلي انا حصلته فاتورة .
ابوعلي : ماشاء الله زين ورنا نشوف .
يستلم الفاتورة من الهندي ويشاهد تاريخ اليوم مسجل .
الهندي :جيب فلوس .
ابوعلي : فلوسك تاخذها من الشرطة .
علي : يبه , مايحتاج تسوي مشاكل وتفشلنا , والله لوني داري كان ماتصلت عليك . هذا اللي ناقص نتجرجر بالشرط عشان موضوع تافه .
ابوعلي : اقول ياسفى بتربيتي لك , هذا كلام عاقلين ؟! الحين ماتشوف الرجال انخبص وتورط الفاتورة جديدة ياخبل قلي وشلون يطلب منك مبلغ بدون فاتورة
علي : يمكن الفاتورة ضايعه وطلع جديدة .
ابوعلي : يمكن , ويمكن بعد نزلت عليه من السماء
اقول ياصديق اركب .
الهندي : فين ودي انا ؟
ابوعلي : للملاهي , يعني وين الشرطة.


يتبع غدا ,,,

يوميات تستحق التقييم بخمس نجوم
استمر يا أبو علي

و الله و طلعت منت هين يا أبوعلي... :thumbsup:


أسلوبك القصصي يذكرني بعضو قدييييم كان معنا من فترة.. :blush:

الله يذكرك بالخير يا طفران بن فقران. :wounded1:

ج 5

ابوعلي يخاطب الهندي اقول ياصديق اركب .
الهندي : فين ودي انا ؟
ابوعلي : للملاهي , يعني وين الشرطة.اركب
الهندي : صديق انا اركب ورا ولاقدام ؟
ابوعلي :اركب بالشنطة .
الهندي :مافي مشكل صديق .
علي : يبه وش ذا الوحشية , انا ماعندي استعداد اركب , اخاف الفشيلة
ابوعلي : خذ ليموزين ورح عند امك , مع السلامة .
الهندي بدأ يتصنع البكاء اه أي اه أي ييييه
الهندي: صديق , شوف انا مايبغا مشاكل , مايهب شرته . انت نفر كويس .
ابوعلي : وش رايك تنثبر .
وعند باب الشرطة يستقبل من جندي البوابة
الشرطي : وش عندكم ؟؟
ابوعلي : ابد سلامتك , هذا الهندي نصب علينا , ويطالبنا بقيمة اصلاح السيارة وهو مااشتغل فيها.
الشرطي : والمطلوب ؟
ابوعلي :نقدم شكوى و نقابل الضابط .
الشرطي : تفضل .
ابوعلي : شكرا, بيض الله وجهك , امش ياصديق
الضابط : نعم , وش عندكم , هاتوا البطاقة والاقامة نسجل محضر .
ابوعلي : هذا الهندي نصب علينا ويبنا ندفع 3000ريال
ويدعي انه صلح السيارة ويوم طلبنا الفواتير ماحصل شي ء راح و جاب فاتورة جديدة من واحد يعرفه .
الضابط : صحيح ياصديق .
الهندي : من يقول كلام هذا؟ انا مافي حرامي .انا مسلم
ابوعلي : ياحضرة الضابط , ان كان كلامه صحيح الله يرحم والديك قل له يعطينا القطع القديمة , ويعلمنا من وين اشترى القطع الجديدة .
الضابط : صديق , فين قطع غيار قديم , فين انت ودي ؟؟
الهندي :" وهو يبكي خائف" مافي معلوم .
ابوعلي : ياحضرة الضابط لايغرك , تراه نصاب نمره واستمارة
الضابط : كلم صديق انت خله يجيب قطع الغيار القديمة .
الهندي : صديق انا في نوم . انا مافي حرامي.
الضابط يصك الهندي بطراق " مخمس على وجه" ويوم اعتدل صفقه مع فرخ الهامة
ونادى ياعسكري خذ وده للتوقيف . جاء العسكري جلف زنوده يوقف عليها الصقر , شد الهندي تعال امش
ابوعلي يوم شاف التحقيق والضرب مع الهندي بدأ عليه التأثر ورحم الهندي .
ابوعلي : حضرة الضابط ,انا بالنسبة لي متنازل , بس يرجع السيارة لنا , ويعلمنا الحقيقة .
الضابط :الحقيقة تعرفها بكره ان شاء الله .
ابوعلي : يعني الهندي ينام عندكم .
الضابط : ودك تجسره يمكن مايجسر"تجلس معه تونسه "؟
ابوعلي : لا ياطويل العمر , ماتحملناه برا نتحمله ببو زعبل "السجن" خله عندكم , الله يبارك فيك.
الضابط : اجل وقع على المحضر.
ابوعلي : والسيارة ياطويل العمر , متى ناخذها؟؟
الضابط : تونا , بعد التحقيقات ان شاء الله .
ابوعلي : وش دعوى الله يطول عمرك ,عادي اروح انا والشرطي ونجيبها . والهندي يطلع بكفالة .
الضابط :. ياخوي وش جابك عندنا هذي شرطة مهيب تموينات ! امسك الباب وراجعنا بكره مكتب 9, الساعة 11بعد الظهر, ولايكثر كلامك زين .
ابوعلي : سم , ابشر ياطويل العمر ابشر .
يركب ابوعلي سيارته وبدأ يهوجس , وش سويت يابوعلي , تلقى الشرطي يمحط الهندي محط , يويلي عسىاهم يعطونه اكل زين .
ماش قلبي يدق وبطني يعورني اخاف ظلمت ابوهنود .
وبعد ساعة وصل البيت يلبق ويدخل :بسم الله
ابوعلي : السلام عليكم ورحمة الله وبركاته. ام علي يا ام علي
ام علي : وعليكم السلام, هلا , شف كم الساعة معك ؟
ابوعلي : 3 العصر , مارحنا نلعب الله يرحم والديك , الولد جاء للبيت ؟
ام علي : من زمان , شفه نايم بالغرفة .ليش وش فيه ؟ عسى السيارة صلحت ؟
ابوعلي : السيارة مافيها الا العافية , الولد والهندي هم اللي يحتاجون تصليح . ولدس مهمل ولايعرف مصلحة نفسه والهندي نصب عليه وشكله لوتركته يبي ياخذ ولدس قطوعه كل يوم يلعب عليه .
ام علي : اللهم صلي على محمد , وش دعوى , الظاهر انك شايل على وليدي
ابوعلي :وش انتِ شايفه؟
ام علي :خلنا ساكتين احسن .
ابوعلي : هوقايلس شي ء؟ لاتصدقينه .
ام علي : يابوعلي , انت رجل عاقل , وهذا ولد سفيه وطايش .لازم تصبر عليه , وبعدين الظاهر انك ماشفت عيال الناس , والله وحده اعرفها تقول ان الولد يرد على ابوه ولايرجع الا انصاف الليول "الليل" وحده ثانية تقول عيالي مايجون الابعد يومين اوثلاثة
جالسين بالاستراحات مانعرف عنهم شي لا انا ولا ابوهم . واسمع ذي تقولي ولدي يجي وريحة ثيابه شيشة ودخان تفوح.
شفت وليدنا وش زينه بس يسمع اغاني وعنده الدش في الملحق ومرة اومرتين يروح للتحلية مع ربعه واذا صار مبارة في الدوري يروح الملعب من صلاة الظهر عشان يحجز مكان ويشجع زيه زي غيره . ويوم في كل شهر يروح الشرقية ومرة في المزاحمية عنده تجمع يستعرضون بسياراتهم .
اقول احمد ربك يابوعلي .
ابوعلي : الحمد لله على كل حال , اسمعي يا ام علي ماعلينا من الناس , علينا من ولدنا , وذا صار يروح مع ناس مانعرفهم ولانعرف اخلاقهم يبي يصير اشد من عيال الناس .لكن اركدي وشدي عليه , انتِ شدي وانا ارخي واذا ارخيتي ترا ابشد عليه , وتكفين لاتعطينه فلوس , انت عارفه ان كثره الدراهم مع الولد تضره وتعوده على الفسق والدلع ويبدأ يتكبر عند ربعه .
يكفي اني شريت له سيارة مايحلم بها , الناس تشتري لعيالها عراوي وكورولا واكسنت وبقرة " مازدا" وانت عارفه وش شاري له لا واللون اسود حسب طلبه , اقوله ياوليدي الاسود شبه , يقول لا الاسود هو اللون الشبابي , ويوم وصلنا للمعرض ابي صاحب المعرض يصير بصفي فشلن و قال ولدك معه حق ,هذا موديل السنة
تدرين ليه ؟؟ عشان يصرفون بضاعتهم ولايبقى هذا اللون عندهم فايض و عارفين ان اللون هذا مايسوى شي ء عند البيع .
أم علي : سم, ابشر, يابوعلي , مايصير خاطرك الاطيب . الله يخليك لنا ويحفظك , انت ابخص ,تامرني على شيء " تبي تفتك منه"؟
ابوعلي : مايامر عليس عدو , جيبي مويه من البراده نصفٍ حار ونصف بارد , الله لايهينك ولايحرمني منس .
أم علي : وش دعوى تراها مويه , او انت شايفٍ شي ء منا ولامنا؟؟! مبطين ماسمعنا منك كلام زين .
شف لاتجلس تلف وتدور , تبي تاخذ دش هذا الحمام عندك , لاتورطني معك !! فيني سخونة وانت عارف وش جاني برمضان يوم اقول لك شد المئزر , وانت تسفهني , وانا حرمة مسكينة , بس ما قول الا الله يرحمني برحمته.

ابوعلي : اولا الله يرحمنا برحمته , الشي الثاني يابنت الحلال ماشفت شي ء, توني جاي من الورشة كلها هنود وعمالة , هذا ابوي الله يرحمه هو اللي كان يحلم بالزواج من هندية " الله يرحمه "
أم علي : الحمدلله ان حلم ابوك ماتحقق , لكن خذ الماء اشرب بالعافية .
وفجأة يدق هاتف المنزل ترن تررررن ترن .
يتبع غدا ,,,

مملوح ماقلنا شيء.

لكن محامي ومستشار قانوني برضه ماقلنا شيء

"اخوك الصغير ابوعلي يتعلم منك "

ج6


ابوعلي : نعم , من معي ؟
المتصل : الوو, "صوت نسائي ", الوو , سلام عليكم ورحمة الله وبركاته ,لوسمحت اخوي ممكن اخذ من وقتك شوي
ابوعلي : ايش , أم علي , شوفي الظاهر انه صوت http://t0.gstatic.com/images?q=tbn:9...g97rbe.jpg/jpg .
المتصل :الو , اقول يااختي , ممكن تسمعيني الله يجزاك بالخير.
ام علي :تفضلي .
المتصل: انا , وانا اختس سعودية فقيرة مسكينة من اسرة معروفة بالرياض , ام ايتام وزوجي توفي و ماله تقاعد ,ساكنة في بيت http://t1.gstatic.com/images?q=tbn:n.../media/4/8.jpg وسط البلد ,و بجنبنا بيتنا عمال باكستانيين عزوبيه . والحال مايعلم بها الا الله
ام علي : من سمح لهم يسكنون ؟؟
المتصل : تكفين اسمعي مني ولاتقاطعيني لين اكملس قصتي .
ام علي : كملي , كملي , انا اتوحى http://t0.gstatic.com/images?q=tbn:w...ing-144759.jpg

المتصل : تصدقين ان بيتنا مافيه مثل بيوت الناس , والله مانذوق http://t0.gstatic.com/images?q=tbn:X...d19ad82c_t.jpgالا من العيد اليه , ولولا الله ثم صدقات المحسنين
برمضان كان رحت انا وبنياتي الخمس ووليدي الوحيد نشحذ بالشوارع عندhttp://t1.gstatic.com/images?q=tbn:Z...TrafficVH1.gif, وفي مرة من المرات قلت اروح اشتغل عند حمولة سعودية الله منعم عليها اترزق الله وحط البنات بـhttp://t3.gstatic.com/images?q=tbn:Q...86ef6d08_t.jpg , تخبرين البنات اخاف عليهن من الخطف وأصحاب http://t1.gstatic.com/images?q=tbn:n.../7/yellow2.png .حتى لو نفخوا عليّ اللي اشتغل عندهم وتفلوا بوجهي قابله ,ولوتشوهت سمعتي المهم اجيب لليتامي العيش .
ياختي حنا ناس متعففين ولولا الحاجة مزهمت عليس , اذا عندس بقايا http://t2.gstatic.com/images?q=tbn:o...13366_1395.jpg

او http://t1.gstatic.com/images?q=tbn:S...593ca13d_t.jpg اجي اخذهن منس ,لاتنسيني حطين على بالس , الله يرحم والديس ويدخلس الجنة.
ثم سكتت فجأة وجلست تبكي بحرقة وصوت مبحوح يقطع السبد.
وسكرت http://t0.gstatic.com/images?q=tbn:l...1139317118.jpg

ام علي : وهي متأثرة جداا, لاحول ولاقوة الابالله العلي العظيم , انا لله وإانا اليه راجعون ,عليس بالصبر, والدعاء , الله يفرجها من عنده , اطلبي الكريم .الله ماينسى عباده , وماتضيق الاتفرج .
الو لووو, الظاهر انه طبقت السماعة .
ابوعلي : وش السالفة يا ام علي ؟؟
ام علي :المشكلة اني ماسمعته زين , تقول انه محتاجة وام ايتام وساكنه بالإيجار,
وجلست تبكي وسكرت التلفون .
ابوعلي : طيب ماسجلتي رقمه بــــhttp://t2.gstatic.com/images?q=tbn:H.../old_paper.jpg ؟
ام علي : يابن الحلال ماجاء على بالي , وهي ماتركت لي فرصة .
ابوعلي : اسمعي يا ام علي انا متاكد انه تبي تزهم ثانيه حطي بالس .
قومي اجمعي له من خلاقين البيت واذكر اننا شارين قطمة http://t2.gstatic.com/images?q=tbn:1...0.imgcache.jpg وكيس http://t1.gstatic.com/images?q=tbn:0...hoto/nmlah.jpg اول مارفعوا الاسعار, روحي انت والشغاله نزلوهن بالحوش مع الثياب .


ام علي : صدقت يبوعلي , لازم نتصدق وندفع البلاء عنا وعن عيالنا , الواحد يجمع الدراهم ومايدري يمكن يجي وقت يجمعون لحمه وعظامه http://t2.gstatic.com/images?q=tbn:_...735_p49841.jpg

ويحطونه بـhttp://t3.gstatic.com/images?q=tbn:F..._1148504377jpg ماعنده انيس الا عمله من http://t3.gstatic.com/images?q=tbn:B...loads/vbxh.gif

او قراءة http://t1.gstatic.com/images?q=tbn:F...a/19/Quran.jpgاو http://t3.gstatic.com/images?q=tbn:d...4/7/qalil2.jpgاو http://t0.gstatic.com/images?q=tbn:a...cal.387784.jpg
ابوعلي : لا, واذا مات الواحد توازعوا قروشه و نسوه , والجيد منهم يقضي دينه .
ام علي : اخاف ماتجي ؟؟
ابوعلي : جاس الشيطان , بدا يوسوس لس , الحرمه محتاجه . وماطلبت دراهم , طلبت اكل وملابس .


ام علي :اجل ابروح ازهم الشغالة تنزل الارزاق من فوق , ياتوتو ... توتو.....
تعالي نزلي الرز والسكر من المستودع وحطيهن بالحوش .
ابوعلي : روحي لاتحط http://t0.gstatic.com/images?q=tbn:0...ap/ghar/s1.jpg ولا http://t0.gstatic.com/images?q=tbn:M...c280389oq2.jpg ترا عيالس عايشين عليه .

ام علي : اللهم صلي على محمد , وش ذا الحرص توتو ماتعرف الاندومي من الرز ؟؟ لاتخاف عليه .

ابوعلي : تخبرين الكراتين فوق واجد , واخاف تلخبط .


مير افتحي http://t3.gstatic.com/images?q=tbn:U.../item10454.gif نسمع اذان العصر , من بعد رمضان كل امامٍ له وقته الخاص الاماشاء الله معتمدين على البنقاليه.

ام علي : ابشر, اسمع هذا الوليد يذن يقولون اسمه دغريري من جيزان ليته زوج لبنيتي عالية .

ابوعلي : اسكتي خلينا نتوحى الأذان .

وبعد الفراغ من الأذان وذكر الله ..

ابوعلي :مع السلامه قومي العيال للصلاة لاتخلينهم .

ام علي : وانت ورا ماتقومهم , ولا حنا نخلف ونتعب , وكل شيء علينا حتى http://t2.gstatic.com/images?q=tbn:8.../509785147.jpg نسلمه لكم آخر كل شهر ,
قلي وش دورك بالبيت؟؟! لاتروح الاوانت ماخذهم معك .سمعت ؟؟

ابوعلي : مع السلامة نتفاهم بعد الصلاة , ولاتنسين العيال .

يدخل ابوعلي http://t2.gstatic.com/images?q=tbn:u...zjejmos197.jpg بدون عياله يجلس في طرف الصف الاول ويؤدي تحية المسجد, وبعد الانتهاء من الصلاة يسمع اثنين من جماعة المسجد يتهاوشون


الاول : يااخي كان ماتبي http://t2.gstatic.com/images?q=tbn:D...onditioner.jpg حنا نبيه.

الثاني : الجو تغير , ولا له داعي ترفعون التكييف .
والله اني اوجس البراد http://t3.gstatic.com/images?q=tbn:4...ine0204003.jpg , حسبنا الله ونعم الوكيل
الاول : المهم شف لك ثوب صوف ولا يا اخي لاتصلي معنا , المساجد واجد .
ترانا خسنا حر.
يقطع الكلام صوت http://t2.gstatic.com/images?q=tbn:Y...img/172739.jpg يقيم للصلاة .


يتبع غدا ,,,

بكرى نبغى تكملة القصة عبر الفديو

تامر امر وتاكل حلوى بالفستق والتمر

ج7



يقطع الكلام صوت المؤذن يقيم للصلاة
يؤدي ابوعلي الصلاة ويخرج الى البيت ويدخل على صوت ام علي تهاوش عيالها
ام علي :يروح ويتركني مع عياله , وانا ماغير اقوم الاول وروح اقوم الثاني ارجع للاول احصله يشخر من النوم
ماصارت , انا طفشت . اسمعوا ثلاث عدات مافي غيرهن ولاابرش عليكم مويه .
يدخل ابوعلي ويجلس بالصالة رجل على رجل .
ام علي : يااخي ماصارت , لاتروح للمسجد الا والعيال كلهم معك , انت المسؤول عنهم , مو معقول تعطلت اشغالي كن ماعندي شغل الا هم .
خل لك دور ؟؟ حس فيني !!
ابوعلي : حلو ذي , وانا وش انا مسوي , وش ذا الكلام , صراحة غريبة منس يا ام علي , وانا اقول انس الحرمة العاقلة الحكيمة ام عيالي , لا لا فيه شي ء , اكيد احد معبي راسس عليّ , هذولي الناس مايرحمون اذا شافوا واحد مبسوط مع زوجته ومتفاهمين حطوا عينهم عليه .
ام علي : اقول اسمع عاد بلا خرط وضرب فرش ملينا من هذا الكلام خط خطين وامسح الثالث حنا لازم نتفق على امور .
ابوعلي : "بصوت مرتفع جدا " قام منه الأبناء , اللي يسمع كلامس يقول اني ضاحك عليس , ولاصار بيني وبينس عشرة , صدق الرسول يوم يقول عليه الصلاة والسلام عن النساء انهن يكفرن العشير , والظاهر انس معلمة قديمه وتعرفين حقوق الزوج زين.
ام علي : ايه ارفع صوتك سمّع الجيران , من زمان ماسمعوا صوتك , انت ناسي كل اللي قدمته نسفته نسف , خلاص البيت باسمك وسيارة جديدة معك .وش يهمك , تقدر تكرشني انا وعيالي في أي لحظة.
ابوعلي : وش دعوى , ليه انا مااعرف الاصول , بعدين وش المطلوب اسويه؟؟
ام علي : نتفاهم .
ابوعلي :على ايش نتفاهم ؟؟
ام علي : اولا العيال مسؤوليتك مالي علاقة بهم .
ابوعلي : والبنات ؟؟
ام علي : ماعليك منهم .
ابوعلي : موافق , خلص كلامس ؟
ام علي : باقي , تكتب نصف البيت باسمي .
ابوعلي : معصي ,والظاهر انس انجنيتي . فوقي لنفسس ,خلاص اكثر من كذا ما عاد اتحمل .
ام علي : وليه اسم الله عليك , عسى ما انت مريض , انا ماطلبت الاحقي , بعدين نسيت مواعيدك لي يوم تروح للمحكمة وتقول " اوعدس ياعمري اني اذا عمرت الارض اكتب نصفها باسمس " ولاالواحد مو قد كلمته .
ابوعلي : وشلون انا ماني رجال عند كلمتي صحيح ماتربيتي ؟؟!!
ام علي : انا اللي ماتربيت ؟؟ واخذت تبكي ؟؟
ابوعلي : صيحي من اليوم الى بكره , معروف هذا الاسلوب , هذي نسميها دموع التماسيح , وانا انصحس لوجه الله انس تعقلين وتهتمين بنفسس وعيالس واتركي عنس السوالف والهواجيس وكلام الحريم اللي لايودي ولايجيب , ولاودي اضرس صعبة ام عيالي
ام علي : وش بقى , كمل , اصلا ظهرت على حقيقتك . انت انسان اناني وما تحب الا نفسك ,نسيت وش كنت يوم تاخذني من بيت اهلي ؟؟ ولا اذكرك ؟؟ عيشتني المر والفقر وصبرت عليك , يا اخي اعتبرني شغالة .
ابوعلي :وهو غضبان " اسكتي احسن لس " , الظاهر الأدب ماينفع معس .
ام علي : مقاطعة بشدة , وش ناوي عليه هذا الناقص , تبي ترفع ايدك عليّ , قم عطن طراق ورن اشوف .
ابوعلي : ملتزم الصمت .
ام علي : عطن قم قم عطن ان كانك رجال!!
ابوعلي يصفع ام علي على خدها , وهو يقول اهلس ماربوس انا اربيس , اطلعي عن بيتي , ضفي خلاقينس .
ام علي : وهي تصرخ وتتوعد يانذل ياحقير , ترفع ايدك عليّ , لكن شف اذا ماخليتك تندم ماكون انا بنت ابوي .
ابوعلي :الله يرحمه لوكان فيه ماتطاولتي على زوجس , اقول لايكثر , حرمه ماتعرف قدر زوجه , ماتستحق العيش معه , اطلعي بره ولاتنسين تضفين عيالس , انا ماني ناقص بزران .
ذهبت ام علي للغرفة ودموعها على خدها .وسحبت شنطة سفرها التي كانت تستخدمها اثناء السفر يوم كانت تسافر مع ابوعلي الى مكة لأداء العمرة وزيارة مسجد الرسول صلى الله عليه وسلم , وبدأت تصف ملابسها بشكل عشوائي وزفرات صدرها وقطرات دموعها تبلل كل زاوية من زوايا شنطتها , واخذت تحدث نفسها قالوا لي وانا ما اسمع الكلام اصلا الرجال مالهم امااااان, وين اروح مع بزارين , امي تعبانه وعاجزه عن نفسه واخوي ساكن في بيت صغير عسى يكفيه لا ومن زين نفيسته , واختي مسافره ولا ادري متى ترجع ؟
وين اروح , البيت باسمه ؟ حسبي الله عليه سته حطهم بحلقي . وش اقول للوالدة لو درت يمكن يرتفع ضغطها , وتصير عندي مشكلتين.
احسن شيء اسكت . وادبر حيلة منا ولامنا .دخل علي الغرفة وهو مضطرب , ويبدو عليه الارتباك
علي : يمه , انا شوف انس كبرتي الموضوع , ورفعتي صوتس على ابوي عشان كذا ,, عطاس طررر
وتقاطعه امه
اقول اطلع برا غرفتي , انقلع . لوكان فيك خير كان دافعت عن امك , رح لبوك ينفعك , انت ناسي ان ابوك ياخذ مصروف البيت مني
وفي هذه اللحظة يدخل ابوعلي ويقترب من ام علي ..
يتبع غدا ,,,,

لا لا ياابوعلي .. تكفى الا المشاكل الاسرية والطلاق تراها دمار للبيت .
أنشاءالله في ( ج 8 ) يهدء أبوعلي ويتنازل عن كلامه ويسامح أم علي .
لكن لاتكتب القصة الا وانت متقهوي .

يا ساتر الدعوى طراقات

و الله من جد صاير مسلسل بأسلوب تقفيل القصة في اللحظة الحرجة.

كني أتفرج على مسلسل "لوست" و إلا "24". :)

مملوح :هذا كثير علينا , مانستاهل

ابوهشام :لاتبالغ في الإطراء فقط هي محاولات بدائية جدا.

خالد1: انت عاطفي كثير ا وهذه صفة محمودة , زادك الله علما وأدبا .

والحياة الزوجية لابد فيها من بهارات .

ج 8
وفي هذه اللحظة يدخل ابوعلي ويقترب من ام علي ..ويحاول الاعتذار لها و تقبيل رأسها فتدفعه بشدة
ام علي : ابعد , شايفني ماعندي كرامة .
ابوعلي : يابنت الحلال كلمة وطلعت مني غصبن عليّ , وتعرفين الشيطان حريص .
ام علي : لاياشيخ , حلوه ذي , الظاهر انك نسيت وش قلت .
ابوعلي : خلاص نفتح صفحة جديدة , واللي تبين يصير
ام علي : والله مايهون عليّ , بس عشان عيالي , وتنفذ شروطي
ابوعلي : تفضلي .
ام علي : الشرط الاول : يحضر اخوي وتجلس معه وتوقع على تعهد انك ماترفع صوتك عليّ ولاتحاول تمد يدك .
الشرط الثاني : تكتب البيت كله باسمي فاهم .
ابوعلي مقاطعا لأم علي : إلا البيت تعهد قلنا ماعليش لكن البيت باسمس هذي مهزلة مابعده مهزلة
ام علي : اجل مع السلامة .
ابوعلي : طيب نتفاهم , لاتصيرين طماعة , مثل بعض تجارنا .
ام علي : مافي تفاهم . اقول مع السلامة , رجاء سكر الموضوع .
ابوعلي : امري لله , خلاص ؟
ام علي : الشرط الثالث : تودين للسوق واشتري هدية رضاوه على كيفي , مفهوم .
ابوعلي : انا اللي اعرفه ان الهدية تقدم من الشخص للآخر والثاني مايتشرط اويحدد القيمة .
ام علي : اخاف تشتري لي من محلات ابوريالين .
ابوعلي :بدينا بالغلط , وسوء الظن . المهم اتفقنا ؟
ام علي : باقي الشرط الأخير
ابوعلي : تفضلي .
ام علي : تترك شلة الأنس والسهر معهم يوميا انصاف الليل .
ابوعلي : وش رايس تحطين سجل عند الباب اوقع حضور وانصراف .
ام علي : "وهي مبتسمة" لا السجل مايكفي يقولون في كرت توقيع اسرع وادق ولافيه مجال احد يوقع عنك.
ابوعلي : انا اقول راجعي الشرط الاخير, المراجعة زينه , شوفي مجلس الشورى ماشاء الله عليهم دايم يراجعون الانظمة من سنين .
وسمعت انهم يبون يرفعون القرض العقاري من 300 الى 500الف , ليتهم يجزمون وهذي خطوة للامام والجاي احسن
ويجزاك خير يابو متعب ويكثر خيرك , والتفاؤل شعار المؤمن + ترك الشائعات
الحمدلله :مساعدات للمتضررين بالاندونيسيا ومساهمات خيرية لكافة بلدان العالم على جميع الخدمات حتى الصحية الحمدلله
أي مولود مجتمع مع اخوه نفصله , قولوا آمين يوفق كل من سعى بالخير ونيته لله.
الجميع : آميييين .
ام علي : اقول بلا فلسفة اسكت لاتخليني اتكلم .
ابوعلي :تكلمي , انا قاص لسانس ؟

ام علي :طيب طلعوا بشيء مجلس الشورى؟؟ ودنا ينقصون قيمة الفواتير؟
و يخففون رسوم الجوازات والبلدية والمرور
,و يرفعون مخصصات الضمان الاجتماعي .
و يزودن سعة القبول بالمستشفيات والجامعات .
والماء اشوفه ينقطع ونجلس بالايام نروي من الوايتات .
عندنا مشاكل من بعض الشباب العاطلين تفحيط واستعراضات ومضايقات ونشل
واسأل مراكز الشرطة شف التوقيف عندهم وش سووا لهم قلي ؟
ولا لازم يرطنون انقلينزي وخبرة 5 سنوات عشان يحصلون وظايف.
وين دور بعض الجهات الرقابية مثل حماية المستهلك جلست تلعبنا لعب , تذكر كم جلسوا يلعبون بسعر حليب البزران .؟ والرزوووووووووووو اتكلم ولا اسكت ؟؟!!!
وينهم عن ارتفاع الإيجارات 75% من الشعب ساكنين بإلإيجارات والأسعار نار تلظَّى ؟؟
الواحد اذا بغا ولده يعرس مايكفيه 25 الف لولده ايجار شقة , وشلون التأثيث؟؟!
وينهم عن زيادة رواتب اللي دخلهم محدود؟؟
اكمل ولا اسكت وانطم ؟ انت ماتدفع ؟ انا اللي استلم واصبهن بيدك وانت اللي يجيك من الدكان عساه يصرف عليك وربعك بالاستراحة .
ابوعلي :كملي , نشوف طلعي , الدعوة خربت , الظاهر حطيتي حرتس بمجلس الشورى .
ام علي :
اجل اسمع كم له سوق الاسهم على حالته مصاب بالانفلونزا المستديمة!!!؟؟؟
وكم لها الاسهم العقارية متعثرة ؟اللي اكلت فلوسنا ولاصا ربها شي ء, اقول حسبي الله على من اكلهن حساب شديد يبيد الحديد
وينهم عن تحسين المدارس؟ عيالنا يدرسون بالمطابخ .
وينهم عن الاهتمام بالقطاع الصحي مستوصفات مستأجرة والدواء نشريه من برا .
وياويلك لو احد من جماعتك مريض , انس ماله سرير , ويقولون لو تزهم الهلال الاحمر يرفضون شيله تدري ليه ؟؟
لأن المستشفيات مابه سرير واذا كانه كبير مع الباب الخلفي. شوت
اسأل كم موديل سيارتك؟ ورا مايلتفتون للوكالات نهبوا العالم ؟
والسياحة الداخلية؟؟؟؟؟؟؟
كم قارورة الماء؟ والسكن غالي ومخيس ولاخدمات , وين الوطنية عند تجارنا ورا مايساعدون دولتهم في المشاريع يستفيدون ويفيدون؟
ابوعلي : اقول لوسمحتي , لاتورطينا , بكره يزهمون علينا ويحسبونا ننتقد مجلس الشورى. ورانا عيال .
ام علي : انت اللي فتحت الموضوع , هذا من حر ما اوجس وبعدين متى تبدأ تنفذ شروطي ؟؟

ابوعلي :ماشاء الله عليس مثقفة , انا اقول , يحذف الشرط الرابع .لأنه تقييد للديمقراطية والحرية
ام علي : وش عرفك بالديمقراطية , انت تقرأ كتب من وراي ؟ والشروط تنفذ فاهم ولا اترك البيت لك , انا بخير وراتبي 12500ريال يكفيني واللي يزود نعطيه الجيران .
ابوعلي : بدينا بالمن , اعوذ بالله منكم ياحريم , اسمعي انا موافق بس بشروط .
ام علي : مالك شروط , حلوه ذي, تغلط عليّ وترفع صوتك وتقول عندي شروط .
ابوعلي : اجل عندي حل يرضي الجميع , اجلسي بالبيت ونسوي هدنة مافي احد يكلم الثاني . وانا اسوي اللي ابي وانت سوي اللي تبين .
ام علي : موافقه بس اروح علي كيفي .
ابوعلي : بس تحطين عندي خبر , وش لويقولون صار عليس حادث او احد تعرض لس و حاول احد يخطفس بالأسواق
ام علي: باسم الله عليّ, فال الله ولافالك .
ابوعلي : اتفقنا ؟
ام علي : اتفقنا .
علي وعالية وبقية الأبناء يدخلون وهم متفقين وبصوت واحد مبرووووك تسامحتم امشوا ودونا نتعشى بالمطعم وناكل ايسكريم
ابوعلي : وين تبون ؟
علي : نروح ناكل من المطعم الهندي بالعليا فاخر ونظيف.
ام علي : غالي وحار على العيال والاكل حار ومدكوك شطة وحبحر الهنود الاصلي .
عالية : نروح ماك ؟
ابوعلي : وش ماك هذا مطعم ولاماركة ثلاجة .نروح للفوال والطعمية القريبة بالحارة
يضحك من كلامه البقية ههههههههههههه ,هههه
عالية :ماك يايبه , مطعم وجبات سريعة . الله يغفرلك
ابوعلي : هاه وش قلتوا ؟؟ موافقين نروح للماك
ام علي : اسمعوا بلامطاعم بلاهم انا ابسوي لكم حفلة والتكاليف على ابوكم . وش قلتم؟؟
الجميع موافقين بس متى ؟
ام علي :خلاص بكرا .
ماذا حصل قبل الحفلة ؟
متابعة قصة العجوز؟
اخبار سيارة علي في الورشة؟
يتبع غدا ,,,

ايه والله عورت قلوبنا :060::060:...

كذا بالساهل تكتب البيت باسمها ؟!...هذا دليل حب أبوعلي لأم علي
بانتظار يوم الغد

شايب متخلف دخولك تاج على راسي
خالد1 كل الصحفيين محللين الاماشاء ربك
مملوح بعض الحريم اشد من الف رجل

وللجميع اصدق التحايا واعذبها

يسلم فكرك وأناملك يا ابا علي

تسلسل جميل وروايه من الواقع

تحاكي الحياة الاجتماعيه لدينا

واسلوب رائع في السرد تشكر عليه

استمر ونحن نتابع

لا عدمناك يا بعدي

ج9
ترتيبات الحفلة
ام علي : مشينا جهزي ياتوتو الاغراض ولبس الصغار
توتو: مدام ملابس بيبي موجود في الغسيل
ام علي : غسليهن بسرعة
توتو: طيب مدام .
ابوعلي : عساكم جاهزين ؟
ام علي : وين نبي نروح ؟
ابوعلي : مخطط من المخططات اللي به نور نجلس فيه ونشب ضويه .
ام علي :مايصلح , خذ لنا استراحة نوسع فيها على عيالنا , تخبر يبون حمامات ونطيطات والعاب ومسبح وتلفزيون وسوني ويلعبون بالسياكل ويفرقعون صواريخ .
ابوعلي : ابشري ., ولاتنسين القهوة والشاي.والحركات"المكسرات وشيء يحرك الضرس"
ام علي : لاتخاف , والغداء والعشاء ؟؟ وشلون امره؟؟
ابوعلي : مافي احسن من طبخس يا ام علي
ام علي : طالعين في استراحة وتبين اطبخ وانفخ ؟!!خوش والله
ابوعلي : وش فيها ,انظف من السوق ومطاريز العمالة.
ام علي : كل التكاليف عليّ لاتدفع ولاريال ونعبي بطوننا من كل النعم.ولاناوي تنكد عليّ
ابوعلي : توكلنا على الله .
ام علي : شف اول شيء نبي نمر اختي ام سليمان عياله عند الباب ناخذهم معنا نوسع صدورهم .
ابوعلي : وين اهلهم ؟؟
ام علي : مسافرين .
ابوعلي: اجل مافي وقت اسرعوا
ام علي : وعلى دربك اختي ام محمد عند الدائري مع السواق ضايعين
ابوعلي: ماقلت لي انهم معنا وبعدين وين ابوهم ؟
ام علي : الآن قلت لك وش يفرق ؟ وبعدين يااخي عادي ابوهم في انتداب ونبي نوسع صدراختي وعيالها, انت ناسي يوم تسافر وش سوت؟؟
ابوعلي : طيب , ماصار الا الخير.
ام علي : اسمع اختر استراحة قسمين .
ابوعلي : ليه ماتكفينا استراحة قسم ؟.
ام علي : ماتكفي , فيه ناس يبون يجون بالطريق.
ابوعلي : اقول انت موزعه كروت عليهم .
ام علي :تطنز خذ راحتك .
ابوعلي : ما اقصد بس ماعندي خبر ." قفلت معه"
ام علي : لبق خذ لنا غداء من المطعم
ابوعلي : تبون لحم ولادجاج؟
ام علي :شف وركز معي , ذبيحة ثلاث صحون مفطح نعيمي و10كرتون ماء و4كرتون ببسي و4سفن و3حافظة جريش ومثله قرصان و20 لبن صغير وجب حلا 50حبه واذا فيه مشكل سلطات سراويس جب 6 كبار حمص متبل تبولة وبابا غنوج ورق عنب
ابوعلي : تمزحين ؟ من اللي يبي ياكل الذبيحة ؟؟وكل هالنعم؟
ام علي : وش حارق رزك , لاتخاف منت دافع شيء
ابوعلي : حارق رزي النعم اللي تبي تكب.والظاهرانس نسيتي المحتاجين اللي في بيوتهم ودي امربس على حارة
ابن فريان ومعكال والصالحية وغبيرة والعود والفيصلية والنظيم والنسيم الشرقي والسعادة وصنادق حي الفوج هذا بس اللي بالرياض غير قرى الشمال والجنوب وقرى مكة وجدة والليث والحفر وغيره كثير جدا.
ام علي : على طاري المحتاجين , شفت مادقت عليّ اللي تقول محتاجة
ابوعلي : عذره معه . اسمعي ابطلب الشي ء المعقول .
ام علي : طيب بس لاتفشلنا ارفع روسنا .
ابوعلي : ابشري .
يدخل المطعم وعند الباب يشاهد امرأة محتاجة وعندما مر من عندها امسكت ثوبه وقالت : ياخوي بارك الله فيك مادور لي شغل عندكم؟؟
ابوعلي : ياخالة صوتس موغريب عليّ . انت اتصلتي علينا من يومين.
المحتاجة : انا اتصلت على كثير ولا ادري منهو انتم؟؟ تاخذن معكم ؟
ابوعلي :الحين صعب ياخالة , امرس بكرا عند المطعم .زين؟
يدخل المطعم ويطلب لهم رز و دجاج 10حبات وبعض المشروبات .
يركب سيارته ومعه العائلة والأكل بالسيارة الممتلئة بالاغراض.
ام علي : خذ جوالك دق , وصف لاختي ام عبد الرحمن مايعرفون وصف الاستراحة ؟
ابوعلي : لاحول ولاقوة الا بالله العلي العظيم. انا ماادري وين الاستراحة اللي نبي ناخذه شلونا اوصف لهم ؟؟؟
ام علي : واعده بمكان .مايبي لها عقل
ابوعلي : علي .
علي : سم يبه
ابوعلي : انزل , سق السيارة .مع السلامة .
ام علي : من الزعل , مكتومة جدا شوي وتطق .من تصرف ابوعلي
علي : وين تروح يبه ؟.ارجع بك للبيت ؟وين تروح؟
ابوعلي : قريح وبوزنه . ودهم هي واخواته خلهم يستانسون , ويفلون الحجاج
ابوعلي يركب ليموزين
سائق الليموزين : فين روح بابا؟
ابوعلي : الصناعية , اشوف سيارة الولد.
السائق :20ريال
ابوعلي : توكلنا على الله
وبعد نصف ساعة دخل الورشة ليجد سيارة الولد في اخر الورشة وعليها الغبار.
ابوعلي : صديق فين معلم
العامل : معلم في الشرطة .
ابوعلي : امرنا لله نروح الشرطة
يمشي بالليموزين ويصل لمركز الشرطة
وبعد السؤال يهتدي لمكانه , ويسأل الضابط : وش صار على موضوع الهندي؟
الضابط :هذا عنده قضايا وعليه مشاكل واجد متورط مع عصابة تزوير واحتيال وغش وسرقة بعض القطع ,
واستبدال بعض القطع بالتقليد.
ابوعلي : طيب , سيارتنا ياحضرة الضابط , متى ناخذه؟؟
الضابط : مر بعد اسبوع .المعاملة في التحقيقات
ابوعلي : من يعوضنا الايام اللي راحت والجايه؟
الضابط: ماعندي علم ؟ واحذرك من ركوب السيارة او فتحه.
ابوعلي يسلم على الضابط ويذهب لبيته .
ابوعلي يدخل البيت جائع ورأسه يؤلمه من المشاوير.ويبدأ يخاطب نفسه
ام علي واخواته والعيال بالاستراحة مبسوطين يشربون وياكلون وانا قاعد هنا تقل جني .
ابزهم على ابوفهد اشوف اروح اسير عليه
ابوعلي : الو, ابوفهد؟
ابوفهد : هلا ابوعلي , غريبه متصل وقت الآذان؟
ابوعلي : لا ,وازيدك من الشعربيت لاتغديت ولا افطرت
ابوفهد : اجل ياليتك صايم يامسكين .
ابوعلي : تقوله صادز.
ابوفهد : اقول تعال تفضل عندي نفل الحجاج , سمعت .؟؟ قل تم .
ابوعلي : تم , ولايصير خاطرك الاطيب .
.................................................. ......
وفي الاتجاه الثاني وبالتحديد في استراحة ام علي واخواتها
احداث لايمكن ان نمرعليها مرور الكرام بل لابد من ان نستلهم العبرمنها
أحداث امتزج فيها طعم الفرح واللقاء بطعم الحزن والفرقى
أحداث يقف امامها الجميع لايصنع ولايملك معها شيئا .
لأن قدرة المخلوق مهما بلغت تظل عاجزة عن قدرة الخالق الرازق المحي المميت
إنها لحظات حاسمة يكثر فيها الزفرات والندم ويسكب فيها العبرات
اقولها بكل مرارة وربما اعتذر للجميع عن استكمال الجزء القادم لهول المصيبة وحجم النكبة
من منكم يكمل والأنامل تحجر الدم فيها والعيون شاخصة مبللة بالدموع وحق لها
وقدرتي في الوصف والتعبير لاتتناسب مع تصوير ماحدث
يتبع غدا,,,

رواية رائعة الله يعطيك العافية

أففاااااا..

لاتقول غرق واحد من العيال في المسبح أو مسكته الكهرب؟؟

و إلا أقول لك .. ما أعتقد .. ما دام أبو علي معصب و مارح معهم و الإستراحة كلها حريم و بزران معناها المصيبة الكبرى اللي مواجهاهم إن أبو علي ما جاب سلطات مع الأكل أو نسي الشطة!!

نصبر و نشوف. :)