اللي اشترى مكيف شباك من فترة قريبة ياليت يتفضل
السلام عليكم ورحمة الله وبركاته رحت السوق يا شباب ولو أقول لكم فيه 30 شركة تعرض منتجاتها ممكن تكون قليلة.. الوكيل يجيب له أكثر من اسم ويغيير اسعار كل نوع من المكيفات ومن جد تدوخ لمن كل واحد يعرض لك بضاعته وكل وكل واحد يكذب بضاعة الثاني.. أحتاج مكيف 24 وحدة قوة دفعه قوية تبريده ثلج كمبروسر كبير وأصلي أنا حدي 1600 لكن لو فيه أفضل يا ليت تعطوني خبر.. ويا ليت أي أحد من أهل المناطق الحارة ومشتري مكيف قريب يعطينا رد باسمه ومزاياه وعيوبه.. وجزاكم الله خير منقول للفائده |
1600 ريال تجيب لك 18 وحدة
من المكيفات المعروفة مثل متسوبيشي دايا مع أن جودتها أنخفضت |
ارشح لك مكيف هيوجن ماليزي شباك وفيه تجميع صيني مجربه ومضمون بارد جداً ولو توقف قدامه طار شماغك من قو النفخ 24 وحدة 1300 ريال. شاريه من سنتين.
النوع الثاني اريك صيني برضه سبلت وشاريه من 7 سنوات وحاطه في الصالة وزي الألف بارد ولا في الكلام فايدة. شكراً |
ابعد عن شي اسمه تجميع سعودي = صيني
|
مكيف يورك 24 وحده شريته قبل رمضان بـ1600 ريال كمبروسر امريكي والباقي تجميع سعودي تبريده جيد جدا صوته مزعج جدا (كنت ناوى اشتري متسوبيشي 24 وحده بس مالقيت وقتها ) |
اذا مره مش لاقي متسوبيشي دايا , وعلى فكره تبريده افضل من او جنرال مليون مره , اذا كنت تقارن هذا بذاك ...
مالك إلا مالك :) مالك إلا كارير 24 او يورك 24 او الزامل 24 , كلهم كمبروسراتهم وحده , هندي كبير ... هذي راح تفيدك ... بس اكد على حكاية الكمبروسر الكبير , لأن فيه منها انواع كمبروسراتها صغيره . وفوق كذا سعرها 1600 واقل ... ليتك اخوي تنزل الرياض , وتحمل المكيف الي ودك فيه بالسياره , وفي ديرتك , اقرب باكستاني تعطيه 50 ريال يركب لك اياه .. |
اظاهر مابقي نهائياً شي اسمه كمبروسر امريكي بالسوق , إلا قبسون , ناس يقولون ان كمبروسره امريكي ...
لو فعلاً الأمريكي بالسوق كان تلاقيه يباع بثلاثه آلاف بالراحه ... |
خبير
فيه سعودي صاحب محل ينصحني ب مكيف ليونارد يقول الكمبرسور امريكي شد بلد وان ما اعجبك رجعه |
|
حاول تاخذ نوعيه معروفة
|
اقتباس:
واعني مكيفات الشباك العادية , الوحيد الذي يزعم ان مكيفاته تحمل كمبروسر امريكي امريكي هو مكيف جبسون . طيب خله يشغله لك قدامك , وقارنه بمكيف او جنرال او فوجي او قبسون , اذا طلع احسن منهم كلهم خذه ... في الرياض صافين كل المكيفات في دولاب ويشغلونها لك واحد ورا الثاني تقدر تقارن بينهم بسهوله ... وبصراحه اغلب المكيفات اليوم تجميع سعودي وصيني تعبانه , وافضل الرديء القبسون , والمتسوبيشي للمناسبه تجميع سعودي جده , لكنه اكثر من عشرين سنه يتجمع وكمبروسره متسوبيشي ماعليه كلام , عشان كذا اثبت جودته برغم تجميعه السعودي ... كان يمدح لي البايع بمكيفات يورك لأنه آخر الرجال الشجعان والبقية الباقية من المكيفات الأمريكيه في السوق , طلبت منه يشغله مع كارير , طلع دمار ولا تبريد ولابطيخ , وكارير احسن منه , بس شغل لي يورك ابو كمبروسر صغير مع كارير ابو كمبروسر كبير ... اطلب منه يشغله قدامك وشف , اذا عيا عليك , تراه بايع في الأخير , يعني وده ربح , والبياعين للأسف تجربتهم عقيمه , يعتمد على كلام الناس الي يوصله , اجي اقول له المكيف هذا تعبان , يقول للزبون الي بعدك والله الناس مايمدحون في هذا , ولا يقيس ويعرف ويفهم في التفاصيل , شغالين نقل كلام بين الزباين ... اعرف صاحب محل مكيفات , جميع مكيفات بيته عبارة عن او جنرال , مع انه صجنا بجودة المكيفات الصينيه وانها ماعادت مثل اول وتطورت ومكيف قري وما قري ! |
وصحيح اذا الصوت يهمك , ترا الكمبروسر الهندي الكبير صوته عالي ....
خله يشغله قدامك ضروري لا تشتري مكيف لغرفة نوم ماسمعت صوت كمبروسره ... |
من تجربة جيبسون هو ا لأفضل
كمبرسور امريكي كبير تحصله بـ 1300 - 1400 ريال |
اخي العزيز أنا شاري مكيف قبل رمضان بشهر ومكيف في نص رمضان 1431هـ وما لقيت أحسن من مكيفات جبسون تيربو (طبعا اخترت تيربو بسبب الواجهة يكون لونها مايل للبيج وهو لون تحمل الغبار) أما الفرق بين العادي والتيربو مالاحظت فرق وأكثر المحلات قالوا الفرق بالوجه فقط..
اما من ناحية الكمبروسر فأحب اعلمكم أن مافيه كمبروسر أمريكي بالسوق نهائيا (على كلام أكثر أصحاب المحلات).. حتى جبسون عليه ملصق أمريكي ولكن تبين لي أن الوكيل يضع الملصق في المستودع وألا هو هندي أو غير ذلك (كلام راعي محل عنده ثلاث انواع من جبسون عادي وتيربو والنوع الأهدأ ما أذكر اسمه).. اللي يهمك يكون الكمبروسر من نوع برستول (كمبروسر كبير) وابعد عن الروتاري خصوصا في المناطق الجافة الرياض والقصيم واللي تبعد عن البحر.. أما إن كان مكانك منطقة ساحلية فنوع الروتاري يجمل ويثلج بعد.. لأن الرطوبة تساعد على التبريد.. وهو من واقع مجرب لي بيت على البحر ولا يبعد كيلو والروتاري ينفع ولكن خراباته أكثر من الكمبروسر الكبير.. وأفضل حل انك تستخير.. اتمنى إني أفدت بما كتبت.. ولكم الشكر |
انصحك ان تزيد المبلغ قليلا وتشري مكيف افيرا Avire اعتقد كذا اسمه والسبيلنق قريبا كذلك لكن سعره 2500 او اقل قليلا
|
وانا اخوك انا شريت مكيفين شباك قبل ثلاث اسابيع للمجلس عندي متسوبيشي دايا ماشاء الله تبارك الله
مع العلم اني شريتهم للمجلس عندي طوله 8ونص متر في سبعه ونص متر ومغطيه المجلس ماشاء الله سعر الواحد 1580 .. والله يبارك لك |
انا انصحك نصيحة لا تقرب السامسونغ
لاني جربته رغم قلة استخدامي له الا انه اخترب بسرعة وايضا خدمة الصيانة سيئة جدا اولا اذا طلبتهم عشان يجون ياخذونه يقولونك بعد 3 ايام لازم توديه لهم عشان يكون اسرع على قولتهم واذا وديته لازم تاخذه منهم بس اذا حشرتهم يمكن يجيبونه لك وفوق كذا ما عندهم صدق التعامل نهائيا قالوا يخلص المكيف بعد 3 ايام وتدق عليهم ويقولون اليوم خلاص بيجيبونه ولا رايح يجيبونه الا بعد اسبوع وفوق كذا خذوا 150 ريال يقول للفحص رغم انها على الضمان وباقي 3 سنوات واذا اتصلت عساهم يردون عليك انا تعذبت معهم ابتعد نصيحة اخوية |
اقتباس:
اذا قيل لك صناعة سعودية معناها قطع صينية تجميع بنجلاديش خل نكون منطقيين شوي موب عمال المصانع بنقالية يعني صناعة بنقالية يعني اسواء شي ممكن تتوقعة مكيفات الراجحي مصنع الجزيرة صناعة بنقالية 100% مع احترامي للرواجح بس اي شي فية اسم الراجحي لازم يصير دمار والسبب قلة الرواتب طول وقت الدوام عدم الاهتمام بجودة القطع المستخدمة في التركيب فيه قطع صينية سيئة اذا شاهد عامل التجميع كل هذي البلاوي لم يتشجع في التشييك جيدا على ما عملت يدة |
اخي انا عندي ال جي شباك 24 وحده ااستعمال خفيف والله المكيف نظيف مره وعلى الشرط
راسلني على الخاص انا شاريه 2250 وبراعيك فيه اكيد بحكم الاستعمال والله يوفق الجميع |
| الساعة الآن 07:18 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by