انا صاحب مطعم والله رحت فيها حسبي الله ونعم الوكيل
السلام عليكم ورحمة الله وبركاته طبعا انا معكم في المقاطعه ولا تقولوا يوم اني صاحب مطعم يعني مو معاكم اولا يا اخوان المشكلة والله ليست في المطاعم يعني انا لا زلت ابيع باسعاري الاولى قبل سنه ما عدا صنفين زدت فيها مبلغ ريالين ولكن اعلمكم شئ مهم يجب ان يعيه الشارع ان المشكلة تكمن في اصحاب الشركات والموزعين اما اصحاب المطاعم فليس لهم ناقه ولا جمل اعطيكم امثله على ذالك ووالله هو الحق كنا نأخذ الرز ب145 ريال والان ناخذه ب230 ريال تقولوا غير الرز اقولكم ما ينفع لازم يكون ممتاز والناس تحبه عندنا ومتعوده عليه وهو سبب اقبال الزبائن الدجاج كان في السبعينات والان قرب يناطح تسعين ريال فيه بديل اقل ولكنه غير جيد يعني مشي حالك............. عندك الطماطم دبل والزيت كنا نأخذه بمبلغ 38 ريال التنكة الحين نأخذه ب85 ريال عندك الايدامات وعندك وعندك وعندك وكلها ارتفعت اسعارها وزادت واللي يبيعونه لكم نفس بيعهم لنا والفرق ممكن ريال الى ريالين يعني اللي كان يدخل مثلا مبلغ عشره الاف صافي كيف سيكون حاله خذ عندك الحسبه 250 دجاجه متوسط البيع زاد سعر الدجاج قريب 15 ريال واكثر يعني الدجاجه زاد فيها 1.50 اضربها في 250 يطلع معك 375 في شهر 11250 ريال تقريبا يعني مكسب صاحب المحل طار ويا الدجاج اما الرز خذ عندك الفرق بين سعره اول وسعره الان حوالي 90 ريال احنا نسوي كل يوم كيسين تقريبا اضرب 90 في 30 يوم يطلع معك 2700 ريال وعندك الطماطم وعندك وهكذا يعني اللي كان يرحب من مطعمه 15000 ريال ما عاد يرحب ولا ريال ومن كان يربح مبلغ 10000 ريال صار يدفع من جيبه وهذه حقيقه انا الان ما يطلع لي مربح مره واول ادخل من 12000 الى 17000 ريال شهريا وكذالك عندي محلات اخرى ينطبق عليها ما على المطعم السؤال هنا هل صاحب المطعم هو المتسبب ان قلتم نعم متسبب لانه يقدر يقاطعها فاقول عندك ايجار وعمال وتدفع لهم رواتب لو قفلت لو خمسه ايام راح تتحمل خساير ولو اشتغلت ستعمل للناس دون اي مكسب وانت لم تخسر مئات الالوف دون مربح وكل انسان يريد ان يسعى لرزقه وانوه مرة اخرى انني والله معكم ولم ارفع اسعاري الا في نوعين المضغوط ب22 والمظبي 22 والباقي كما هو ولكن الله المستعان ان قلتم لا لست المتسبب فأين تكمن المشكله اقول انا وبكل صراحه طمع الكبير نحن صغار ليس لنا ناقه ولا جمل حالي من حالكم يعني الضغط مو من صاحب المطعم فهو مواطن عادي وبسيط ممكن اي واحد يفتح محل وتواجهه مثل هذه المشكل كيف يعمل ؟ الكبير طماع ...................... الموزع ومن فوقه اتمنى ان تكون المداخلات علميه وواضحه لكي استفيد وافيد شكرا لكم |
ياعمي الطاسه ضايعه في هالبلد
كل واحد يقول السبب من الثاني |
انت رحت فيها والشعب مثلك رايح فيها
لاتلوم الشعب اللوم على وزير الخساره قصدي التجاره |
الاخ حاتم
تأكد ان اي زيادة بسيطة مبررة يعرف المستهلك سببها فلن تجعله يقاطع اما الاستغلال والاستغفال فهذا هو مربط الفرس وهو الذي يؤدي الى المقاطعة |
الله يعينا وإياك ياأخ ،،وتذكر قول الله تعالى((ومن يتق الله يجعل له مخرجاً ويرزقه من حيث لا يحتسب))
|
طيب معليش ........ بس مقاطعة المطاعم ليست للإضرار بالمطاعم .... ستقل كمية الرز المستهلك و الدجاج المستهلك وووو الخ ...... بالتالي الكلب "اعذروني بلوفي ناقزه" اللي رفع السعر و سميتهم "الكبار" مع تحفظي على التسمية, رايح يكتشف أن زيادته للسعر اللامبررة لم تغير في مستوى دخله .... و لو بغيتها علم و حساب ... خذ التالي :
نفرض عند "س" مورد أرز مئة مليون قطمة كان يتم توزيعها على مدار العام .... زاد السعر حسب كلامك إلى قريب 60% يعني لو قلنا معاه حق في 10% و تم مقاطعة المطاعم بما نسبته 50% من استهلاك الرز, فسيذهل "س" من حصاده المالي الذي لم يتغير برغم الجرم الذي ارتكبه في حق المستهلك ....... بعدين الدولة دعمت الرز بشاص و لا وانيت ........ههههههه ....... باختصار قلوبنا معك ... بس المنطق يقول التالي لكل منتجات تم رفع سعرها ... إذا اقتنع المستهلك بمبررات الارتفاع فهذا شأنه والله يهني سعيد بسعيده .... أما إذا لم يقتنع و قرر المقاطعة ... فليحسبها مزبوط قد إيش معدل ما كان يصرفه شهريا على ذاك المنتج ثم يخفض استهلاكه بنسبة تعادل( مثل او أكثر) نسبة الإرتفاع ...... والسلام ....... تقريبا لو رفع 50% أخفض استهلاكي 50% بالتالي لن يستلذ بالربح .... و لو استطاع أحد الإستغناء فتلك أقوى أنواع المقاطعة وهي 100% |
اكتب قائمة مقارنة بين الأسعار سابقاً والآن .. وحطها جنب الكاشير
|
اذا أردت ان نفتح قسم مقاطعة التجار للموردين فلا مانع لدي ، ويكون مخصص للتجار للتعاون ومقاطعه الموردين الاستغلاليين
وجزاك الله خير على التوضيح واسأل الله ان يرزقك من واسع فضله |
اقتباس:
والله كلامك في من الصحه الكثير بالفعل كل واحد يرمي على الثاني ولكن الا ترى ان عمل رجل من وزير التجاره وغيره من شأن في الدوله يريح شعبا يقاوم اعتقد ان لو فيه حسبه ونظام صارم ما صار كذا |
اقتباس:
ولكن أأ نب واشد على الوزير ومن معه لانهم عصام البلد وقوته لكن من يوم يقول غيروا الرز وانا غاسل يدي بماء بارد |
اقتباس:
عصام و الله خابره بباب الحارة وزيرك جحش و انا اخوك دام الوزير مالي كرشه فما عليه من احد نظامه زي نظام اغلب الوزراء (( انا و من خلفي الطوفان )) |
جزاك الله خير اخي حاتم الشهري وبارك الله فيك
وارجو لو تكرمت اضافة اسماء شركات او مؤوسسات توزيع الارز لوضعها هنا بالاسم في المقاطعة ومناشدة اصحاب المطاعم للتضامن مع المقاطعة ضد هذه الشركات والمساعدة في البحث عن الموزعين البدلاء اللذين يخافون الله حتى نصل واياكم الى مانرجوه لمصلحة المواطن في استقرار للاسعار والحد من جشع التجار |
اقتباس:
بارك الله فيك .. |
المهم الامانةو الجودة و النظافة ثم النظافة يا اصحاب المطاعم
عوفيتم |
مشكور اخوي حاتم عن دفاعك عن اصحاب المطاعم الصغيره التي لا حول ولا قوة لها
مع العلم اني صاحب مطعم اكلات بحريه في الرياض والموردين زادو اسعارهم علينا مثل شركة برايد للأجبان كنت انزل كرتون جبن شرايح بلك بسعر 255 ريال والأن رفعو سعره 430 ريال اي فرق 175 ريال بس اضطريت اني اجيب من شركه المفضله sts بديل منهم ولاكن ليس شرايح جبنه سائلة بس نفس الطعم اذا ماكان بعد احسن وبسعر 260ريال للكرتون وبكميه اكثر اما زيت هاله كان سعره 48 ريال ثم 52 حتى وصل 82 ريال وغيره الكثير ممن رفعو اسعارهم علينا وانا حتى الان متمسك بأسعاري مع العلم بأن اسعاري رخيصه جدا مقارنة بأسعار الأكلات البحريه . والله يعوض الجميع ومايخسر احد ان شاء الله |
اخوي الشهري الله يعين كلن يشكي الحال والى الله المشتكى فلا معين غيره
بس حبيت اعرف كم المفروض يربح المشروع في السنه من راس المال يعني على كلامك من 12000 الى 17000 المفروض ان الارباح السنويه تكون بحدود 30 %الى 50 % من راس المال زياده عن ذالك يكون فيه طمع وشجع على حساب المواطن يعني تخيل اللي مسوي مشروع راس ماله 200الف ويدخل شهريا ربح صافي 15000 يعني بالسنه 15000*12 =180000 يعني تقريبا 90% من راس المال اليس في ذالك اجحاف و شجع من التاجر وهذا اللي منتشر عندنا اعطيك مثال بوفيه راس مالها 30 الف وتدخل شهريا ربح صافي 5000 يعني بالسنه 60الف اليس هذه الارباح المبالغ فيها هي ناتج الاسعار المبالغ فيها وكل ذلك يدفع ثمنه المواطن انا كان لدي مغسلة ملابس وراس مالها 100 الف تقريبا مع الديكورات والاجهزه كلها امريكيه ممتازه المهم من اول مافتحتها وانا حاط في بالي اذا دخلت 30% من راس المال في السنه خير وبركه وخليت غسيل الثوب بريالين رغم ان اسعار المغاسل الثانيه 3 ريال وثوب الصوف ب3 والمغاسل الاخرى بعضها ب4 وب5 وخليت سعر السجاد والموكيت المتر ب3 ريال المهم مع هذي الاسعار من اول شهر كسبنا زباين كثير ولله الحمد وكان دخلها الشهري 3الاف وفي الاعياد 5الى 6 الاف يعني في السنه تقريبا 40 الف بس للاسف ماقدرت استمر فيها لعدة اسباب العماله انواع السرقات وثانيا صاحب المحل شجع زاد علي الاجار 50% اضطريت بعدها ابيعها على العموم اتمنى التوفيق للجميع |
اقتباس:
ثانيا يا غالي انت كنت في مجال العمل وتعلم ما الذي يحدث البلديات اذا فهيه مشروع تبي تسويه وميزانيه قليله ابتلونا في المحلات والله غرامات ما لها اساس وهذه حقيقه يعني يشوف عامل لبسه غير لانه جالس يقطع غرامه والمحل ما قد فتح وايضا لو وجد اي شي ملقى ولو بسيط غرامه يطلعولك بأشياء بس علشان تدفع وهذا بشكل شي يعني شغال لهم اشيا ء كثيره لو عددتها لتعبنا على العموم على وشك بيعه ورزقنا ورزقكم على الله |
اقتباس:
اللهم امين نحن كالمواطن المشكله تكمن في اثنين المورد والموزع وشكرا ليس لهم حل الا الحكومه |
شيئ جيد ان يشارك اصحاب المطاعم ويضعوا وجهات نظرهم
طيب سؤال وقد يكون ساذجا بعض الشيئ <<<<<<< لا توجد اي خبرات تجارية لماذا تعتمدون على المورد لماذا لا تستوردوا الدجاج والارز والمواد الاولية من بلدانها الاصلية؟؟ |
كان الله في عونك
|
اقتباس:
|
| الساعة الآن 01:53 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by