حملة خلوها تعفن .... ضد رفع المنتجات الغذائية
 

تكاتفوا لاتسكتون خلونا نقوم على هالشركات وانتم تتقضون لبيوتكم انتبهوا للاسعار واذا شفتوا اي ارتفاع اتصلوا على الرقم المجاني او بلغوا عن طريق الموقع الالكتروني والله حرام ابو متعب يبي يعيشنا عيشة كريمة وهم بيهلكونا بالصرف حسبي الله عليهم الله لايربحهم والمشكلة هالراتبين اللي بتنزل بتروح لديون يعني مناب ماخذين منها شي
اتحدوا يا اخوان وخلونا نوقف ضدهم
تذكرون حملة خلوها تصدي ضد السيارات وش صار نتيجتها ؟ السيارات تكدست وخسروا التجار خلونا نسوي حملة ونسميها خلوهــا تعفــــن ضد المنتجات الغذائية اللي رفعوها التجار وتطيح بكبودهم ويعرفون ان الله حق وانا مو لعبة بيديهم


يالله من بيدخل معي في هالحملة حملة خلوهــــا تعفــــن
انشروها بالمنتديــــات ونبداها من الحين الى شهر رمضان وبعدين نشوف نتايجها
هاه ايش قلتوا ايش رايكم

في زمن عمر ابن الخطاب اشتكى الصحابة لعمر ارتفاع الاسعار فقال لهم ارخصوه فقلوا له كيف نرخصه قال لاتشتروه
هذي نصيحة من خليفة رسول الله فعملوا بها وان شاء الله بتلقون خيرها

هلا بديانا اميرة ولز
يسعدنا كثير زياده الواعي لدى المستهلكين وبالاخص النساء :)
اقولها بصراحة النساء
بيدهن كسر شوكه تجار الجملة وتكبيدهم خسائر لو اردن ذلك :)
خلوها على رفوفهم
السوق مليان .. عليكم بالاقل سعر.. حتى لو الفرق ربع ريال ,,انتم كسبانين ..
حطوها ببالكم كل يوم تجلس السلعه على الرف تعد خسارة على التاجر :)

نقولها دايم خلوها تعفن وتخيس وتفسد وتدود بعد ..
عليكم باستغلال التخفيضات.. وشراء ما تحتاجونه فقط ..
خلوها على رفوفهم

والله ياليت بس أنا والله شبه يائس من الكثير من الناس اللي ماعندهم وعي بثقافة المقاطعة

لما تكلمه عن المقاطعة يقول يعني ما بيأثر إلا أنا

وهي المقاطعة مكونة من مين ؟؟ مكونة مني ومنك ومنها ومنهم إلى أن يتكون الضغط على التاجر ونرغم أنفه بالبيع بربح معقول

يا عالم الأرباح عندنا هنا والله ثم والله إن بعضها توصل إلى عشرين ضعف

أجيب لكم مثال بس ما هو من الأغذية لعلمي الأكيد فيه
اللمبات الصغيرة اللي يركبونها الشباب في شمعات السيارة قوتها من خمسة إلى عشرة وات تجي من الصين وتكلفتها واصلة إلى جدة بريال وربع والمحلات يشترونها جملة بين الثمانية ريال والاثني عشر ريال شفوا مكسب راعي الجملة
وغيرها الكثير والكثير اللي لو بنعدها يبغالنا مئات المواضيع

مسكين يا المستهلك ... الكل ينهش فيك ويطمع في الحصول على مافي جيبك من المال .... نحتاج أن نكون أكثر وعي وشدة في التعامل مع مغالي الأسعار فكل ريال يرتفع بغير مبرر يزيد من أرصدة التاجر بأرقام فلكيه وفي المقابل يسقط مزيد من ضحايا الفقر والبؤس ... هناك تجار همهم فقط زيادة أرقام ارصدتهم وهناك أناس همهم فقط على لقمة العيش واللهث خلفها لتوفيرها لأسرهم ... هؤلاء العصابات همها زيادة الأرقام على حساب الفقراء والأيتام للأسف الشديد فلابد أن يكون لنا دور في صد تلاعبهم وحمايه الضحايا