نجربتي مع دفاية زيت المانية من نوع Homy
 

السلام عليكم ورحمة الله وبركاته

لي تجربة مع دفاية زيت ماركتها Homy يعني الدمغة اللي على الدفاية من قدام فوق مؤشر الحرارة يقال كما هو مكتوب عليها Made in Germany صنع في المانيا شريتها من محل دفايات واجهزه في الدمام.

الدفاية 110 فولت شريتها قبل خمسة ايام جديده استعملتها لمدة يومين يا أخواني ب 350 ريال 12 ريشة قلنا الماني يمدحونه في الدفايات بس للأسف والله الغرفه 5x4 والباب مسكر ومؤشر الحرارة عالأخير ربع ساعة, ساعة, 4 ساعات متواصلة ماش ما تدفي احط يدي على الريشة والله ما احس بالحرارة الا بعد 7 ثواني. رحت للشيخ google استفسر منه قالي ياخي والله مافية دفاية بهالأسم قلتله تكفى دور زياده يمين يسار في نهاية النت قالي وهو معصب انت انلعب عليك!!!

واتصل على راعي المحل واقوله الدفاية ماتدفي انت متأكد انها مصنوعة في ألمانية قالي تتصنع في المانية و تتصدر لمؤسسة المطوع ويحط عليها دمغة هومي ويبيعها على اصحاب المحلات, قلتله ماتدفي قالي ايه عشانها 110 فولت قلتله وتبيعونها بهالسعر وانتم تدرون انها ما تدفي سكت قلتله الوالد الله يطول في عمرة عنده سيمنز شاريها من 12 سنه 110 فولت و 9 ريش بعد وتدفي غرفه اكبر من اللي عندي.

والله عيب على هالمؤسسة تبيع شي سعرة غالي على خلق الله و ب 350 ريال بجودة سيئه.

راعي المحل ما قصر رجعتله الدفاية, هذي و توصيلتها مغيرة مني عساس تركب في الفيش
وزدته 150 (ادري غالية بس لي وللزمن) وشريت (سمنز (SEIMENS) ) ما شاء الله تبارك الله لها فايدتين الأولى تخليك تدفى وتحتر والفايده الثانية تذكر الواحد بنار جهنم ويتعوذ.

هذي تجربة شخصية.


وفي أمان الله

لام

اخي الكريم الدفايه الالمانيه سيمنز Siemens نوعيه جيده ومجربه..اشتريتها من الخبر من زمان وتباع في محلات الاجهزه الكهربائيه..

اللي شريتها سيمنز فوق الممتاز بس غالية

دفايات الزيت مافيه افضل من سيمنز
لكن ياليتك رفعت فيه للغش التجاري

يمكن يصنعهم في الصناعية ويحط عليهم استيكر انه الماني

بس ما علمتنا اسم المحل

كأني شفت مصنعه بالخضريه :)

الماني محلي :)

انتبه ترى جاني ايميل قبل يومين دفايه ذايبه وبغت تحرق اهل البيت بحاول انزل الصوره

يعطيك العافيه

وحنا بناخذ سمنز دامكم تمدحونها

تجربتى اقولها بكل صراحه ,,,

انا شريت سيمنس من الشتاء والصيف ,,,ولا اشتغلت زين ,,وبعدين بدلوها بوحده ثانية ,,ولك عليها موب الى ذلك الحد ,,,

وللتنبية فقط غرفتى 5×6


قد يكون هنالك غش او نوعيات ردئية او مصنعين واحد المانى والثاني صيني


والله اعلم