مفاجأة II..مكتب برج السعد ..II في العقربية الخبر فن في الاحتيال!!
 

السلام عليكم

المفاجأة باكتبها لكم بكره لاني قاعد اكتب لكم في الساعه 5:15 الصباح :wounded1: وما نمت ابدا وعندي دوام بعد ساعه :blink:

..........

جيت لمكتب برج السعد في العقربية في الخبر (خلف الجميح) بتاريخ 21-4-2010 عشان استقدم شغالة للوالده

قال لي ادفع مقدم ودفعت له 6000 ريال مقدم ويبقى له 2500 ريال

اللي استقبلني سوداني اسمه هشام وواحد سعودي اسمه عبدالرحمن الزهراني (ان شاء الله اسجل لكم ضحكة السوداني اذا رجعت له مره ثانيه) :D يخرب بيته حتى في الضحك نصاب :zx:

طيب بتسألوني ليش بالذات رحت لذا المكتب من البداية؟؟ :think:

قولو ليه مره ثانية؟

سألت ولد عمي عنه ومدحه لي وقال استقدم من عندهم شغاله ووصلت خلال 20 يوم وصدقته انا << غشيم استقدام :lol:

بالليل اعملكم كيف قعد يمرمط بي من هذاك التاريخ الى اليوم ( تاريخ اليوم ترا 31-07-2010) :mad:

أوريوس :p

حياك اخوي..
يعني مقدم من 3 اشهر ولسا ماجات الشغاله ؟
مقدمين على شغاله اندونيسية او فلبينيه او سيلانية ؟
نتظر باقي القصه :(

الشغالة المستقدمة سريلانكية

تكملة القصة.........

انا كنت اراجع المكتب تقريبا كل اسبوعين.. وكل مره يعطوني عذر جديد :mad:

المره الأولى قال لي باقي يدورون شغاله لاني اشترطت تكون قد اشتغلت في السعوديه

( على فكره هل هذا الشرط زين ولا مو زين؟ وهل يؤثر في مدة الانتظار والبحث؟؟) :think:

المره الثانيه رحت له لقيت الزهراني وقعد يدور في ملف اكسل عندهم حاطين فيه كل المعلومات

قال لي ياخي ما لقيت الطلب حقك :blink:

المره الثالثه لقيت السوداني وقال لي خلصنا الكشف الطبي حقها والحين باقي تدرس في مدرسة لمدة 3 اسابيع

(هل هذا صحيح؟؟ وايش يدرسونهم في المدرسه هذي؟؟ لازم نعرف المعلومات كلها) :think:


المره الرابعه رحت له وقلت له ليش تاخرت وقعدت شهرين؟؟ وطلبت منه يشرح لي العملية كلها ويعطيني تواريخ او اي اوراق تثبت في اي مرحله من الاستقدام وصلو لها

رفض السوداني وبشده وقال لي "انا ماني ملزم اعطيك اوراق ولا بطيخ :mad:

المره الخامسه قال لي السوداني هي بتدخل السفاره اليوم عشان تطلع فيزه واعطيك خبر بعدها. (

نشفت ريق السوداني الين خليته يرسل لي رقم الجواز واسم الخدامه السريلانكيه عشان اتاكد هل فعلا فيه خدامه ولا قاعد يكذب علي) :p

المره السادسه دق علي راعي المكتب قال لي عطنا الفلوس الباقيه<< يحسبني هطف :D

رحت له في نفس اليوم وفصلت عليهم بقوه. قلت له ما عرفت رقمي الا يوم صرت تبي الفلوس :D

المهم اني تكلمت على السوداني وبرضه طلبت منه اوراق مثل صورة الفيزه صورة الجواز صورة الفحص الطبي وكل اوراقها عشان اتاكد من كل شي.

المره السابعه رحت له المكتب بعد ما دق علي وقال لي عطنا الفلوس وفيزة الخدامة طلعت ( لاحظو الفلوس ذكرها اول شي بعدين الفيزة طلعت) :zy:


قبل يومين ارسل لي السوداني رساله يقول الشغاله بتوصل الليله على الدمام على الخطوط القطرية عن طريق الدوحة :clap_1:

رحت استلمها على موعد هبوط الرحلة الساعة 2 صباحا وقعدت الى الساعه 4 ونص الصباح عند الجوازات.

انتظرت انتظرت انتظرت الين تعبت وفي الاخير رحت للجوازات قال لي العسكري ياخوي هذي حولناها على الترحيل

قلت له ليش ياخوي؟؟

قال لي موظف الجوازات : "عندها سابقة ولازم تُرحل الى سريلانكا"

ياربي ,,,,

لازم تروح تزنط السوداني ولا عااد يضحك :D

الله يعينك الصراحة مأساة !!

وبعدين ؟؟ هل سيتم ارجاع اموالك وتعويضك من قبل المكتب ؟

اكيد صادوها عن طريق البصمة

عشان تكمل المسرحيه

رحت للجوازات عشان اخذ "ورقة اعادة" اللي تثبت اني ما استلمت الشغاله وانهم رحلوها

قعد يدور رئيس الرقباء يمكن ربع ساعه بين الاوراق وقال لي بعدها

الورقه ماهي موجوده تعالنا يوم السبت :mad:

الحين دائره حكوميه تضيع اوراق رسميه؟؟ :blink:

سحبت على كلام الرئيس ورحت للمدير حقهم على طول

دق على الرئيس وقال له خذ رقم الرجال ودق عليه اذا لقيتو الورقه. لا تخليه يجي مره ثانيه الا والورقه جاهزه

ولا زلت في انتظار الاتصال من الرئيس :D

وشكلي بابطي عظم :D

ولا اصير زي اسم المسلسل البايخ حق لورنس شوربة وخل :D

بصراحة كذا

رحت للمكتب وقلت له السالفه

قال لي روح جيب الورقه ونستقدم لك من جديد :D

بس ترا البدل دايما ياخذ وقت اطول

يعني ادعو لي كذا على رمضان السنه الجايه تكون الشغاله موجوده في ظل ابو متعب :D

هلا أخوي وعظم الله أجرك على مأصابك من بلاء ومحنه وأسال الله أن يربط على جاشك ويعوضك كل خير .

لو أنا مكانك علقت السوداني في عمود الأنارة إللي مقابل للمكتب لين أخذ فلوسي بدون قيمة التأشيرة .

أنا مأحرضك بس لابد أن تضع حداً لهذة المهزله .

س1- كيف يتم أصدار تأشيرة عمل من السفارة السعودية في سريلانكا والخادمة لديها سابقة !!!؟

س2- كيف المكتب مايلتزم بشروط العقد ويدفع لكل غرامة التأخير بواقع (30 ) ريالاً عن كل يوم ؟

س3- ورقة الترحيل التي بموجبها تستعيد تأشيرتك ( ليش تضيع ) وش السبب يعني ماضاعت إلا ورقتك ؟


أسئل الله أن يكون معك ويخفف مصابك الأليم ....