طريقتي وطريقة جدتي بالتوفير
هااااي افري نفر هير :D
يسعد لي اوقاتكم بكل الخير انا اليوم بقولكم تجربتي مع الادخار وهو بحقيقه الامر ماهو ادخار بمعناه الحقيقي تقدرون تسمونه توفير مبلغ من الراتب لوقت الحاجه .وطريقه ثانيه ادخار حقيقي . وبعدها راح اذكر طريقه جدتي بالادخار :D طريقتي اول شي فاتح لبنتي حساب بنفس البنك اللي ينزل راتبي فيه ومسوي له كل الخدمات من هاتف مصرفي الي حساب انترنت ماعدا بطاقه الصراف ماطلبتها ولا ابي اطلبها وهنا الزبده :D طبعا الكل يعرف انه مرات اول ماينزل الراتب من الفرحه نضيع بعض المبالغ الصغيره بشغلات اصلا مالها معني مثل نروح مطعم ومانخلي شي مانطلبه ومانسأل عن الاسعار ايه من الفرحه طبعا :D انا عن نفسي اول ماينزل الراتب عندي تقريبا 370 ريال فروقات بالراتب فاقوم على طول ادخل حسابي عن طريق موقع البنك بالنت واحولها لحساب بنتي وانساها لاني لو خليتها اكيد بستهلكها بشي مايسوى لزوم الفرحه واصرف راتبي كالمعتاد وارجع اشيك اذا فيه فروقات جت بعد من عمليات الشراء :D فاحصل فيه 70 ريال ومرات 106 ما اخليها على طول احولها :D طبعا هالفروقات تختلف من شهر الي الشهر اللي عقبه مثلا مرات يكون حصيله الشهر بهالحساب 500 ريال وعليها كسور ومرات اكثر ومرات اقل بمعنى اخر لا احد يستهين بهيك مبالغ لما تتجمع بتطلع المحصله حلوووة وكلا على حسب راتبه والفروقات الموجوده فيه طبعا احاول قد ما اقدر اني انسى حساب بنتي واجلس افكر لو بروح البنك اسحب يوووه زحمه وامسك سرا وحاله :D فأهون ماروح . وبعد كم شهر اشيك على الحساب بصراحه اتفاجأ مرات احصل مبلغ حلو ينفع لأي زنقه وبالذات بالاعياد تخيل تنزنق بعيد والا بمناسبه وتحصل لك الفين ثلاثه تفك هالزنقه شي خياالي صراحه . والطريقه الثانيه هذي ادخار حقيقي بمبلغ مستقطع شهري من الراتب يزيد مرات لازم تنساه وتخيل انك جالس تسدد قرض وبرضه تحوله على نفس الحساب اللي تكلمنا عنه وانسااااااااااااااااااااااه انا بحساب هالادخار تخيلو خلال سنه بس وصل الحساب عندي 58 الف ريال :D بس من القراده دخلتها الاسهم عشان اعدل اسعار اسهم عندي وخسرتها :p ------------ الطريقه الثالثه وهي الانجح وتدرون ليش انجح لانك بتكون محشور غصبن عليك وهي انك تتفق مع كم واحد ثقه من ربعك اصدقاءك او زملاءك بالعمل وتسوي جمعيه بمبلغ معين تكون انت قادر عليه ولا تصير دوب وتاخذها اول واحد خلك الاخير احسن لك :D انا عن نفسي مشترك مع 12 نفر ونفره وداخل بسهم واحد 500 ريال :D ----------- طيب نجي لطريقه جدتي بالادخار :D رايحه مع السواق للحداد ومفصله لها صندوق بدون باب :D يعني مغلق من كل الجهات ماعدا فتحه صغنووونه عشان تدخل الفلوس معها طبعا حكمه جدتي الله يطول بعمرها تقول ماخليت للصندوق باب عشان ايأس اني افتحه واخذ :D هي الله يطول بعمرها كل شهر تسدح بهالصندوق مبلغ وقدره على حسب اللي يجيها على طول تجدعه بهالصندوق :D المهم بعد سنتين يشاء الله ان ينقز حرامي للبيت ويسرق الصندوق باللي فيه :D وهالطريقه انصح فيها بس بشرط انك تاخذ الصندوق معك لابغيت تطلع من البيت :D ههههههههههههههههههههه نهايه الحكي وزبده او لب الموضوع هو الجزم والتوكل على الله والبدء بأحد الطرق اعلاه ماعدا طريقة جدتي :D واللي ضعيف وقلبه مايتحمل ويدوخ عند الراتب ويحلف الا يخلصه قبل 15 من الشهر لايختار اي طريقه والرزاق رب العالمين تعليقااااااااااااااااااااااتكم لا هنتو ;) |
مرحبا أخوي ..
ليش تقول عن جدتك كذا الله يخليه لكم .. فعلا الحزم و الإرادة هي السبيل للنجاح بس كيف وفرت هالادخار تخيلو خلال سنه بس وصل الحساب عندي 58 الف ريال ما شاء الله عليك... ليش بالشهر كم تحط فيه ؟؟؟؟؟؟؟؟؟ ياليت أكون مثلك |
اقتباس:
..................... لي عودة يا سعودي غير بقراءة متمعنه :cool: موضوع يستحق التمعن والتدقيق |
الله عليك ، بس هم خلو لنا شي من رواتبنا ، الاسعار زايدة ، والجشع متربص بنا ،
وكملتها الأسهم ، والراجحي مثل الذيب الاعور ورانا ، لا ويحجز المبالغ بعد ..الصراحة صار الراجحي دولة داخل دولة . خلوها تصدي مستمرة .. |
الله يرحمك ياجدتي ...
ما كان عندها صندوق ... كانت عندها كم بلاطه .. حافرة تحت كل وحدة منها حفرة تحط فيها الفلوس إللي تجيها .. السر في معرفة أي بلاطة هي إللي تحتها الفلوس .. لأننا ما كنا نعرف إلا بلاطه واحده و عادة ما يكون تحتها شيء يذكر .. يمكن إعتبارها محفظة المصرف اليومي. |
الادخار مطلوب وياليت ثقافة الادخار يسوتعبها الناس لان هناك بعض الاخوان لايستطيع او بالاحرى لايعرف كيف يتصرف في راتبه وتجده في ثاني يوم من نزول الرواتب على الحديدة ...
ايضا هناك مسألة تغيب عن اذهان بعض الناس وهي نسيان الصدقة فهي البركة باذن الله في الراتب ومن واقع تجربة اقول هذا الكلام... |
سالفة حساب بنتك حلوة لكن المشكلة اللي في الراجحي لو بسوي حساب ثاني غير الراتب مايخلونه بينط لي كل شهر اذا صار اقل من 5000 خذ منه عمولة ..
وجدتك الله يخلف عليها .. الجمعيات حلوة انا اسويها لكن اذا جت اصير مخططة على صرفية محترمة لها :( تحياتي لك |
اقتباس:
.............................. |
انا علي حلف مااكلم الراجحي وخدمة العملاء اذا قدرتي تسالينهم ليت تبلغينا الله يعافيك
سعودي غير والله مهوب شات مع جمرة غضا كله من اجل الصالح العام والله لايحرمك الاجر :) |
اقتباس:
انا كنت ركزي على كنت :d كنت اجدع بهالحساب من 3500 الي 5000 انتي تقدرين توفرين بطريقه انه لازم يكون عندك حد اقصى وحد ادنى للادخار وافضل طريقه تكون بنظام الاستقطاع لانها بتكون بمبلغ ثابت متفقه مع البنك عليه عشان لو توفر عندك اي مبلغ بالشهر تقدرين تضيفينه مع المستقطع للادخار عموما بحسب ماقريت لك بموضوع هنا اتوقع انه الانسب لك تدخلين بحساب ادخار بالبنك اللي راتبك او راتب زوجك عليه راح يخصمونها شهريا بمجرد نزول الراتب وماتنسحب الا بعد انتهاء الفتره اللي اتفقتو مع البنك عليها مع العلم بأن اغلب البنوك اقل مدة للادخار فيها هي عشر سنوات |
| الساعة الآن 02:40 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by