المطابخ والافران
 

السلام عليكم
يسعد مساكم
لي فترة وانا ادور بالسوق عن محلات المطابخ , رحت التخصصي والامير سلمان ومخرج 9 وغيره كثير
وجدت شركةاسمها ( بنامكو ) في الصناعية بجوار شيخ المطابخ . النوعيات التي لديهم فرميكا والمنيوم( وصاج ) سؤالي .
من منكم يعرف هذه الشركة وتعامل معها ؟
من استخدم نوعية الصاج كمطبخ متكامل ؟
ــــــــ ـــــــــ ــــــــــ
الافران
كما تعرفون الموضه الان يستخدم الفرن المفصول ( سطح + فرن داخلي )
وجدت عدة انواع منها اريستون & نردا & البا
ما هو الافضل بينها
تحياتي ,,,

حياك بحر
بصراحة انا شفت وحده مركبة منهم اولا غالي جدا مطبخ صغير كلفها بحدود 35 الف ثانيا ماعجبني والناس اذواق هو عندها مطبخ داخلي
يعني شغل عليه خفيف .. يميزه حركاتهم والملحقات وهذه متوفره في ايكيا ومحلات اخرى وممكن تركب على اي مطبخ
فيه مواقع تصاميم للمطابخ خذ فكرة قبل ما تفصل
..................................................
لكن اقولك عندنا مطبخين الداخلي امريكي والخارج اللي عليه الكرف من غرناطة << غرناطة غالي لكن سعره فيه يتحمل جدًا ... والاهم ابواب المطبخ خليها تفتح 180 درجة وهذي تعتمد على المفصلات وسعرها يختلف
....................................
الافران تقصد سيراميك او قرص كهرب او بغاز ..ارستون شركة ممتازة جنرال بعد ممتاز
من جهتي افضل السطح يكون من الغاز وبعده القرص الكهربائي اما السيراميك فحده فقط شغل خفيف او مطبخ داخلي < مهب كفو طبخ ,, غير انه متعب بالتنظيف له ماده خاصة لتنظيفه ومع الوقت راح تطلع الخدوش عليه.
بعض الافران(اللي يطبخ فيها الفطائر) فيها خاصية التنظيف الذاتي زرار يضغط عليه يشتغل ينظف ويحرق اللي فيه ويسهل تنظيفه

انا جربنا بنامكو شغلهم زين واشكال حلوة وايضا خدماتهم ..
حتى العامل الي فيه تحس فاهم ويبدي اراء مفيدة ..
نصيحة رح لفرعهم في التخصصي وشف الموديلات واسال عن كل التفاصيل لكن خذ العقد من الصناعية بيفرق السعر معك مبلغ حلو ..

جمرة غضا
ام العيال
شكرا لمروركم ونصائحكم
لدي استفسار بسيط بالنسبة للالكسسوارات والملحقات وش القصد منها هل هي السلال الداخلية او المقابض . وليش من ايكيا !
اما بخصوص الافران السطح اكيد عيون غاز بدون كهرباء لكن السؤال هل هو عملي يتحمل الكرف والضغط لأنه الفرن الاساسي والوحيد .وهل يتأثر الرخام الصناعي من الحرارة والثقل عليه . وبعدين انا مالقيت ماركة جنرال اين اجدها ؟
طيب الفرن هل تنصحون غاز ام كهرباء وكيف وضع حرارة الفرن وتأثيرها على الدوالاليب اللي لاصقة بجنبها
وآسف على كثر الاسئلة , وفي انتظار ما لديكم جميعا
تحياتي ,,,

لدي استفسار بسيط بالنسبة للالكسسوارات والملحقات وش القصد منها هل هي السلال الداخلية او المقابض ??
نعم وتقدر تاخذها من المحل نفسه وفيه محل اسمه الحيدري في التخصصي عنده اكسسوارات مطابخ حلوة مرة..
بالنسبة للفرن الكهربائي انا حاطينه في المطبخ الصغير يعني شايي او قهوة وكذا
الفرن الاساسي في المطبخ فرن عادي غاز وهذا راييي يمكن احد تلقاهم عائلة كبيرة وماشي معهم الكهربائي ..

الله يسهل امركم

اقصد اضافات تحطها بالمطبخ صحيح تضاف عليك كلفة اضافية لكن لها فائده توفر مكان وتنظم
مثل هالصورة مكان صغير لكن شف تاخذ اغراض ,, وحتى ممكن انك تستفيد من ابواب المطبخ
يعني استغل كل قطعه فيه بطريقة حلوة
( النت يفصل كثير والا فيه مواقع اجنبية فيها تصاميم للمطابخ ممتازة وبجد ابداع )
http://forum.te3p.com/uploaded3/90768_21184329856.jpg
http://www.hawahome.info/uploaded/19666/1158198110.jpg
http://www.etharh.com/up/uploads/1ed383bb51.bmp
http://www.s77.com/up/up9/29447109fc.jpg
http://www.brooonzyah.net/newspics/230.jpg

http://www.3roos.com/uploaded/52918/51186510367.jpg
http://www.3roos.com/uploaded/52918/81186510367.jpg
انت شف المحل بكم يحسب عليك الملحقات وقارنها مع ايكيا والاهم انك تاخذ المقاسات (ايكيا ارخص بالملحقات فقط )اعني الملحقات فقط والا مطابخ ايكيا الريال حسافه عليها

.............................................
فرن كهرب ما استخدمته شخصيا لكن اعرف كثير على جنرال واشوف فطائر والكيك والصواني ممتازة فيه ,, بعضها فيه مرواحة تساعد على توزيع الحرارة
فرن الغاز ميزته اسرع من الكهرب وممتاز اذا وزنيته مضبوطه
اما تاثير الفرن على الدواليب يعتمد على نوع الخشب فيه نوع معالج ضد الحرارة .. وان كان من الامنيوم ما يضره اغلب المطابخ تصمم الافران مع الدولاب
.....................
فرن السطح سيراميك جنرال فيه موجود تلقاه عند السويلم لكن انبه السيراميك خطر ينكسر والخدش بسهوله والافضل منه الكهرب القرص ممتاز ويتحمل الثقل
اذا بتاخذ السطح غاز حتى لو بتشتري ايطالي اوامريكي انتبه بعض الحوامل ضعيفة ماتشيل ولا قدر يسلق بيض الا وهي منكسره على طول , وخاصة في الموديلات الجديدة صغروا العيون ورهفوا الحوامل الحديد
هذا موقع جنرال خذ فكرة بوضع الفرن لوبغيت
http://products.geappliances.com/App...001&SITEID=GEA
...........................................
تراني ناصحه لك الرخام الصناعي زينه باول الشهور وبعدها يتاثر بالحرارة ويتاثر بمواد التنظيف ومع الوقت يبهت وشف اغلب الشقق المفروشة وشلون شكله
انا عندي جرانيت ويمسح في اليوم كم مرة بالكلوركس ويرجع ينصع والقدر من الفرن عليه مباشرة ولا يضره ابد.. صحيح تكون محدد بالوان مع الجرانيت لكن مافيه احد يجي بقوته وبجودتة
نصيحة اعرف كثير حطوا مغسله المطبخ من الرخام الصناعي هي حلوة منظرها في المحل لكن مع الاستخدام يتغير شكلها مافي احسن من الاستيل ..

وجدت في السوق افران السطح من نوع ( البا ) يمدحها راعي المحل في شارع التخصصي ويقول انها افضل من ارسيتون وغيره . كما ان الفرن من نوع جليم افضل بمراحل من غيره وحسب قوله ان ماركة ارسيتون تعتبر شعبية ولها اقبالها بينما اللبا اجود .

انا الصاج ما دخل مزاجي.. الناس اذواق وانا دقه قديمة ما اتقبل استايل المودرن الهادي:o ..اميل للاستايل الامريكي الخشب اكثر بعده فرميكا ...
عندك غرناطة التيسير ممتازين في صناعية المطابخ
.........
فيه فرن ثلاثي شامل الانظمة(فرن كهرب +ميكروويف +شواية )يعني اي نظام تقدر تشغله وخذ اكبر مقاس ترتاح كل الصواني تدخل بسهوله هذا عندي ممتاز مرة . وان كنت معتمد على تشغيل الميكروويف فقط ماابي الشغاله تخربه علي :) ... صحيح شوي غالي لكن يغني من تجميع3 الاجهزة في المطبخ ... ماركة ال جي
.........................
جليم محد يمدحه شعلته تطفي وناره مهب قوية
................
واهم شي في الافران واي جهاز هو الوكيل وخدماتهم وصياناتهم
احسن واضمن وكلاء هم شاكر والسويلم .... والافضل تروح تسعر من عندهم وينصحون لك اكثر من التخصصي
وبتوفيق ويجعله منزل مبارك