يوميات أبوعلي
أم علي : ليش قايم مانمت يابوعلي؟ أبوعلي : مالقيت مخده زي الناس أم علي :وشفيها مخدتك ريش من أغلى الأنواع أبوعلي :هذا البلاء راسي غاطس وعيوني شاخصة تقل اعد النجوم. أم علي :ههههههههههههه , وش دعوى , رح للسوق واشتر من المخدات المصرية الكبار اللي ترفع رأسك . أبوعلي :خلاص شكرا أم علي : حلوه ذي , سنك زعلان . أبوعلي : رجاء غيري الموضوع . أم علي : أبوعلي أخاف أقول شي وتزعل . أبوعلي : تبين السوق وما معس فلوس صح.؟ أم علي :لامالك لوا أبوعلي : اجل وش تبين ؟ ام علي : الثلاجة ماتبرد أبوعلي: وغيره؟ أم علي : واثنين من عيون الفرن ضعيفة جدا شكلها متسددة. أبوعلي : وغيره في شي ثاني ؟ أم علي : باقي أهم شي ء؟ ابوعلي : خلصينا . ام علي :ثيابك في الغسالة من أسبوع . أبوعلي : وش تنتظرين اغسليهن أم علي : سؤال جميل , النشاف خربان. أبوعلي : انت صاحيه ؟اشوف مقياس الحرارة , كل هالخرابات في البيت ولاعلمتيني أم علي : والخافي أعظم بس ماحبيت اضيق صدرك أبوعلي : هههههههههه, صدق من قال شر البليه مايضحك . وشفيه بعد ؟ أم علي :اخاف تهاوشني . أبوعلي : اخلصي . أم علي :ابروح مشوار قريييييب وبيك توديني . أبوعلي : وين ؟ورا الولد مايوديس ؟ أم علي : محل الملابس ابشتري تنورة , عندهم تخفيضات ابلحق عليها . أبوعلي : متى تبين تروحين ؟ أم علي : على كيفك ؟ متى مابغيت ؟ أبوعلي : خلاص جيبي الفطور نفطر. أم علي : ماصمت ؟؟؟ أبوعلي : لا ماصمت , رمضان وانتهى . أم علي : طيب , وش تبي ازين لك ؟ أبوعلي : أي شيء أم علي : أخاف ازين شي وتعيب عليه ابوعلي : لاتخافين وبسرعة تكفين . .............. أم علي : تفضل أبوعلي : وش ذا ؟ ام علي : وشف فيه ؟ أبوعلي : الخبز بارد . أم علي : نسيت أقولك الميكرويف خربان . أبوعلي : شكرا ,عسى ماحد يحسدني , الظاهر لازم اقرأ عليس عشان مايجيس عين . أم علي : هذا جزاي , تطنز خذ راحتك . يتبع غدا |
بانتظار الجزء الثاني وتكون صلحت كل الأجهزة |
بالانتظار يا ابو علي
|
يوميات أبوعلي ج 2
بسم الله ولجنا وبسم الله خرجنا وعلى ربنا توكلنا اللهم إني اسألك خير المولج وخير المخرج .
ياأم علي.. ياولد.. السلام عليكم ورحمة الله وبركاته انتم فوق أو تحت , ياناس ردوا لاحول ولاقوة إلابالله العلي العظيم . من يوم ماجا الانترنت وحنا متفرقين لانجتمع على طعام ولاشراب كلن مسكر غرفته وماغير مقابل الشاشة . ماصارت والله حاله . اشوى هذي أم علي أم علي : نعم وش عندك ؟ أبوعلي :ابد حبيت اتعرف عليس أم علي :هههههههههههه , الله يرحم ايام زمان , ماتترك حركات الغزل . المهم وديت الثلاجة والغسالة ؟ أبوعلي :ودينها ,والفرن مواعديني الفني اليوم أم علي :تكفى لاتنسى الميكرويف أبوعلي :لاتخافين بعد شوي اصلحه من محل التبريد القريب عندنا في الحارة. أم علي :بغيت شي ء ؟ أبوعلي :لامشكور ؟ وين العيال؟ ماشوف احدمنهم . أم علي : شغالين مناوبة ؟ناس تقوم وناس تنام على الانترنت ؟ أبوعلي :شغالين حراس أمن!؟ وش هذا الكلام مايصلح . شوفي حل مع سهرهم. أم علي : أنا ولانت , انت ابوهم ويخافون منك . أبوعلي : اصبري ابشوفهم . طق طق طق , افتح ياعليان علي : نعم أبوعلي : ياوليدي افتح الغرفة عشان ادخل , ممكن علي : نعم , تفضل .وسكر الباب لايطلع الهواء بسرعة تكفى لايضيع وقتي . أبوعلي : ياوليدي وش هذا غرفتك ثلج وش رايك احط عند راسك ماء تشرب تبل ريقك 24 ساعة متسمر على الشاشة , لانشوفك لاغداء ولاعشا, حتى الصلاة مقصرفيها على : ايزي , وش المشكلة ؟ انا اعرف مصلحتي . أبوعلي : المشكلة كبيرة الله يصلح حالك وقليبك , تضيع الصلاة وتضر جسمك , وضيع دراستك , ابوك يحتاجك امك تحتاجك . علي : هذي مشكلتي , وبعدين تارك اخواني كلهم وجاين عندي تنصحني أبوعلي : ابي مصلحتك وبعدين انت قدوة لهم . علي : سم ابشر , في شي ثاني ؟ أبوعلي : فيه ؟ الكهرباء اذا طلعت من الغرفة سكرها امس حصلت مكيف غرفتك شغال علي : صح كان عندي ضيوف سهرانين في الملحق نشوف مبارة اليوفي والانتر , ونسيته . أبوعلي : مانسيته ياوليدي , كل مرة اروح وسكرالمكيف بنفسي ومكيفات اخوانك . هذا الحال مايصلح شف لك حل . فاتورة البيت 650ريال علي :طيب ابي فلوس ابوعلي : هذا الفالح فيه , قبل اسبوع توني معطيك 300ريال ,ولاتنسى ان الجامعة تعطيك 850ريال وين تودي الفلوس ؟؟؟ قلي اشرح لي ؟ علي : صرفتها بالسيارة , تضليله وزينه وركبت مراتب جلد . أبوعلي : انت صاحي , ياوليدي ,حرام عليك , حنا مانغرف من بحر , خف رب العالمين . علي : انت , تبي تعطيني ؟ ولادبرت عمري . ابوعلي : وشلون دبر عمرك ؟ تسرق ولاتسأل امك تعطيك . علي : هذا عاد شغلي , ولاجيت اسألك صفقني . تجيبونا ولاتصرفون علينا تبونا نضيع , وين التربية؟ موب انت مزعجنا كل شوي التربية الصلاة وفاتحن اذاعة القران وقناة المجد وكل ماجينا ندخل ونطلع صلوا صلوا وتسألني صليت وفي اي مسجد؟؟؟ يعني مافي ثقة . أبوعلي : لأني ماشوفك في مسجدنا تصلي . علي : صلاتي لي .وكم مرة قلت لكم هذا الكلام أبوعلي : بس تترك مسجدنا وتروح تصلي مسجد ثاني ليش ؟؟؟ علي : بالعربي جماعة مسجدنا ملاقيف , ويسكرون المكيفات , والامام مدري وش يبي يطول في الصلاة ابوعلي : الامام يبي الخير لنا . علي : نسيت اقول شي ء؟سيارتي فيها صوت, مدري وشو؟ ابوعلي :صوت مسجل يمكن ماسكرته. علي : ههههههه . حلوه , صاير تنكت , ابوعلي : وش الصوت اللي فيها ؟ علي : مدري الظاهر صوت الفحمات او المكينة يبي لها خرط. ابوعلي : وش جاب المكينة للفحمات ؟ وجع يوجع العدو سيارتك جديدة مالها الاسنة والله لو انك تكد عليها . علي : المهم علمتك . ابوعلي : طيب لاتمشي عليها ودها للورشة يكشفون يشوفون وش فيها . علي : اليوم , ماني فاضي , ابروح عندي تجمع في التحلية استعراض . وبعدين طالع للملعب مبارة الشباب والاهلي , وفي الليل متواعدين نشتري ملابس من محل في العليا يبيع بدل فخمة ماركات واتعشا وبعدين ارجع بدري قبل الفجر , اوكي أبوعلي : عرفت الفلوس اللي طلبت مني وين تروح . يتبع غدا ,,, |
و الله أعجبني أبوعلي ...
باله واسع و أخلاقه رياضية.. لو أنا مكانه كان سطرت الولد على وجهه من أول رد. |
ههههههههههههههههههههه
تهاويل ابو علي ... الله يعينه ويصبره .. الا اقول وشلونك ابو هشام وش اخبارك ... لا يصير هشومي من ربعه هع |
الله يستر على هشومي ... لسه ماجاه الدور ..
الله يعيننا بس على حسن التربية. |
ج 3 أبوعلي : عرفت الفلوس اللي طلبت مني وين تروح . علي : قلت لك مابي شي , لاتقعد تمن عليّ . اغلى ماعلى الإنسان كرامته. أبوعلي : رح اكشف على السيارة , ولايسير إلاخير . علي : طيب , بس لاتقعد تهقنا , كل مرة . زين ؟ أبوعلي : أنا الغلطان , اللي ادخل عليك , اعوذبالله من شرك , اكلتني بلسانك جني . مع السلامة . يذهب علي بسيارته ويدخل أول ورشة في الصناعية علي : صديق , تعال شوف هذا سيارة خربان معلوم شغل ؟ الهندي :ايوه معلوم مرة مرة كتير كويس مافي مشكل . علي : شوف اي خراب بعدين مشكله شرطة الهندي : معلوم , خلي سيارة , انازبط ميه ميه .مافي خوف . انت شوف بعدين لازم يجي مره تاني علي : صديق ,مع السلامة في خلاص سوي جوال موجود في ورقة , امسك . الهندي : مافي مشكل , بس لازم فلوس , عربون , انا يشتري قطع غيار. علي : بعدين , سيارة خلاص , سوي جوال انا يجي ويعطي انت فلوس . الهندي : مافي مشكل , عشان انت جديد , نفر حلوه , انا مافي كلام قرقر كتير . علي : شكرا صديق , انت نفر كويس .مع السلامة. يدخل علي البيت يصارخ بقوة متضايق من حرارة الشمس علي : يمه يمه أم علي : صمه , وش تبي علي : وين ابوي ؟ أم علي : وانا وش دراني , يمكن فوق يصعد علي الدور الثاني أبوعلي : جيت ياوليدي , حياك الله , بشر , عساك وديت السيارة . علي : وديتها . ابوعلي : هاه وش صار فيها ؟ علي : مادري ؟ خليتها وجيت بالليموزين . ابوعلي : انت صاحي ولامجنون ؟؟!!! علي : ليش ؟ الرجال قال يبي يكشف عليها ويتصل علي ؟ وش فيها ؟ ابوعلي : خوش . وش تفاهمتوا عليه؟ السيارة فيها شي ء ؟؟ علي :يبي يتصل علي ,وما فيها إلانظارة شمسية وعدة البر وملابس وكتب الجامعة . ابوعلي : وش بعد , تذكر. علي : اشياء خاصة مسكر عليها في الدرج. ابوعلي : خاصة , مثل ايش علي : مثل ايش , هذي عاد تبطي عظم , ولافي امل ,ولااسمح لكم تدخلون في اسراري او تحاولون تفتشون سيارتي . ابوعلي : الله اكبر , اسراري , وش عندك , عساك مانيب قايل,المهم متأكد انك مسكر عليها لايحوسها الهندي , وبعدين قلي اذا خلصت سمعت , واذا قدرت تمر عليها احسن لايقعد يمشور عليها . بعد ثلاثة ايام ... الهندي :الووو, صديق , سيارة خلاص , لازم جيب فلوس بعدين شيل سيارة. علي : كم فلوس صديق ؟ ايش مشكله الهندي : مافي مشكله , انت يجي بعدين معلوم كلام جوال مافي كويس انا سوي دسكونت , مافي شيل زيادة . علي : يعني كم ؟ الهندي :3500ريال علي : ايش ! خلاص شغل , ركبت قطعه ؟ الهندي : ايوه , انت قول اول مافي عربون , انا يشتري قطعه من فلوس انا بعدين ركب , والله انا خسارة كتييير مرة , بس قول انا لازم اكسب زبون , معلوم . علي : طيب مافي نقص شويه . الهندي : شوف قطع من وكالة اصلي , مافي تجاري , نفر تاني ممكن جيب من تشليح , انت مافي معلوم علي : كم شغل يد؟ الهندي :3000ريال قطع .شغل يد 500ريال , انا مافي شيل زيادة نفر تاني علي بابا " حرامي " هو شيل ممكن 1000ريال معلوم . علي : احترم نفسك , صبر انا كلم بابا يتصل بالجوال على ابوه علي : طووووط , طوووط مشغول الخط الهندي : شوف صديق انت لازم جيب فلوس مافي روح ممكن سيارة بعدين مشكلة . علي : زين , زين لاتصجنا يعاود الاتصال مرة ثانية والرصيد على وشك علي : طووط , طوط, اف , اشوى رد , يبه ابوعلي : هلا , بشر علي : خلصت السيارة . ابوعلي : وش طلع فيها ؟وكم قال لك ؟ علي :تعال تفاهم معه احسن . ابوعلي : طيب وش طلع فيها ؟ علي : ماعلمني زين . ابوعلي : طيب كم ,عشان اصرف من الصراف ؟ علي :شكله نصاب , يقول 3500ريال بعد الخصم . ابوعلي مايتحمل ويسقط على الأرض مغشي عليه. علي : الوو, يبه, تسمعني ؟ اقول 3500 ,بسرعة تعال , الهندي حاجز سيارتي . لازم تجي الحين تكفى يبه. يتبع غدا,,,, |
ههههههههههههههههههههههههههههههههههههه
الله يعين على هالعلي ..... لو انه ولدي يا ابوعلي كان عطيته تأشيره نهائيه لأقرب ............. اكرمكم الله يرفع الضغط الا يجيب كل مرض .. الله لا يبلانا بمثل هالعلي .. كمل كمل ... نشوف اخرتها معه |
اقتباس:
أكمل :thumbsup: |
| الساعة الآن 08:26 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by