رايكم يهمني .... ماهو افضل مكيف صحراوي....
 

الاخوة الكرام

انا ناوي اركب مكيف صحراوي( 1 حصان ) في بيتي عشان الصالات المفتوحة

احترت اخذ اي نوع

ناس تقول الجزيرة وبعضهم يقول هاس

احترت والله

ومكيفات ارفن مالقيتها في السوق

رايكم يهمني كثيييير

وعليكم السلام ورحمه الله

أهلا أخوي,بخصوص المكيف أنسى الجزيرة وهاس والطقة هاذي حتى أرفن أنساه ولا يهمك كلام الناس.

أما بخصوص وش تشتري أنا أقولك القرار الأفضل بأذن الله.

طبعا أفضل مكيف في العالم وهو اللذي دائما يحصل بالمرتبة الاولى هو Breezair هو مكيف صناعة أسترالية بمواصفات جدا ممتازه ووكيلة هو شركة السعيد موجود في طريق الامام مخرج 9, ولكن عيبة سعرة مو رخيص.
طبعا بعد ماأخذ المكيف هذا الترتيب الاول ماقصرت المصانع الصينية وصنعت موديلات قريبة جدا لة. طبعا المكيف مصنوع من مادة AB يعني أنسى الصدا والأملاح وأعتقد 12 او18 سرعة وفية تقنية أخراج المياة القديمة كل ماأردت يعني الموية فية دخول وخروج وكل هذا بريموت.

وش تشتري؟
أنا أذكر أن الحقباني مستورد و مجمع موديلات نفس موديل الاسترالي وبسعر مكيفات السوق العادية,الحقباني موجود في الغرابي .

فنصيحتي لك أشتري من الحقباني الموديل اللي قلتلك علية وأيضا أشتري قطعة تفتيت الاملاح الي موجودة في الموية وركبها بعد PUMP عشان تنسى بأذن الله تسوي صيانة للمكيف طول العمر.


قطعة التفتيت المغناطيسي للاملاح هاذي تستخدم للري عشان تفتت الموية المالحة لمده أعتقد 3 أو 6 ساعات ,ويجي منها نوع صغير ممكن سعرة 250 الى 300 ريال وعلى فكرة ترى المكيف اللي أقولة هو كرتون وليس قش(القش مشاكلة كثيرة على الصدر وفلتره الغبار فية سيئه.






*

الله يعطيك الف عافية على هالنصيحة

كم سعر المكيف عند السعيد

الحقباني وين مكانه بالغرابي ( وينه عن شارع اكسسوارات السيارات )

القطعة اللي تقول لتفتيت الاملاح هل تقصد القطعة النحاس ؟

ارجو الافادة لاعدمناك

سعودي وشعار حياكم

حكاية ان الكرتون افضل من القش بصراحة نصبه تسويقية خدعونا بها
سبق حطيت امريكي نوع "كرتون "ماتم الصيف الاول عليه الا صار صبه مهوب كرتون من كثر الاملاح والتراب .. لا مايطلع تراب يطلع منه طين ! وحدث ولا حرج ..
اخوي يا صاحب الموضوع فيه حل لمشكلة الاملاح ببلاش بلا قطعه بلا تكاليف زياده
كل 10 ايام تقريبا صرف المويه من المكيف وهذي كافيه لمنع تراكم الاملاح
تبون الجد المكيفات الموية كلها مشاكل ما ارتحت الا من بعد رميه

اكيد المكيفات الصحراوية مشاكلها كثيرة
بس في ظل الجفاف اللي في الرياض يعتبر الصحراوي حل ممتاز لترطيب الجو

ذبحتنا الجيوب الانفية

سلام اهلا اخوي سعودي كوول

بخصوص الأسعار ماني متأكد لكن الأفضل أن تروح وتشوف وتسعر وتقيم بنفسك

موقع السعيد وأنت على مخرج 9 ووجهك غرب تلقاه أعتقد بعد مخرج أبوبكر على يدك اليسار

أما موقع الحقباني تلقاه في الغرابي في سوق محلات جملة الكهرباء بعد غرابي السيارات روح يسار(أعتقد فية أثنين حقباني)اللي أقصدةصغير وأعتقد بزاويه,اللي يسأل ما يتوهـ

أما قطعة تفتيت الاملاح هي ممكن تكون حديد أو بلاستيك من الخارج ومغناطيس من الداخل
__________________________________________________ _____________

اخوي جمرة غضى بخصوص القش والكرتون زي ماأنت عارف أن كل المادتين أصلهن من الاشجار بس للأسف القش العادي يقشرونه مباشرة من الجذع على شكل الياف صغيرة ويبيعونةأما الكرتون فهو يمر بمراحل تصنيع كثيرة زية زي الورق يعني تضمن النظافة حتى الغبار ما يخش فيه بسهولة زي القش ,حتى أن المكيفات المركزية الضخمة وأنظمة تبريد البيوت المحمية يستخدمون الكرتون .

اما المكيفات اللي أقولها لك يا سعودي كوول ففيها نظام أخراج الموية بالريموت كنترول
ان أردت أسبوعيا ,اما أخراج المياة مفيد عشان ما يتجمع الاملاح في القاعدة لكن بدون قطعة تفتيت الأملاح ماتقدر توقف الاملاح اللي تعلق في القش أو الكرتون أو حتى الطرمبة.

لما اشتريت ابو كرتون الامريكي الصناعه ,وليس سعودي ولا تجميع قالوا 3 سنوات ماراح تغير الكرتون
وانا من اول صيف رميت الكرتون وغيرته بواحد جديد ومشاكله ماتنتهي

اخوي التسويق التجاري مافي اسهل ولا اخبث منه يقلبون لك "البحر طحينة"

جمرة غضا القش أو الكرتون يتعلق فية الاملاح والأوساخ حسب نسبة الأملاح في الموية وهاذي النسبة تختلف من حي الى حي في الرياض يعني أنا عندي نوع مكيف واحد مركبة في حي سلطانة وحي الروضة وحي الناصرية ورغم ذلك فترة تغيير القش او الكرتون تختلف من مكان لمكان ثاني .
طبعا الأسوا ملوحة في حي سلطانة.
وعلى العموم ميزة المكيف الصحراوي فواتير الكهرباء فأنصح بتركيبة في الصالات المفتوحة والافضل أن يكون هناك تيار خروج للهواء حتي يكون المكيف بارد

المكيف الصحراوي

قطعة من العذاب لا في صيانته ولا في تبريده إذا ارتفعت الشمس ولا في مشتراه الغثيث و ماجاني الربو إلا منه

لا تشتريه نصيحة لوجه الله

أما أحد الأخوان يقول ترطيب الجو

فالحل سهل فيه أجهزة ترطيب تعبأ بالماء وتشغل وتنتج البخار لترطيب الجو الجاف وموجودة في إلكترو

من 45 ريال إلى 600 ريال بحسب ميزانيتك

اخوي بالنسبه للمكيفات الصحراويه حسب علمي ان افضل المكيفات اللي تكون باكستانيه الصنع ..
طبعاً فيه قش وهذا يصلح للاماكن المفتوحه لانه يسبب رطوبه عاليه .. وفيه الكرتون وهو للاماكن المغلقه لان رطوبته اقل من القش ..
بالنسبه للمكيفات المنتجه فالسعوديه فمكيفات الجزيره من افضلها بس الله يعينك على السعر ..