محتار وش اسوي مع العمار؟؟
 

ما لي الا الله ثم انتم يا اخوان...


اكيد حصل لكم نفس الشي..

عندنا فلة نعمرها والحمدلله خلصنا عظم ولياسة بعد مشقة... لها الان خمس سنوات وما خلصت ..

المهم باقي الان عليها البوية وشبابيك الالومنيوم .. رحنا لأكثر من محل بوية ووضعهم ما يطمئن.. والفلوس ما تكفي عشان ننسرق زيادة..

أي أحد يعرف ناس يخافوا الله في البوية .. ومن منكم جرب بوية معينه جودتها عالية بسعر رخيص بعيدا عن الاسعار الخيالية ومن محترف في بوية البروفايل وعمله على الجدران الخارجية.. وعمل دهان للديكورات الجبسية الداخلية

وايضا محلات تفصيل شبابيك ومطابخ الألومنيوم وعندهم ذمة وضمير وسعرهم رخيص... وهل فيه انواع تنصحونا من الالومنيوم..

اتمنى الاخوان والاخوات يشاركون خاصة من سبق له خوض التجربة...

ولكم جزيل الشكر...

أولا ... الله يبارك لكم فيها و يعطيكم خيرها و يكفيكم شرها.

ثانيا .. أرجوا تحديد من أي مدينة تكتب ليتمكن الأعضاء من مساعدتك.

نسيت والله.. انا من الرياض..

وحياك الله أخي ابو هشام على مرورك

ابو بدر يمسيك بالخير
ابنصحك
انا توي اشطب فله صغيرة
ان كنت توك ما حطيت الجبس فيا اخوي عليك بصناعية الموسى هناك تلقى الرخص والعمالة الممتازة
رح لمهم الضحى تلقاهم موجودين
عندك خيارين اما ان تاخذ اللوازم وتاخذ العمالة باليومية او تعطيهم اياه قطوعه وبكل الحاليتن انت الرابح
لان محلات الجبس والديكورات الموجوده بالشوارع اقل مايقال عليها غاليه ونصابة
انا احتجت براويز جبس للجداران هنا قالوا المتر 40 و30 والي عطف علي قال 20 ريال
واخذتها من الصناعية نفسها بـ 3 ريال وفيه بـ ريالين

البوية اعطيك من خبرتي البسيطة الجزيرة رفعت اسعارها 25 % انحش عنهم
خذ بوية جوتن السطل منها عن سطلين من الانواع الرخيصة واضف ان جودتها ماحد يختلف عليها يعني تقاوم الموية
فيه جوالين عندهم ب 65 ريال طبعا الانواع العادية
ونصيحة مني حط بوية عادية و اختر الالون مناسبة للديكور وابعد عن الموديلات والخرابيط الشامواه او فلفيت او الجيينز وهالانواع تراها موديل ويعدي ولا تحصل الا الخسائر وانت بحاجة الريال
الشامواه تدفع 170 ريال للسطل وكم شهر ينزلون موديل :)

الالمنيوم والله ماعندي علم بالرخيص لاني احرص على الجودة لكن عليك بالصناعية اتجه لمهم تلقى الخير عندهم

اخوي وش مطغيهم.. يمسيك الله بالخير وحياك الله وما قصرت بالرد.. بالنسبة للجبسيات منتهي منها والحمد لله عن طريق مثل ما قلت العمالة على القطوعة.. بقى علي البوية والألومنيوم

وباالنسبة للبوية صدقت ماني راعي مظاهر .. نبي البيت للسكن واللي ما يعجبه بيتنا واثاثه لا يزورنا ههههههه .. لا أبد حياكم.. امزح

انا سمعت من اللي رشوا بوية قبلي ان فيه عمالة تلعب عليك بعد شراء البوية .. ويبدلوا السطول من غير ما تدري.. وازيدك من الشعر بيت.. بعض البويات مثل البلاستيك تجي في كيس داخل السطل... يقومون العمال بتغييرها وبنوع ردئ ما تكتشفه الا بعد مرور وقت وزين اذا عرفت عنهم..

اما الالومنيوم انا ادور النوع اللي يمنع دخول الغبار للبيت ويكون فيه ربلات بين السحاب وخفيف في السحب.. وابحث ايضا عن نوعية الزجاج الموجوده في السوق يفضل عازل حرارة وعاكس في النهار والليل يمنع رؤية من في المنزل.. احس شروطي من الفضاء ههههههه

حياك ابو بدر والله يتممه عليكم بالخير ويجعله منزل عامر بذكر الله
بالنسبة لتلاعب العماله وبيع البوية المغشوشه او تقليد فهذا صحيح
انصحك حتى تبعد عن البوية المغشوشة
انت بنفسك من يشتري البوية واشتريها من محلات موثوقه مثل ما تفضل الاخ وش مطغيهم
"محلات جوتن " تلقى محلات تبيع فقط لجوتن وعليها اسم جوتن هذي اسعارها مناسبة ولا يغشون ان شاء الله
والتلاعب الثاني تلقاه عند العمالة تسرق البوية اللي تشتريها للبيت ..فانتبه بعض العمالة تجيب معها ترمس موية يقال حتى يشربون منه ! وتغافل صاحب البيت وتعبية بوية وهي ماشية :)
وعليه البوية لا تجبيها مرة وحده يعني بكرة راح تضرب غرفة او غرفتين او ثلاث بالليل جيب لهم اللي يكفي عملهم
اما الديكورات مثل ورق الجدران او قماش الجدران او حتى البويات الجديدة مثل الخيال وشامواه فانا انصحك ابعد عنها ..شخصيا تخسرت بالديكورات وانواع البوية الغالية وكلفت على نفسي وماتميت كم شهر الا طلعوا انواع جديدة ! خسرت فلوسي ولا فرحت بالبوية ..

اختر لون رايق يناسب الاثاث وقيمه البويات الغالية حطه للاثاث
الالوان الهادية مربح فلا موضه تقدر تغلبها ولا تزيد بتكاليفك

الالمنيوم طلبك فيه ممتاز ولكن بيكلفك شوي ومثل هالاساسات ما تعتبر خسارة

الله يجزاك ألف خير واياكم نعمر بيوتنا بالخير ونسكنها بالخير

هذا الكلام اللي بغيت اقوله ... تبديل البوية سواء بالمحل من داخل السطل او بعد شراءها في البيت من قبل العمالة...

لكن أنا سمعت ان فيه شركات تأخذ الفلة بالكامل وتعطيك ضمان على البوية والشغل طبعا أغلى من العمال الجوالة لكن مو لدرجة انه يصير مبالغ فيه.. وش رايكم في هالشركات؟ وهل جربها أحد من الأخوان؟


اما من ناحية الشبابيك فهي حالة ... هل تركيبها بعد البوية أو قبل البوية .. لا سيما ان تركيب الشبابيك بعد البوية بوقت طويل يسمح للغبار يدخل للبيت ويلعب بالبوية ...وان قمت برش البوية بعد تركيبها يصير اثر البوية على أطراف الشبابيك...

وش رايكم؟

الله لا يحرمني تواجدكم وما قصرتي اختي جمرة

حياك اخوي ,, وعذرا على التاخر بالرد

بصراحة ما تعرف لهم .. ممكن تطيح بشركة ممتازة وومكن تطيح بشركة حتى لون البوية تغيره !
لكن انصحك مر على الفلل اللي تشطب يمكن تحصل عماله ممتازة


فيه من يحط المعجون ويسنفر وقبل اخر وجه يركب الالمنيوم
وفيه من يركبه بعد
لكن انا افضل تركب همن تضرب البوية .. لان ممكن العماله تمخش البوية او تضررها عند التركيب
عشان كذا اخر وجه للبوية تقدر تصحح اي غلطه
وراعي البوية يحط شطرطونات على الالمنيوم ..
والشركة اللي تجي تجلي الفله اشرط عليهم ينظفون الشبابيك والالمنيوم .. عندهم مواد تزيل اثر اي بويه

لا فض فوك اختي جمرة.. عين العقل والصواب .. لكن بقى علي الاخوان يشاركون برأيهم عن المحلات اللي جربوها والانواع من الالومنيوم

هل فيه انواع ممتازة من الشبابيك الالومنيوم وهل فيه محلات معينة تفضلوا التعامل معها؟

أنا ابحث عن الامانة في العمل والنظافة...

مصنع غرناطة لهم فروع وتحصل فرع لهم بصناعية المطابخ
سعرهم شوي غالي لكن شغل نظيف وامانة