منتدى مقاطعة - اقتراحات بخصوص المقاطعة واسمحولي على الاطاله

بسم الله الرحمن الرحيم

السلام عليكم ورحمة الله وبركاته
اعتذر منكم مقدماً على الاطاله :

1- ان يكون هناك لجنة متخصصة في المنتدى لتحديد المنتجات التي يجب مقاطعتها حتى تتوحد الكلمة ويكون التركيز على منتج او على صنف معين بدلاً من تشتيت الجهد بين الاعضاء ، وتكون هذه اللجنه مرشحة من الاعضاء .

2- تفعيل اخبار المقاطعة في المنتديات الاخرى ، وشي اكيد ان اي عضو في المنتدى يكون مشارك في منتديات اخرى .

3- شي مؤكد ان المنتدى راح يكتب فيه اشخاص تابعين للشركات التي ستتم مقاطعتها لتشتيت التركيز في المقاطعة .
وطبعاً كونهم يكتبون في المنتدى فهذا المفروض شي مفرح لنا لان المنتدى له تأثير عليهم وهذا السبب اللي يخليهم يكتبون لاجل تشتيت التركز عن منتجاتهم .

4- ان نستبدل مصطلح مقاطعة ( للي عندهم تحسس من المقاطعة ) بمصطلح البحث عن بدائل بنفس الجودة وبسعر اقل .

5- بدل ما أستخدم عبارة ( مافيه إلا أنا مقاطع / اذا قاطعت الناس قاطعت ) نستخدم ( لو مايبقى غيري ماشريت هالمنتج ) ولنا في مقاطعة المنتجات الدنماركية خير دليل على قوه العزيمة والاراده فلو حطينا في بالنا التجربه السابقة مع المنتجات الدنماركية وطبقناها مع المواد المرتفعة اسعارها فبإذن الله مصيرنا النجاح .

- وفيه حاجة ودي اذكركم فيها وهي ان ارز ابو كاس في رمضان 1427هـ يوم انتشر في المنتديات المطالبه بمقاطعته ( لانه من الداعمين لمسلسل طاش ماطاش ) قوم الدنيا وماقعدها من الخوف من المقاطعة واخذ يعلن في كل الجرايد وفي صفحة كاملة ان ماله اي دخل في المسلسل ولايعرف عنه اي شي .
واكرر هذي التجارب خير محفز لنا للوصول بالمقاطعة الى النجاح .

6- فيه حاجة اكيد الناس ملاحظينها في المنتجات وهي ان التعبئة غالباً تكون من مصنع واحد ولشركات عده وهذي نشوفها في الاجبان مثال جبنة الموازيلا فرسان هي نفسها المراعي والقشطة هالي هي نفس نجدية وبعض الاجبان المثلثه تلاقون الغالبية تعبئة مصر بس اسعار كل شركة تختلف عن الاخرى ، ولا تهون زيوت القلي كلها عماني واماراتي واسعار الشركات متفاوته .
- فأي عضو يحصل منتجات متشابهه بالجودة والاسعار متفاوته ينورنا فيها علشان الجميع يستفيد .

7- هذي النقطة ماتخص المواد الغذائية ولكن للفائدة وهي اسعار زيوت السيارات محلات تغيير الزيت تحسب العلبه 1 لتر 13 الى 15 ريا ل ولو الواحد منا كلف على نفسه شوي وجابها من محلات جمله الزيوت اللي في الصناعية القديمة كان تطلع عليه العلبة 1 لتر 9 الى 10 ريال .
- فلاتر الزيت ( السيفون ) محلات تغيير الزيت تركبه 25 ريال (تويوتا) والله اعلم هو وكاله اصلي او ياباني ولو تروح الوكاله او الموزعين المعتمدين لها في الصناعية تأخذ الكرتون 100 الى 110 ريال انت وشطارتك عاد معاهم والكرتون فيه عشر حبات احسبها يالغالي . ( وحنا ياغافلين لكم الله ) .

والسلام عليكم ورحمة الله وبركاته