منتدى مقاطعة - عرض مشاركة واحدة

**عبدالله بن علي** · 11-10-2009, 04:10 AM

ج10
[/URL]

بدر...
ابن السنة والنصف, برآءة الطفولة الجميلة في عينيه, يشغل أمه بكلمات يرددها تتمناها كثير من الزوجات
يدخل المطبخ فيرمي كل ما تصل يديه إليه , ويعاقب من أمه . يسير في ارض الاستراحة فيعبث بالتراب ويعاقب من اخته .حركة دائبة لاتكل ولاتمل , صياح وبكاء . وفرح ولعب ولهو...
ماما , ماما وين بابا .ويكررها لتصرخ أمه في وجه .
وتنادي : يا علي خذ اخوك اشغلني وراي شغل .
يمشي بدر الصغير في الاستراحة يتأمل في الوجوه التي حوله وبمكونات الاستراحة.
يمارس لعب الطفولة البريء ,والخوف عليه من الجميع من أن يمس بأذى او سوء.
يسير ويسقط ,يرتدي سروالا طويلا اسود اللون وفنيلة بيضاء . لون وجهه ابيض وشعره أسود طويل يغطي حواجبه الخفيفة , وعيونه عسليه كبيرة الحجم . وجسمه سمين من شاهده قال هذا ابن الثلاث سنوات .

وفي لحظة من غياب الرقيب , الأولاد في قسمهم لاهون , والنساء في سمرهم مستمتعون.يأكلون ويشربون وعن خلطات الشعر وانواع الماركات يتحدثون .
وتأتي لحظة من لحظات الضعف , ضعف في المكان وتحصينه وضعف في متابعة هذا الوليد الصغير ,
و يجد بدر الفرصة سانحة ليمارس حريته " باب الاستراحة مفتوحا"
فيخرج بدر الى الشارع في وقت غفلة من الجميع وسكون من المارة , معقول ؟؟ويضيع بدر!
الوقت بعد العشاء , خرج بدر والقمر لم يكن بدرا . والظلمة تغطي المكان .
لايراه الا الله تعالى , الرحمن الرحيم , الله الذي هو ارحم به من أمه.
وبدأيسير ويسقط وإذ به يجد نور استراحة اخرى فيذهب اليها ويدخل على قسم من اقسامها, ولكن لم يلتفت اليه احد , الكل مشغول هنا وهناك ومن سوف يشاهد طفلا او يتوقعه بين هذه الجموع ؟؟
ام علي : بدر بدر , اكيد يخرب شي ء, عالية شوفي اخوس وينه ؟
عالية : ماحصلته يمه. لكنها لم تبحث عنه جيدا
ام علي : أكيد عند الرجال , ان شاء الله ماعليه الاستراحة فيها حارس والأبواب مسكره.
وتجد الطمأنينة من الحضور لاتخافين, ماعليه اتركيه يلعب مع البزران.
...وفي قسم الرجال يتذكر علي اخاه بدرا
علي : يابدر يابدر , اصبروا معليش ياشباب ابشوف البزر وين راح .
يبحث ولم يجد بدرا فيقول :اكيد عند امي .
بدر الآن يسير في قسم النساء في استراحة قريبة من استراحة أهله .
تشاهده شغالة وتأخذه لمكان تجمع النساء .
الشغالة : مدام هذا بيبي صغير .
المرأة : وشلون دخل .
الثانية : وديه لقسم الرجال .
الثالثة : لاحطيه عند الحارس , لاتورطينا
الرابعة : "امرأة عقيم لم تنجب من 15سنة" تعالي هاتيه تكفين ودي اشوفه , ماشاء الله تبارك الله .وتطبع قبلة على خده اللين ذو الرائحة الزكية من طيب ام علي المعتق .
بدر يصيح ولايعلم كيف يحكي وكيف يشكو .هو فاقد لأغلى شيء في الحياة " الام"
يردد... ماما ماما .ولامجيب.
الرابعة : اتركوه انا اتولى امره , ماعليكم منه .
الثانية من النساء : خافي ربس ترا أمه الحين تتقطع صياح عليه .حطيه عند حارس الاستراحة.ولابلغوا الشرطة يودونه لاهله.

تتصل الرابعة على زوجها :الو سعد, ابشرك حصلت وليد ضايع والطاهر ان ماله اهل ودي يجلس معي لو الليلة طلبه , تكفي , ودي اشمه واضمه واشري له ثياب جديدة , وحليب وحفايظ والعاب حلوه .
ابيه يقول لي ماما ماما يمه يوه زي باقي الحريم , تكفى ,اوعدك وعد ارجعه لاهله اذا حصلناهم.
سعد : انت صاحيه؟ . تحصلين اهله يدورون عليه . انت ناويه تفجعين امه, خافي ربس , الله يبي يرزقنا وليد اوبنيه.
زوجته : وهي تبكي وتصرخ في وجه زوجها سعد . 15ستهة ابي افرح هالمره اعوذبالله,
ماعمري طلبتك شي ء. اقولك الولد الليلة عندي وبكرا نرسله لاهله .
سعد : طيب اسمعي , ابحط جوالي عند حارس الاستراحة عشان لو سألوا اهله عنه نطمنهم عليه
" وينسى سعد وضع جواله عند الحارس"
زوجته:اجل مشينا.بسرعة
سعد : والعشاء ؟
زوجته: مانبي عشاء , ابروح اشري اغراض للوليد والعاب و سيارة تفتح ابوابه كبيرة, وحلويات.
واختي ترضعه عشان اصير خالته من الرضاع , وش رايك؟؟
سعد : انت انجنيتي؟؟ كيف ترضعين الولد من اختس , والام ماسمحت؟؟ وبعدين اللي يشوفس يقول الولد يبي يجلس عندس سنة!!
زوجته:اسرع مافي وقت لازم نروح الصيدليه نشري له حليب اطفال .
مضى من الزمن ساعة وبدر الصغير خارج استراحة اهله . والآن يركب وهو يصيح ماما ماما, فتحاول ان تشغله ببعض ماتبقى من حلويات في يدها رغبة في اسكاته .
ويصل سعد الى الصيدلية
سعد : دكتور ابي حليب ؟
الصيدلي: من أي نوع ؟
سعد : لاأدري , اريد شيء اصلي. المسألة ذمه يادكتور.
الصيدلي: ماتدري , ليه , كم عمر الولد ؟؟
سعد: والله يادكتورماعندي علم؟
الصيدلي: تقريبا؟
سعد : سنتين.
يعطي الصيدلي الحليب حسب طلب سعد ويمضي مسرعا الى السيارة ليجد الصغير نائما
سعد : جبت الحليب .
زوجته : اسكت وليدي نايم لاتزعجه .
سعد :صار وليدس , طيب وين نروح ؟
زوجته : للسوق اشري له العاب .
سعد : اقول وش رايس تعوذين من الشيطان ونروح نحطه عند الحارس هذي مسؤولية وانا ماعندي استعداد بكرا اهله يزهمون على الشرطة وندخل بمتاهات مالنا فيها حاجة , واصلا طال الزمن اوقصر تبين ترجعينه لامه , فاهمه .
زوجته : اقول لا انت تبي ترفع ضغطي؟ , اذا تبين ازعل خذه , والله ماتشوف وجهي .
سعد : طيب الى متى؟
زوجته: الين اشبع منه , ويمكن احصل امه واتفاهم معه يمكن عنده عيال وملت منهم .
سعد : مااحد يمل من عياله اويفرط فيهم .
زوجته : المهم رح للسوق.
وجاء وقت العشاء في استراحة ام علي , الكل ينادي أبناءه,
ام علي : علي ازهم اخوانك , وشف الصغير بدوره وين راح؟ مهوب عندك؟؟
علي : دورت عليه قبل شوي ماحصلته مهوب عندكم؟؟
ام علي : مهوب عندنا , وشلون ضاع ؟؟!
بدأ اهل الاستراحة الاخرى التي دخل اليها بدر يخرجون ,
أنوار الاستراحة خافته بناء على تعليمات صاحبها للحارس
ام علي : تكفون ياعيال شوفوا يمكن الولد عند الحارس ولانايم عند الشجر
عالية : يمه , يمكن غرق بالمسبح؟؟
ام علي : وجع يوجع قلبس , تفاولين على ضناي , وتضربها على كتفها تنبيها لها.
روحوا دورو لي بدر .
الاخوات : تعشي يابنت الحلال , يبون يلقونه , وين يبي يضيع ؟؟ مستحيل ؟
ام علي :تعشوا , اذا جاء الوليد اتعشى معه , اعشيه بيدي يمكن ماتعشى , او اسوي له رضعه قبل ماينام .
علي : يمه بدر ماحصلناه , ماخلينا شي ء , حتى كلمنا الحارس قال ماادري عنه .
ام علي : في حالة انهيار والدموع تنسكب بغزارة .
وهل تلام وقد فقدت جنينها , والله ان الدمع لايكفي مهما خرج , لأن المفقود بدر
روح البيت صغير العائلة. بسمته ,ألعابه, شغبه محطات لمحبته .
اه ثم اه أي حزن حل بأم علي’ وابوعلي يسهر بعيدا غافلا عن ماحلّ بأسرته .
وتصرخ ام علي في وجه علي بشدة .
علي ,رح دور وليدي جنيني بدر . رح ولاتجي الا والولد معك تفهم ولا لا , امش.
انت ماتسمع لاتوقف , رح , حرام عليك
واخذت تنادي بأعلى صوتها كالمهبوله في الاستراحة بدر بدرررر .
والآن تهم بالخروج لتبحث بنفسها عن بدر ,وليس عليها حجابها .فتمسكها اختها الكبرى وتقول لها:
تعوذي بالله من الشيطان اذكري الله . حرام اللي تسوينه بنفسس .يبون يلقونه انت تعالي استريحي.
ام علي : شوفي خبزته طايحه بالارض وهذي رضاعته , ياويلي يمكن نايم وهو جوعان , وبدأت تبكي بحرقة , وسقطت من هول ما أصابها ومن حولها يقرأون عليها من آيات الله تعالى.
"اللَّهُ لَا إِلَهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ لَهُ مَا فِي السَّمَاوَاتِ وَمَا فِي الْأَرْضِ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلَا يَئُودُهُ حِفْظُهُمَا وَهُوَ الْعَلِيُّ الْعَظِيمُ"
وهنا.. اعتذر لكم فمازال في السطور بقايا حرقة وحرمان وحزن .
اعتذرا لمن فقدت جنينها أياما أوشهورا ولم تجده .
واعتذر لمن لم ترزق بالمولود ذكرا أو أنثى "زينة الحياة الدنيا"
لا تصبرون؟؟! تريدون بقية الاحداث
إن كنتم لاتصبرون؟؟
فمامصير من فقد ابنه ولايعلم ماذايفعل به؟؟ أيصبر ؟
نعم ,يصبر ويحتسب وله أجر:
"إنما يوفّى الصابرون أجرهم بغير حساب"
يتبع غدا,,,ِ