ما ادري الواحد ايش يقول او يسوي بعد ما يشوف الفرق بين اللي قاعد يصير بالبلد وبين دول ثانية. انا راح اقول لكم قصة صارت لي بخصوص التأمين بأمريكا وقارنوا وشوفوا الفرق بيننا وبينهم. والله الواحد يزعل لما يشوف دولة اسلامية ويصير فيها هذي المواقف ودولة مو اسلامية تلاقي كل واحد منهم يشتغل بضمير ويعطونك حقك اذا عندك حق. مع ان المفروض اننا نكون قدوة ونوريهم كيف المعاملة الاسلامية حتى هم يعتبرونا قدرة. والله الواحد احيانا يتكلم من الحرقة لما الشوف الحال اللي احنا عليه.

المهم، قبل حوالي سنة كنت بمحطة بنزين وتوي طالع من الموقف الا وحدة عجوز قاعدة ترجع ولفت علي وصدمتني. المهم كلمنا الشرطة كلها 5 او عشر دقائق والدورية جاية. المهم الشرطي قال ان الغلط عليها 100% والحادث بسيط وقال كل واحد ياخذ معلومات تأمين حق الثاني واتصلوا بشركات التأمين واحنا راح نرسل التقرير لهم. كانت الساعة حوالي 9 الصباح وكنت ناوي اروح لهم بعد الظهر. المهم حوالي الساعة 11 الصباح اتصلت علي شركة التأمين تبعها وقالوا احنا عندنا كم سؤال عن الحادث وكيف صار واذا ما عندك مانع ممكن نسجل المكالمة. قلت لهم اوكيه.

المهم سألوا كيف صار الحادث وانت كيف كنت واقف وهي وين كانت واقفة. المهم بعد ما خلصوا قلت ايش راح يصير بعد كذا. قالوا اننا نتتظر تقرير الشرطة ولما يجي راح نتصل عليك.

حوالي الساعة 1 الظهر اتصلوا علي شركة التأمين وقالوا انه التقرير وصلهم وانها الغلط عليها 100% واحنا راح نصلج سيارتك. قالوا لي عندنا مجموعة ورش وخيروني اذا عندي وحدة معينة. قلت ما لا قالوا طيب راح نختار اقرب وحدة لك. قالوا لي بعد ساعة كلمهم او مرهم واتفق معهم.

بعد حوالي ساعتين مريتهم. بصراحة لما شفتها قلت هذي معقول شكلها ورشة عادية. هذي شكلها ورشة وكالة. المهم، قالوا لي راح راح نعطيك موعد بكرة الصباح حتى نقيم السيارة (لو اتصلت كانوا اعطوني الموعد علي التلفون) جيتهم ثاني يوم وقيمها وبعد دقائق قال ليمتى يمديك تجيب السيارة؟ قلت له كم يبيلها تصليح قال لي 3 ايام. قلت له طيب اعطيني كم يوم ادبر لي سيارة. قال لي بالورشة في مكتب تاجير وراح يعطونك سيارة حتى تتصلح!!! قلت له وانا مو مصدق ببلاش؟ قال لي ايه هذا من قوانين الولاية!! قلت خلاص اجيبها لك يوم الاثنين (كان اليوم يوم الخميس). جيتهم الاثنين واعطيتهم السيارة ورحت مكتب التأجير واعطاني سيارة مؤقتة

الاربعاء اخر النهار كلموني وقالوا السيارة جاهزة اذا تبي تستلمها اليوم او بكرة الصباح. قلت لهم ثاني يوم الصباح. رحت وسلمت السيارة البديلة واستلمت السيارة وقالوا لي الشغل اللي سوينه عليه ضمان واذا لاحظت اي شي مو مضبوط تعال على طول.

ايش رايكم باللي صار لي. خلال يومين السيارة كانت جاهزة تدخل الورشة. لا رحت اجيب ورقة تصليح ولا تسعيرات ولا مطامرات من مكتب لمكتب او ساعات على التلفون تدور على حقك بس. اذا عندي شغلة او معاملة عند اي جهة ولما اتصل عليهم غالبا تلقى احد يرد عليك واذا ما احد رد تقدر تترك رسالة فيها تلفونك وخلال اليوم يتصلون عليك. ما انكر في بعض الملاحظات لكن بشكل عام اتمنى اننا نوصل بس لنص مستوى الخدمات اللي بدول ثانية زي أمريكا.