تاركين الرجال طايح بالدبس شهور ودهور، لامن شاف ولا من دري، وجايين تبون تشيلونه بيوم وليله . انتم جايين تبون تشلعون قلبه من معاليقه . ايييييه (لم يبت فيها) هم بيتوا فيها وقضوا .
الله يلوم اللي يلومه ، ليه ؟؟ مهبول هو ،، مجدع ثيابه ؟؟؟ يترك هالنعمه اللي ماوراها الا باب وقفل ،،،،،،، لو تصكونها بجدار عرضه 700 م ، كان جاب الحفارة الاسترالية «ستراتا
950» اللي استخدمت في منجم تشيلي ، ودخل على منجم الألماس حقه .
وعلى ما تقول دعاية احد المنتجات ( Once You POP, You Can't STOP)

هذا اللي نقوله من الصبح في مشاركاتنا ، التجار يكبون على الجمعية الفلوس بخياش ، مثل خياش كرزاي ،، والمثل يقول اطعم الفم تستحي العين .
عيب عند الرجال اذا عطوك خيشة فلوس ، روح تتصيد عليهم وتخاطب الجهات المعنية اذا خالفوا او استباحوا أموال المستهلكين بالباطل ، عييييييب .

طيب ، أجل وش تبون أنتم جايين تقرفون الرجال في حلاله وماله وشغله الخاص اللي يلهفه - قصدي يديره - من الألف الى الياء ؟؟.
هذي مهيب بنود تنظيم أساسي ،، هذي بنود ميزانية ضخمة متروكة في يد شخص واحد . لاصدار 9 بيانات ورق خلال 3 سنوات .

أعتقد خادم الحرمين الشريفين (حفظه الله) وسمو ولي عهده الأمين ، يوم يتبرعون لجمعية حماية المستهلك بـ 15 مليون ريال ، ما قالوا ان هذا التبرع لولد الحمد والتويم وباقي المجموعه لتحسين أوضاعهم الماليه . والصرف بدون حسيب ورقيب عشان بنود التنظيم الأساسي ( لم تنص ) ............ ليه طيب وهي (نصت) على غير كذا ؟

هذا التبرع كان للمستهلكين و لتفعيل مؤسسة لحمايتهم من جشع وغش التجار.

التجار اللي برضه جالسين تاخذون زيادة ملايين منهم عشان تحمونهم يا .... (طووووط).

ياخي كان الله بلاكم بالسرق والنهابة (الله لا يبلانا) . على الأقل اشتغلوا ، علشان تقابلون ربكم بذنب واحد بدل عدة ذنوب، قل ذمة وقل أمانة و إنعدام شغل . (ان الله يحب اذا عمل أحدكم عملاً أن يتقنه) وش اللي أتقنتوه أنتم ، انتم ما اتقيتوا ربكم في عملكم ولا أتقنتوا الا شئ واحد تعرفونه .

با ختصار الغلط مهوب غلط عصابة ادارة الجمعية ، الغلط كان من الأعضاء اللي رشحوهم واللي كان من المفترض يختارون ناس مشهود لهم بالصلاح والخير والأمانة وأن تتم تزكيتهم من من سبق له التعامل معهم ، هذي جمعية حيويه وهامة، ولا يضير التعب في البحث على من يديرها بالشكل الصحيح من ناس كفؤ .

الآن ما فيه الا حل واحد بيخليهم يوقفون مهاتراتهم السخيفه المفضوحه ، وهو أن على رئيس الجمعية ونائبة وأعضاء المجلس تقديم تقرير مالي مفصل بايرادات ومصروفات الجمعية من تم انشاؤها الى الآن وبمراجعه محاسب قانوني يتم تعيينه لهذه المهمه . ويتم تجميد حسابات الجمعيه ، واقعدوا يا أعضاء مجلس ادارة الجمعيه الين تنتهي فترتكم وانقلعوا ، وخلال هذه الفترة (اللي مجمدة فيها حسابات الجمعية) ممكن تشاكون وتفاصلون على راحتكم ، لاتدوخونا .