بارك الله بك يا الاحيدب يرحم امهاتنا وجداتنا ما كنا نعرف بزمنهن حليب المسعورين ولا زباديهم ...
نترك الاتكال عليهم ونعود للتصنيع المنزلي ...




هذي طريقة الحليب والزبادي واللبن واللبنه سبق كتبها واعيد نشرها الان

هلا بك اختي الخزاما ..
شخصيا لا اعمل الزبادي بالاله
والسبب مهوب الكلفة السبب اننا ماشاء الله عيله كبيرة والاله تكفي لنفر او اثنين ..
نعمل الزبادي بالطريقة التقليدية
وسبق ان كتبت الطريقة بعده ردودي وهاهي
طريقة الزبادي واللبنه واللبن والجبن
طريقة وحدة تطلع لك اللبنه واللبن والزبادي
اول شي حليب سواء بودرة او حليب بقر طازج
يسخن على النار وقبل ما يفور (يغلي )يفقل عليه وتخليه لين يدفى (لا يبرد ) وكل لترين حليب حط عليه علبه زبادي وحركه حتى يختلط مره وغطيه وحطه في الفرن واكيد ان الفرن مهوب شغال بس نبي مكان يساعد على الزبادى على تخمير الحليب وتخليه لمده 12 الى 10 ساعات
بعدها يكون عندك زبادي جاهز
اذا بغيت لبن تاخذ منه وتحط عليه شوي مويه ويخلط ويصير لبن
تبي لبنه تاخذ الزبادي المحضرة وتجيب (انا شارية غترة مخصوصه للبنة ) وتصب الزبادي فيها وتربط الغترة بقوة تصير زي الصرة
وتحطها بمشخاله وتحت المشخالة تحط يا بادية او زبدية بس لازم تكون عميقة ماابي الغترة توصل للقاع وتحطها في الثلاجة لمده يومين حتى تنزل الموية كلها من الغترة وتصيرعندك لبنه ..
المويه اللي تنزل تسمى شرش فيها فائدة لكن البعض مايفضلها يرميها ممكن تاخذها وتحل فيها الزبادي عشان ا للبن بدل الموية
........................................
الجبن بعد سهل مايبي له شي
تجيب الحليب الطازج (اذا ماعندكم بقرة فيه مزارع قريبة من الرياض تبيع حليب بقر طازجة توه محلوب او استخدم اي حليب طازج تلقاه في ثلاجات المحلات
خذ كم لتر لانه بعدين يقل حجهم
خذ مثلا 4 لتر وخلهم على النار وقبل ماتغلي بشوي حط عليه شوي ملح ون بغيت حبه سودا
ووقت غليه حط عليه اقل من فنجان شاهي خل وحركه شوي راح تلقى الحليب تغير لونه وصار مصفر وبدا يتكتل خله شوي وقفل عليه النار
جب قدر وفوقه مشخاله وحط على المشخاله غترة وصب الحليب المجبن عليه وضغط عليه عشان تنول الموية وحط فوقه اي شي ثقيل قدر فيه مويه ابريق فيه موية وحطه بالثلاجة يوم كامل
بعدها فك الغترة تلقى الجبن جاهز قطعه وحطه في علب وصب عليه من الموية عشان تحفظه وفوقه شوي زيت زيتون (يحفظه عن الهواء) يقعد حول 12 الى 14 يوم وطعمه مرةممتاز
عاد انتم بالخيار وقت اكله تخلونه سادة او بنعناع وزيت زيتون او بشطه وزيتون
--------------
ملاحظة اضيفها لك اختي الخزاما .. اللبن انا كتبه بطريقة سهله لكن فيه من يحب يطلع منه الزبده ويخضه وهذي برضو مهنا اسهل منها لليتعودها واللي عنده الاله خض اللبن .. بعد ما يتكون عندك الزبادي حطيه في فريزر مده 2 او 3 ساعات بس لا يجمد يعني نبيه يكون بارد جدا وبعدها يحط بالاله خض اللبن الكهربائية واحسن نوع يكون استيل حتى ما يطعم باللبن وخليه يخض الين تطلع الزبدة فوق اللبن وانت تكونين محظره بادية كبيرة شوي جدا باردة والافضل يحط بها ثلج تشيلين البزده من اللبن وتحطينها في البادية وتحطينها في الفريزر هذي هي الزبدة واذا بغيت تعملين سمنه نفس الطريقة اعمليها وكل ما عملتي لبن اجمعي الزبدة بالفريزر ولما تجمع عندك كمية كبيرة من الزبدة طلعيها من الفريزر خليها تفك شوي بس من الثلج وبعدها اكبسيها بمشخاله لتطلع المويه الزايده همن حطيها بقدر استيل وعلى نار هادية ومعها ملعقتين او 3 من طحين البر وخليها تطبخ زين مره
وكذا يصير عندك سمن 100%

https://www.mqataa.co/vb/showthread.p...D2%C8%C7%CF%ED