السلام عليكم ورحمة الله وبركاته
رمضان مبارك على الجميع
واللهم أجعنا من صوامه .. وقوامه ..

قمت باختيار المقاطعة الجماعية لما لها من صدى واسع في التأثير
لكن في نفسي أختار المقاطعة الفردية بتقولن ليش أقولكم ليش؟؟

الموضوع وما فيه انه يتم عمل موقع في الفيس بوك وتويتر واليوتيوب وووو
مقاطعة ... مقاطعة ... مقاطعة
وتشوف الناس هابة على المواضيع ومشاركات وبنسوي وبنسوي لكن كله كلام والكل يعرف الشيء هذا
ما قاطعو الا شركة المراعي علشان وقت الظهرية يبي الفقدة الصح بعد قدرن من الكبسة ولتر من اللبن

انا ما ابي امدح نفسي بخصوص المقاطعة لكن انا مستهلك
اقدر احدد الي احتاجه من السوق بالسعر المعقول ومن مصادر متعددة
فمثلاً قبل التسوق ليس في رمضان فقط إنما في جميع الأشهر أقوم بعمل جولة
على كلاً من (كارفور - لولو - العثيم - وأحياناً بندة)
ومقارنة اسعار ما أحتاجه بين الجميع يعني ترى الموضوع بسيط ورقة المقاضي مقسمة ثلاثة اقسام
كل صنف وجنبه السعر
يعني كأنك ماخذ لك ثلاث تسعيرات وخذ الي يناسبك انت اما المرور بيعطيك النص >>> فاضي ينكت بعد صحيح البعض بيقول
شغلة طويلة وعريضة انتقل من مكان الى مكان علشان فرق ريال ولا ريالين اقول هذا هو مفهوم قد يندرج تحت المقاطعة الفردية
ليه انت تبيع بثلاثة وغيرك في نفس الشارع يبيع بريالين ولا انت واجهة شرقية والثاني غربية
الصراحة في كتاب في الصحف وفي منتدى مقاطعة يدعون الى المقاطعة لكن لو رأو ما رأيته امس في العثيم الدمام
لساعدو الناس على التبذير نكاية بهم ياخي شي يقهر تقول ان الناس لا تاكل ولا تشرب الا في رمضان
يا خي شفت واحد عنده ثلاث عربيات وحدة صحون والثانية كاسات والثالثة رز

قلت له معليش يا خي ممكن تعتبرني ملقوف واذا تبي تجلدني عادي بس ماني قادر اسكت الصراحة الرجال ما قصر طالع في العربيات الثلاث وقال تفضل وش فيه
قلت له الحين انت طول الشهور الي طافت ما قد استقبلت لك ضيوف في البيت؟
قال الا.
قلت له واجد ولا شوي؟
قال واجد؟
قلت يعني تسوون شاي وقهوة وعصيرات وحلى وشغلات كذا؟
قال ايه واجد.
قلت له طيب وشهو له ذا كله دام ان في البيت بيالات وفناجيل وكاسات؟
قال كل ذا الكلام علشان ذي الطفسة.
قلت له كل ذا وطفسة اجل علبة الشربة والعصير والماجي هذي بالنسبة لك وشهي؟
ضحك وقال شكلك عزوبي وما تدري عن شي
قلت له الحمد لله متزوج لكن كل شي بحدود
قال الله يستر عليك حاسب حاسب جا دورك

يعني مثل هذا مع احترامي له ولغيره كيف توصل له فكرة ان التاجر جشع ويرفع السعر مستغلاً المواسم
ولا كيف تقنعه وتوصل له فكرة مقاطعة منتج معين قام المورد برفع السعر من راسه علماً بأن المستودعات ملييييييييانه ومن شهور

شركة العوجان (فيمتو) تدرون من متى الفيمتو في المستودعات؟؟؟ أكثر من 5 شهور ومن كثر الفيمتو الي جا بتريلات للشركة ما لقو له مكان يخزنونه فيه خلوه برى في الشمس في الشارع الين استأجر له مستودعات جديدة غير مستودعاته حتى حضر مسولين من الامانة والبلدية علشان الشوارع في مستودعات الخالدية تقفلت لاكثر من 5 ساعات من التريلات ولي كان عنده صيانة في عبد اللطيف جميل في الخالدية الدمام اكيد لحظ الموضوع

هذا مثله مثل الشيبان ما في غير الفلبيني مهندس ابداً أبداً

الله يصبرنا على مسئولي الوزارات المعنية بالموضوع وياليت نشوف انظمة جديدة مثل الامارات والكويت

والله يبلغنا وياكم رمضان وجميع المسلمين على خير ... وبكرا أحلى <<< متأثر بالانتخابات >>> يجيب الله خير