يعينكم ياأهل جدة على جدة يبغى لها نفض من أول وجديد من الكورنيش المليان من الوسخات والفيران الى المطار التحفة الى الشوراع المطبات وحفر بس هنا الرياض وجدة مشتركين فيها



تذكرت هذامقال
أنا ماني عارف سكان شرق الخط السريع كلهم الي في الأجواد والسامر والتوفيق والمنا ح يلاقوها من فين ولا من فين .. ح يلاقوها من الأرض من تحت راس عفن الصرف الصحي اللي جبلهم الهجاج والأمراض والا من الحفر والمطبات اللي هلكت سياراتهم وكل يوم والتاني وهما عند ورش السيارات والا من انقطاع الموية اللي جابتلهم الجنان وخلتهم كل يوم وهما سردادي مردادي ماسكين سرى في التحلية والا يلاقوها من الجو وكله من تحت راس هادي الحرايق اللي بتحصل في مرمى النفايات واللي جابتلهم مرض الربو ووجع القلوب والصدور والعيون من فين ابدأ ولا ايش اقول .. من 4 سنين وسكان شرق الخط السريع تعبوا وتعبت قلوبهم وانبحت اصواتهم وهما يطلبوا من امانة جدة انها تشوفلهم حل في حكاية مرمى النفايات ده .. هدا غير( بحيرة المسك ) اللي اقلقت حياتهم وكيانهم وخلتهم عايشين في رعب من 4 سنين وهما قاعدين يتبخروا بدخان الحرايق اللي بتصير في مرمى القمايم وقبل كده كمان اتبخروا بالحرايق الي صارت في حلقة الأغنام بعد مانقلوها وجات المصيبة الكبيرة يوم الجمعة اللي فاتت اللي خلت كل اهالي شرق الخط السريع يخرجوا من بيوتهم بعد ماشافوا الموت بعيونهم من كتر الحرايق والدخاخين اللي مرضتهم وسببت لهم ولأولادهم ضيق التنفس وجابتلهم الربو ووجعتلهم عيونهم فوق البيعة .. انا ماني عارف الين متى وامانة جدة ساكتة على المصيبة دي وماني عارف متى ح تتلحلح وتشوف حل لهادي الحكاية اللي طالت وطالت وطالت ومحنا عارفين متى ح تنتهي رغم التصريحات والإجتماعات والوعود اللي بنشوفها ونقراها كل بعد فترة وفترة . وانا ابغى اسأل امانة جدة فين مشروع سور مرمى النفايات الجديد اللي قالت عليه واللي بيقولوا انه بيكلف ( 30 مليون ريال ) مليون ينطح مليون وقالوا كمان انه بوابات هدا السور ح تكون الكترونيه وح يجيبوا مشرفين محترفين عشان يتعاملوا مع هادي النفايات بالأساليب المزبوطة لكن اللي باين قدام عيوننا انه مافي شيء من ده حاصل وكل الحكاية وعود في وعود وعلى بال ماتترستك وتزبط هادي الوعود اقول لسكان شرق الخط السريع الله يرحمكم برحمته ويرفع عنكم كل مصيبة قادر ياكريم سواء كانت هادي المصيبة من الجو او من الأرض .. وعيشوا كتييييير تشوفوا كتيييير .


بالبلدي الفصيح للكاتب ( فتحي حلواني )
جريدة عكاظ .