الاخ v2

اول شي انا ماقولتك شي والنقاط اللي ذكرتها انت لو تقراها بمعنى الكلام ( اتحدث فيها بشكل عام )
طيب نحسبها حسب معيشة اهل مكه <= اعترفت اني من مكه

وضعك انت ( شاب عايش مع اهله من غير زوجه وطفران طول الوقت )

الفطور : سندوتشين كبده مع بيبسي ( 5 ريال ) <= ولو تبي تغير فول وتميس صاروا ثلاثه ريال والا نفر تقاطيع برضه ماتعدى خمسه ريال ( حلو )
الغداء : كباب وببسي 12 ريال ( نص شوايه نفس السعر وبرضه نص برست البيك )
العشاء : زي الفطور ونفس السعر تقريبيا

المجموع: 5+12+5= 22 ريال في اليوم وفي الشهر 22×30 = 660 ريال.

كذا اكلت انت والسكن على قولتك مجاني في بيتكم.

1500 - 660 = 840 ريال
طيب ماعلينا في هالنقطه

اختلاف بيني وبينك في العادات والتقاليد ( ربما ) لكن كلامي يفيد الناس الغلابه اللي اهم شي عندهم ( اكل عيش يومهم والنوم مرتاحين من الديون ) واللي يبي يكرم ضيفه يسوي اللي يبيه هو حر حسب عاداته وتقاليده اكرم ضيوفك مثل ماتبي ولما يمشي الضيف لاتنسى ترجع الديون للناس وهم شي توصي الضيف يوم يروح بيته يقول عنك ( اكرم من حاتم ) جايز كلامه ينفعك ويكثروا ضيوفك اكثر

وليه من اول شروط قبولك للعمل هو تأهيلك عند البنوك حتى تاخذ منهم قرض
اقلك ترى القروض كلها ربا وتسحق بركه المال وبتغنيك يوم وتفقرك اعوام.

اول شي قوله تعالى: (وأنكحوا الأيامى منكم والصالحين من عبادكم وإمائكم إن يكونوا فقراء يغنهم الله من فضله والله واسع عليم) بعدين مين قالك ان الزواج ماينجح الا بالفلوس ياخي معظم الفقراء سعيدين وروابطهم الاسريه قويه اكثر حتى من الاغنياء وايش فيها لو هي تشتغل وتساعدك في المصروف مابقول تصرف عليك وانت في البيت بس انت تشتغل وهي تشتغل لو راتبك انت 1500 وهي 1500 مع بعضكم صرتوا 3000 ريال وهي شريكه حياتك مافيها شي والا برضه شغل المرأه عيب ؟؟؟؟

طيب شوف انا بعطيك قائمه وانت سوي مثل ما اقلك وبتعيش باذن الله سعيد.
دور بنت الحلال اللي اهلها يبون الستر لبنتهم وناس تكون صالحه وعلى دين وخلق ( اكثر اهل السعوديه كذا باذن الله ) وتزوج.

لنفرض ان زوجتك تشتغل وراتبها 1500 وانت راتبك 1500 ريال وتعال نحسبها.

1/ ايجار بيت 10000 ريال سنويا ( غرفتين وحمام وصاله ) في حاره شعبيه عاديه مو لازم تسكن فيلا ( 835 ريال بالشهر ).
2/ مقاضي الشهر 500 ريال اول الشهر و300 ريال ( عيش وببسي وجبن لباقي الشهر ) يعني المجموع 800 ريال.
3/ كهرباء وصرف صحي ومويه 150 ريال بالشهر.

المجموع: 1785 ريال بالشهر.
4/اشتري سياره ايفو بالتقسيط والا اي سياره صغيره ( قسطها الشهري مايتعدى 700 ريال ).
بقيلك من دخل اسرتكم المتواضع حول 500 ريال خليها للمصاريف الاخرى ولاتنسى شوي شوي راتبك بيزيد وراتب زوجتك بيزيد ان شاء الله والاوضاع تتحسن اهم شي البدايه والاقتصاد والاحساس بالمسئوليه ولاتجلس في بيتك اشتغل الحين ودور على وظيفه ثانيه لو لقيت افضل انتقل وكل ماتلاقي وظيفه افضل انتقل لكن نجلس في بيوتنا ونقول ياوظيفه يامميزه تعالي صدقني عمرها ماتجي

وشوف حكومة اليمن الشقيق على سبيل المثال رفعت عليهم البترول وارتفع كل شي معااه للحد اللي صار ايجار البيت لحاله اغلى من المرتب لكن برضهم الناس عايشين ولاتنسى الكويت كلها على بعضها مايوصلون مليون شخص وقطر والامارات ودخلهم يعادل دخل السعوديه ويزيد بعد علينا الحكومه هنا لما تبي تسوي خط بري يوصل مكه بالرياض بيكون طول الخط مش اقل من 1000 كيلو الكويت كلها ماتوصل ربع هالمسافه ( حجم البلد كبير والسكان كثيرين والحكومه مؤديه جهدها على قد ماتقدر اكيد في قصور في العمل واكيد في سلبيات لكن اللي مايشتغل مايخطىء )
الكويت لو اعطت كل مواطن عاطل 1000 ريال بتطلع عليهم 1000×100000 = مئه مليون
السعوديه لو اعطت كل واحد 1000 بتصير 1000 × 2000000 = اثنين مليار.

ولاتنسى ان هالخطوه بتنشىء جيل عاطل ويكفي الدلع والكسل اللي في شبابنا الحالي
خلي الشباب يذوق طعم العمل.
تعرف ان اقل راتب معتمد للسعودي هو 1500 ريال؟؟؟؟؟؟؟؟؟ بس ترى بعض الشباب يقبل باقل من كذا ومايعرف يطالب بحقه اللي وضعته الحكومه