الله يعينك اخوي

والله باين ان شركة التأمين اي كلام حسبي الله عليهم

ومدري ليه طلبوا شيخ المعارض وليه شيخ المعارض قدرها كذا

اذكر قبل 8 سنوات تقريبا
صدم الوالد على سيارته المهم الغلط على الطرف الثاني 100%
طبعاً الثاني جاب تأمينه على التعاونيه
المهم توليت انا المهمه بحكم تعب الوالد عن المراجعه والمشاوير

فمريت المرور وشاف السياره قال ذي قويه روح شيخ المعارض
شلت السياره على سطحه وتوكلنا على الله
طبعا شيخ المعارض شاف السياره ونزل تحتها وشاف كل القطع الميكانيكيه وكل شئ
سامها ب30 الف والسليمه منها تسوى 43 الف تقريبا
طبعا هذا كله بظرف ومختوم ومسكر
طلعت من عنده وانا الى الان ما ادري وش مكتوب لاننا قلنا الحمدلله على السلامه وهذا الاهم والعوض من الله

رحت للمرور فتح الاوراق وراني كل شئ زي ماكتبت لكم
قال الان المبلغ اللي تبي تاخذه هو الفرق بين سعرها نظيفه وبين سعرها الان
قلت يعني كم
قال 13 الف ويعطني ورقه للتأمين
ورحت للتأمين وطلبوا مني فقط وصف للحادث وتقرير المرور وبس حتى اني خليت السياره بدون تصليح احتياطاً بالرغم من ان المرور قالي عادي تقدر تصلحها اذا عندك امكانيه وحقك مضمون ان شاء الله

وفعلا اسبوعين وانا مستلم الشيك
علما بأن التصليح كلف 8000 ريال وقطع اصلي لكن فعلا السياره ماهي مثل الاول وانا اشوف ان الانسب هو دفع الفرق واللي يبي يبيع بهالقيمه يقدر يستفيد من الفرق ويعوضها بسياره ثانيه نظيفه
لكن الغريبه اذا فعلا شيخ المعارض كان هذا رده واذا انت تشوف انها ظلمها حسبي الله عليه

على فكره انا ذهبت لشيخ المعارض بالنسيم لقربه اولا من السكن وبعد صاحب السطحه يقول انه افضل من البقيه ويقدر بدون ظلم

حاول تواصل بشكواك والله يعينك لان شركات التأمين عندنا انواع اللعب وصاروا الناس يدورون الرخيص ومايفكرون بأنهم يغلطون على الناس والتأمين يتحملها لكنه بعد ماينشف ريق صاحب السياره اللي ماله ذنب بس عشان يوفرون فتلقاه يسترخص ويبهذل خصمه اللي ماله ذنب
واذا كانت السياره مؤجره وعليها تأمين سلمها للوكاله وهي تعرف كيف تاخذ حقها واشتر راحة بالك لو يصلحونها ب1000 ريال وياكلون 3000 ريال بس اهم شئ تشتري راحتك
والله يعينك

ملاحظه اخيره
ارفع شكوى لمدير المرور لان له سلطه عليهم فهو قادر على عدم الاعتراف بهم اذا كانت مشاكله كثيره ولا يخلص الناس
وبكذا تلقى الشركه راح تحرص على خدمة الناس عشان ماتتعطل مصالحها

وبالتوفيق يارب