يا عمري!
أجل تم إلزام السوق بالعمل بالتخفيض .. مع إلغاء الإعلان! وبس؟!
ما لكم حق يا وزير التجارة, الحقيقة عورتوهم بالحيل, وشركة اليورومارشيه عقب هالعقاب
شكلها تبي تطيح طيحة ما تقوم منها!!
يا شيخ روح بلا فـ شكلك إنتا وهوّا .. المفروض يا وزارة التجارة تقفلين السوبر ماركت لمدة شهر
وتغرمين الشركة ما لا يقل عن مليون ريال, لأن اللي يغش بسبعة أريل يغش بسبعين مليون ..
إلا بالله كم ربحت الشركة من هالحركة الحقيرة! والمستهلك مسكين كله ثقة يوقف عند المحاسب
وينتظر يقول له كم الحساب, ويطلع بطاقة الصراف ويدخل الرقم السري ويدفع الحساب,
أما الفاتورة فيرميها بالسلة, ولا يكلف نفسه عناء النظر فيها أو في شاشة الحسّابة حتى يطابق
الأسعار المعلنة والمخفية بمكينة المحاسبة ..
تذكرون العثيم كان يعلن عن تخفيضات على الرفوف بينما الأسعار المخزنة في الحسابة
ما فيها تخفيض .. كم مرة طحت فيهم همن يجي السوداني اللي يراقب ويعتذر ويقول فيه خلل
بإدخال المعلومات وإلا يبرر تبريرات دفاعية ..
مشكلتنا إن الدولة دجاجة صقعا قدام التجار مع احترامي للدجاجة طبعاً, وأصغر تاجر ممكن
يجيب خشم وزير التجارة بالأرض وإن كان في امك خير قل شي .. مادام التجار هم الأمراء
وأذناب الأمراء كيف تبون الأنظمة تطبّق!!
قال أيش قال: تم إلزام إدارة السوق، بالعمل في التخفيض وبمعدل خمس قوارير للفرد
مع إلغاء الإعلان ..!! يعني قبّصتهم يا وزير التجارة وقلت لهم لا تعوّدون لها وإلا ترى المرة الجاية
أبعطيكم كف!
فيه مثل بدوي قديم يقول (اذبحوا ذبّاح الكلب) لو الدولة تطبقه كان شفت التجار مثل الدجاج
أما شغل الخكاريا بالعقوبات فهذا ما يسوّي شي!!