أنا معك أخي لا تدف
تعانون أكثر من ( القيادة ) بالزحمة ، وهذه أكبر حسنة لمنعنا من قيادة السيارة لمستها بنفسي وأحمد ربي على أني ماني مضطرة أسوق في هالزحمات وفي طرقنا اللي شعارها كل من إيدو إله ، واللي فيها السواقين أشكال وألوان من كل دول العالم ومن كل الأعمار حتى البزران عندنا يسوقون ، ضغط نفسي رهيييب الله يكون بعون الجميع .
وأتعاطف معكم بسبب هذه المعاناة اللي ذكرتها،
وهذا لا يعني أننا معشر النساء ما نعاني، أو أننا أقل معاناة،
لأن مو كلنا نسولف وموسعين الصدر كلما نركب السيارة مع أحد ،

أصلا نسولف مع من .. واحنا في معظم الحالات نركب مع السواق اللي ما يجوز نكلمه لغير حاجة ؟
وحتى لو ركبنا مع أحد محارمنا نكون مشدودين من سواقته اللي لك عليها بالسرعة والمساقط على الناس،
لأن المساقط صار جزء من عاداتنا وتقاليدنا
وإن تطمنا على سواقته ، ما تطمنا من سواقة ومساقط السيارات اللي حولنا اللي نظل نتابعها برعب مثل القطط .

وعشان أعيشك (شوي) في الجو تخيل معي :
أنت راكب ورا في زحمة طريق خريص ،
في عز الظهر وانت راجع من دوام أو موعد والمكيف عطلان ..
الشمس حامسة قفاك حمس (من الزجاج الخلفي اللي يمثل عدسة مقعرة تكثف تركيز أشعة الشمس على بؤرة قفاك المسكين ) ..
السيارة تخضخض بك و ترقل بك رقل من كثر ما توقف كل شوي ، خصوصاً إذا معك سائق مطفوق ما عنده وسط يا ينطلق مرة يا يوقف فجأة،
إذا المرأة حامل أو تعاني من انزلاق غضروفي في الظهر أو رضوض في القفص الصدري بسبب إصابة سابقة مع سائق سابق ، عندها تكون المسألة أكثر خطورة .
إذا المرأة معها أطفالها فالمسألة مخيفة أكثر .

وإذا وراك بيت و أطفال ترعاهم يعتمد نظامهم وأكلهم وحياتهم كلها عليك بعد الله فطبيعي تكون دائماً مستعجل أكثر .

وطوال الوقت تشعر بالمسؤولية عن السيارة وما فيها مع هذا السائق اللي ما عمره مسك سيارة إالا بهالديرة رغم أنه مستقدم بمهنة سواق ،
و مشدودة أعصابك من هالطرق الخطرة وهالسواق الآسيوي اللي معك ، و عينك على السيارات اللي حولك توجه السواق الغشيم في أدق التفاصيل (أترك مسافة، لا تساقط على الناس، هدئ شوي، لف يمين ، رح طوالي، أثبت على مسارك ، خل هالمراهق يمر لا تقاشر هالبزران)
جملة اعتراضية // من يقول أن المرأة لا تقود السيارة عندنا؟؟ الصواب أنها هي تقود السيارة .. لكن من الخلف..


كن السالفة طلعت عن موضوع الأخ من الجبيل ،
عموماً تقديراً له سأتوقف عند هذا الحد،
وإذا عندك شيء أخي لا تدف اطلع لي برا
هذا إن شئت ، وأنا أرد عليك متى ما فضيت .
أقصد اطلع لي في قسم المناقشات العامة بموضوع مستقل
وياليت نربطه بمناقشة إمكانية مقاطعة السواقين المستقدمين من بعض الديار

في أمان الله