اختي العزيزة يمكن انتي ماتعرفين ايش معنى الضرايب, وانا مالومك دامك اعتبرتي المبالغ الرمزية اللي تدفعها للجوزات ولا الاحوال المدنية ضرايب. يعني هالمبلغ البسيط هذا راح يهد حيل الشعب ويفقرهم. اختى هل تعلمين ان في امريكا الضرايب تكون على كل شي. واعني كل شي يعني حتى علبة الببسي اللي نشتريها من البقالة عليها ضريبه وعلى اي سلعة غذائية او ادوات منزلية او ملابس او سيارات او جولات اي مبلغ يندفع بأي طريقة كانت يكون عليه ضريبه هذا غير ضريبة استخدام الطرق وحتى الجوائز المقدمة من المسابقات التلفزيونية يكون عليها ضريبة 50% يعني نصفها. اللحين هل فهمتي ايش اقصد ان ماعندنا ضرايب؟. ولاحظي اختى انا جالس اقارن حال المملكة بحال امريكا واللي هي ايضا دولة غنيه والله اعلم ايش حال الدول الاخرى الفقيرة مع الضرايب.

اما عن التعليم انا اتفق معك فا اغلب الدول يكون فيها التعليم من الابتدائي الى الثانوي ببلاش ولو اني اشك في الموضوع هذا لكن اذا اعتبرنا فعلا ان كل الدول يكون فيها التعليم من الابتدائي الى الثانوي ببلاش هل تتوقعين ايضا ان الكتب تعطى بشكل مجاني الى الطلاب مثل حال السعودية؟ لا والله ماتوقع.طيب اللحين نجي الى التعليم الجامعي ابيك تعرفين ان التعليم العالي في اغلب دول العالم يكون بفلوس حتى الجامعات الحكوميه تكون بفلوس. اما في السعوديه ودول الخليج يكون التعليم ببلاش ويصرف له رواتب مثل اللي حاصل لنا في السعوديه. في امريكا مثلا يدفع الطالب في السنه الجامعية( فصلين) معدل 25,000 الف دولار. هل احد منكم يقدر يدفع هذا المبلغ؟ انا ابيكم تروحون لأي جامعه حكومية وتسألونهم عن تكلفة الدراسه في الجامعه اللي احنا ندرسه ببلاش وناخذ عليه فلوس.وراح تحسون وقتها بالنعمه اللي عايشين فيها. هذا غير المشاريع المستقبلية اللي الان تنبني مثل المدن الاقتصادية وجامعة الملك عبدالله للعلوم والتقنية, كل هذا ولسه في تذمر.
وكل واحد يقدر ينظم نفسه على حسب الفلوس اللي عنده. اللي راتبه 6000 يرتب حياته على حسب دخله, واللي راتبه 10000 يرتب حياته ومصارفيه على حسب دخله. اما ان واحد راتبه 5000 ويبي يعيش مثل واحد راتبه 10000 هذا والله المشكلة منه ومن سوء التخطيط والافضل يراجع نفسه ويقلل من مصاريفه مو يلوم الدولة ليش ماتنزل الاسعار وكأن الدولة حاطه تجارة العالم في يدها وتقدر تتحكم فيها مثل ماتبي.

اتمنى ان وصلت الفكرة وتغيرت بعض مفاهيمكم الخاطئة.