هل..عانيت من مماطلة مكتب استقدام!

هل..حفرت الطريق رايح جاي تسأل عن شغالتك!

هل..ارتفع الضغط عندك ولعنت اللي عرفك على المكتب!

هل..اضطريت تخلي احد العيال ولا ام العيال في البيت واجلت ترم علشان الشغاله تأخرت!

كل هذا صار معي وكثيرين غيري مروا بنفس التجربه ...

المواطن دائما يفترض بعض الامور كمسلمات مثل

من اللي بيعطيني حقي!
جيزي من جيز غيري!
البلد سايبه!
ما عندك أحد!

واخر الليل يغني.... الصبر ما لي انا غير الصبر!




قدمت على مكتب استقدام بالمنطقه الشرقيه...في شهر ذو القعده ..ابي شغاله من سريلانكا (ادور الرخص طبعا)...اعطيت المكتب الفيزا جاهزه وطلب مبلغ 4500 ريال وما رضي ينزل ريال واحد للعبد الفقير

العقد

(طبعا العقد يفترض يكون موحد من وزارة العمل)

المهم في العقد: احد البنود ينص انه في حالة تاخر وصول المستقدم عن المده المحدده يلتزم الطرف الاول بدفع 30 ريال عن كل يوم تاخير مالم تكن اسباب التأخير مبرره بمستند مكتوب صادر عن جهه رسميه داخل المملكه او خارجها(الكلام جميل طبعا)

لكن في نهاية العقد اضيف بند بخط اليد ينص على (هذا الاتفاق لا يخضع لغرامة التأخير)
الموظف طلب اوقع تحت البند هذا بالذات اضافه الى التوقيع على العقد!!

قلت ماني موقع على العقد قال اذا مانت موقع مااقدر اخدمك..دور مكتب ثاني!
حاولت افهم الذكي ان العقد فيه بندين متناقضه...ما رضي يقول حنا ما ندفع غرامة تاخير وبعدين لا تخاف ما راح تتاخر..حنا غير!

...قلت الله يعين طيب المده قال 2-3 شهور بالكثير
قلت ممتاز اهم شي قبل المدارس .....الله يرحم والديك..قال اكيد ما فيه شك..روح البيت وانتظر اتصالنا وما يحتاج تشتغل معقب علينا..انتظر الاتصال بس



مر شهر.......شهرين.....3 شهور

ابتديت اتصل فيهم ...وانصدمت من الاستهتار بالمواطن..الموظف يقول ماندري ايش صار بشغالتك لكن بنرسل فاكس وننتظر الرد...(بعد 3 شهور تسأل يا...)

طبعا حاول يواسيني من باب الموت مع الجماعه رحمه قال مهو بس انت الوحيد كثير طالبين من سريلانكا وبعضهم مقدمين قبلك ولا جت شغالاتهم!!

و(كعربي)....وجريا على العاده في مثل هذي المواقف...تركت الزمام لحنجرتي..وبدأت اعزف باعلى صوتي سيمفونية الفنان مواطن بالباطن.....لكن اكتشفت في النهايه ان الموظف اكتفى بمقطع بسيط وقفل الخط!

اتصلت فيه مره ثانيه...حاولت اكمل المعزوفه ولكن مارضي.. وقته من ذهب طبعا..عنده معاملات ناس والاحساس بالامانه يناطح السحاب..قولوا ماشاء الله..تفاني واخلاص


مر الشهر الرابـــــــــــــــــــــــع


كلمت...وكلمت...والبحث مازال جاري عن المتهم.. قصدي الشغاله

رحت المكتب..قلت افرد عليهم كم عضله لعل وعسى...فردت كل العضلات ماهو كم عضله...ورجعت طبعا ما دروا عني

اليوم الثاني كلمت صاحب المكتب..الراس الكبيره(الذي علمهم السحر)
بكل ادب..شكيت وضعي..وطلبت غرامة تأخير
قال ...حنا ما نعطي غرامة تاخير...وانت وقعت على البند اللي ينص على ان العقد ما يخضع لغرامة تاخير
قلت..انت مخالف للنظام..والعقد الموحد ينص على الغرامه..
قال ماحد قالك توقع!! القانون لا يحمي المواطنين!!!



مر الشهر الخامس


قررت اني اجرب الاسلحه غير التقليديه..واقدم شكوى لوزير العمل...وويش انت من لحيه يا قصيبي...سبع ولا ضبع!!!

قدمت الشكوى على موقع الوزاره بالنت مع انه كان بالامكانيه اقدم في مكتب العمل بالشرقيه...
كل من درى عن هذي الشكوى...لمح على قصةالمواطن قصدي الحمار والربيع المعروفه...ووين عايش يابوالشباب

مالكم في الطويله..

المفاجأه...اتصل علي شخص من مكتب الوزير وقال لي شكواك تحولت لمكتب الشرقيه برقم وتاريخ....والله ماكنت مصدق اني باسمع صدى لصوتي الضعيف كمواطن يطلب حق


مريت على مكتب العمل واعطوني ورقه لاستدعاء خصمي صاحب المكتب...

صاحب المكتب يوم درى قال بعطيك 500 عن تاخير الشهرين قلت سبحان الله..القضيه ماهي الفلوس.....المسأله مبدا يا عديمه!!

حضرت الجلسه واخذت 1800 ريال عن تاخيرالشهرين(حق خاص)...وقدمت شكوى حق عام على المكتب لعدم التزامه بالعقد الموحد ....(اعتبر البند اللي ينص على ان العقد لا يخضع لغرامة التأخير بند ملغي لمخالفته للنظام الصادر من مكتب العمل والعمال وهي مخالفه صريحه للنظام تستوجب العقاب)

الله يكثر من امثالك يا القصيبي

وبعد اسبوعين من الجلسه وصلت بالسلامه الشغاله لكن بعد ايش....راح الترم الدراسي!



حبيت اشارك بالموضوع هذا لتعم الفائده ...والسلام عليكم