تعرفون العيد قرب ، والعشر الآواخر دخلت ، وحبيت أتسوق للعيد قبل الزحمة ، فيسر الله ورحت لمحلات المكسرات والحلويات اللي ذكرتها لكم ، وشريت المقسوم ، وكان ودي أعطي كل عضو في المنتدى حلاوة العيد ، بس مثلكم يعذر ، وإذا ما وصلت الحلاوة على الأقل أوصل لكم بعض الأموراللي تبينت لي :
1- وصف المحلات مثل ما ذكرت لكم ، وفيه وصف آخر يمكن يكون أسهل وهو إنك تمشي بشارع طارق بن زياد باتجاه الغرب وقبل ما تصل إلى الإشارة اللي يتقاطع فيها مع طريق الملك فهد فيه مسجد على اليمين وبعده مباشرة شارع إدخل الشارع هذا هو اللي فيه المحلات المذكورة.

2- بعض الردود من الإخوان مثل عزيزي الرئيس وأبو سديم ذكرت إنه الشارع المذكور ما له علاقة بشارع العطايف وذكروا إنه ما فيه إلا أربع محلات فقط ، وأنا هنا أؤكد إن الشارع هو شارع العطايف وقرات اللوحة عليه من باب التأكد ، لكن يشكل على بعض الناس لأنه يظن إن شارع العطايف هو فقط ما فيه الأدوات المكتبية وهذا غير صحيح لأن ما فيه المكتبات هو الجهة الشمالية منه ثم يفصل بينه وبين الجهة الجنوبية اللي فيها المكسرات والحلويات مباني أسواق التعمير الجديدة.
والمحلات اللي تبيع الحلويات والمكسرات ليست أربع محلات بل هي فوق العشر منها الجديد ومنها القديم.

3- هذي المحلات حالها حال غيرها أصابها الارتفاع لكنها أخف من غيرها وعلى سبيل المثال الكيلو من الكاجو والفستق ب33 ، وكان قبل ب24

4- عند التسوق ستجد الفرق في السعر بين المحلات لذا لا تشتري من أول محل بل خذ جوله ثم اختر السعر المناسب ، وأنا لقيت الفرق في سعر الكيلو يصل إلى 10 ريال ، وفي الكرتون يصل إلى 25 ريال.

5- تأكد من تاريخ الانتاج لأن الجديد يكون أفضل وغالب هذه المحلات عندها الجديد لكن التأكد أفضل.

6- بعض أنواع الحلويات يكون سعرها رخيص لكن جودتها رديئة ومليئة بالإصباغ الضارة ، لذا حاول اختيار النوع الجيد حتى ولو فرق السعر شوي.

وجدت من خلال البحث حلوى تركية جيدة الطعم وسعرها مناسب الكيلو منها ما بين 20إلى 30.
تقبل الله منكم الصيام والقيام وكل عام وأنتم بخير.