السلام عليكم ورحمة الله وبركاته.


اخواني واحبتي وبيتي الثاني اعضاء منتدى مقاطعه, لطالما قدمنا لكم من مواضيع ومشاركات في هذا المنتدى الرااااائع.
طلب هو:

احتاج كتابة صيغه للتقديم شكوا ضد شركة الاتصالات السعوديه لا بارك الله فيها حسبي الله عليهم.
وراح اذكر لكم مشكلتي حتى تسهل صيغة الخطاب. وهي كتالي:

الحد الاتماني هو 500 ريال, وفي بداية كل شهر مع استلام الراتب دائما اشيك على الرصيد واسدد يعني مو لازم يفصل الخط.
المهم قبل قرابة ثلاث شهور جيت اسدد وطلع المبلغ 700 ريال وكم خرده, قلت بعد اسبوع اسدد, جيت مره ثانيه ومقرر اسدد لكن تفاجئت ان المبلغ زاد إلى 19200 وعليها, اتصلت على الرقم المجاني (( مثل قلته )) وقدمت شكواي واعتراضي على مازاد عن الحد الاتماني, وقلت للموظف اللي مابيده حل ولا ربط مجرد واجه أولى لأمتصاص هجمات وسب وشتم العميل حتى يروق على حساب كرامة الموظف المسكين: مازاد عن الفاتوره الرسوم الشهريه ما اتحملها, قال انا قدمت اعتراضك و خلال 72 ساعه بيجيك الرد,,, مالكم بالطويله من ثلاث اشهر وانا كل شوي اراجعهم ويقولون راح يجيك الرد خلال 72 ساعه, انا ابي اعرف متى تخلص هالـ 72 ساعه.
((( اعتراااااضي على مازاد عن الحد الاتماني انا كا عميل مانيب مجبور اسدد والنظام في صفي ومن حقي اعترض عليه )))) وبكل بروده يقول لي الموظف خلاص راح نحولها لك اقساط. ((( حسبي الله عليكم من اكلين اموال الناس بغير حق ))).

رحت لاخوي الاصغر وشكيت له مشكلتي معهم كان يقول لي : (( انا فاتورتي جتني اكثر من 6000 الاف ريال وحده الائتماني بـ 300 ريال, والمصيبه بنفس الاسم كلنا )).
رحت لأخوي الكبير وشكيت له مشكلتي مع الشركه البايخه بقوووه, قالي: وانا بعد جتني الفاتوره اكثر من 9000 الالف ريال وحدي الائتماني 800 ريال, ويقول انا رحت قدمت شكوه لهيئة الاتصالات وتقنية المعلومات وقالوا راجعنا بعد 20 يوم ((( يعني يبون يكرهونك بالشكوا وتسدد وانت كاره ))), قلت له وبعدين,؟ قال: بالنص هذا (((( الام ما تضر ولدها )))) يعني وين تبي تشتكي وعلى مين.؟ قلت وش كان ردهم.؟ قال: يقابلك موظف ((( طبعا ذكر لي مواصفاته وهو يمكن معروف ))) يقول: حنا بينا بنود ومدري إيش ومن هالخرابيط.
وراني اخوي الفاتوره: من زود السخافه والنهب اول مره اشوف الرسائل اكثر من المكالمات: تكلفة الرسائل حوالي 7200 ريال والمكالمات بـ 1700 وشوي
وحاطين لك تفاصيل المكالمات لانها قليله جداً, طبعا وملفقينا بالرسايل لان مافيها تفاصيل.

أقسم بالله العظيم ما زليت عليكم ولا كذبت هذا ما صار معي ومع شركة الاتصالات الرقم المجاني ومع اخواني, حتى ولد عمي موظف في شركة الاتصالات قال مالك الا تشتكي عليهم وحتى شكواك ماراح تنفعك إذا رحت واشتكيت عند الهيئة ((( لكن يجب ان يتسلسل الشكوى حتى ديوان المظالم ما يقولك ليش ما رحت للهيئة لانها هي المرجع الاول )))).


بإذن الله راح اجيب لكم صوره من فاتورة اخوي ابو 9000 الالف ريال.