بسم الله الرحمن الرحيم
هذه المعاناة التي سأرويها لكم بالتفصيل ارجوا من الاخوة المشرفين والقراء السماح لي بالاطالة لكشف الاعيب وخدع شركات التاجير والتامين على المواطن المسكين
ياللي تدافعون عن شركات التامين ويا موظف شركة التامين الرجاء قراءة هذه المشاركة
البداية:
اخ لي اشترى هوندا سيفيك موديل 2006 من شركة تسمى شركة الامثل بنظام التأجير ومنتظم بالسداد ومن اروع مايكون
يوم وهو جاي من خط ينبع (السريع) الى مكة ويطلعله وانتم بكرامة كلب ابن كلب ويدخل تحت السيارة (حادث دهس يعني )
اخوي وقف على جنب والحمد لله على السلامة الركاب سليمين ولكن السيارة تشر مويات من الرديتر
المهم جا امن الطرق وكتب في تقريره (دهس حيوان سائب) وجات سطحة وحملنا السيارة بـ (200ريال) الى البيت
ركزو القصة ما زالت في البداية
فتحنا اوراق السيارة فوجدنا ان شركة الامثل متفقة مع التعاونية للتأمين على تأمين السيارة تأمين (شامل)
من ثاني يوم كلمنا شركة التعاونية على الموضوع فقالوا اذهبوا الى مرور مكة واعملوا تقرير بالحادث وجيبوا كامل الاوراق الى مكتب التعاونية ونحن نقوم بالباقي ( حتى الان كلام سليم)
ذهبنا الى المرور ومعانا تقرير امن الطرق فسألنا مهندس المرور المحترم بكل برود وين السيارة؟
قلناله السيارة عند البيت قال لازم اشوفها قلناله ليش ؟ هذا تقرير امن الطرق عندك قال لازم اشوفها واصر
ونزولا على رغبته الكريمة قمنا بتحميل السيارة على سطحة من البيت الى المرور بـ(150 ريال)
ركزوا معي يا شباب توه بدأ الاكشن
المهم بعد المعاينة سوينا تقرير المرور وورقة الاصلاح وما يتبعها من مرمطة في اسياب ادارة المرور وبعد 60 توقيع و 50 ختم اكتملت الاوراق ولله الحمد قلنا هاه وين الحين قالوا السيارة على الوكالة مباشرة والاوراق على مكتب التعاونية للتامين (قلنا جميل جدا)
رحنا على مكتب التعاونية للتأمين ومعنا الاوراق مكتملة ونتفاجأ بالسؤال السخيف اللي يرفع الضغط وين السيارة؟ قلنا راحت الوكالة؟ قال ليش ما جبتوها عندنا؟ قلنا ليش؟ قال عشان نصورها؟ قلنا وحنا ايش عرفنا ؟ المهم وبعد حب الخشوم وافق الموظف انه يتنازل ويروح للوكالة ويلتقط الصورة التذكارية للسيارة ومتى؟ بعد اربعة ايام قلنا ما يخالف
(صلو عالنبي يا شباب والصبر زين)
ذهبنا بعد ذلك للوكالة عشان ندخل السيارة ونعرف باقي الاجراءات واستقبلونا اهل الوكالة بالترحاب وقالوا يحتاج نكشف على السيارة ونشوف كم تكلف ومن ثم نرفع التكاليف للتعاونية لاعتماد التصليح وبعدين نبدا نصلح قلنا حلو
وتقعد السيارة في الوكالة اسبوعين وتطلع تكلفة التصليح 24000 ريال
(وهذا كلب اجل كيف لو.........؟) المهم رفعت التكاليف للتعاونية وبعد اسبوعين اخرين جاء الرد برفض اصلاح السيارة لان التكلفة مبالغ فيها طيب والعمل قالو خذ السيارة وقدرها برة عند ورشتين بما لا يزيد عن 10000 ريال وذلك بعد اخذ موافقة من شركة الامثل بالتنازل عن اصلاح السيارة في الوكالة
(شهر كامل عشان يقولوا لنا السيارة ما نقدر نصلحها اجل لو بيصلحونها كم يقعدوا؟؟؟
)
المهم جبنا الموافقه من شركة الاعفن عفوا قصدي الامثل وقلنا للوكالة هيا هاتوا السيارة قالوا لا هوا دخول الحمام زي خروجه قلنا ها وش عندكم قالو رسوم تقدير (300 ريال) ونعطيكم عليها فاتورة تاخذوها من التعاونيه بعدين
قلنا ما يخالف وجبنا سطحة بـ ( 200 ريال ) عشان تشيل السيارة
المهم راعي السطحة ابو رفق قال ( صديق فين ورقة تقدير) قلنا ماعندنا قال ( انا مايقدر يشيل سيارة لازم ورقة من مرور) قلنا اجل خلي السيارة وبعد ما نجيب الورقة
(والله يا جماعة تعبت اكمل لكم القصة بعدين اعذروني على الاطالة )
يتبع.............................................. .................................................. ................
21-06-2009, 11:50 AM
العرض المتطور
