الموضوع الأول عن تثبيت موظفي البنود .. و هذا متعلق بموظفي القطاع الخاص إللي طالعين من المولد بلا حمص في كل المكرمات السابقة و الحالية...

*******************************

يرضيك كده يا وزير العمل

فتحي حلواني


أنا عارف إنه حبيبنا عادل فقيه قلبه كبير وأنا دايما أحاول أناوشه بمقالاتي سواء أيام ما كان أمين لمدينة جدة أو دحين لما صار وزير للعمل وأنا عارف حيقول بينه وبين نفسه ولد الحلواني ده ورايا ورايا ما يبغى يفكني من شره، على العموم يا سيدي هية كلمتين وابغاك تحط بالك منها وانت عاد ما يحتاج عارف وعالم ومطلع بخبايا القطاع الخاص.. المهم ما أبغى اطول عليك وخليك معايا وانت حتعرف الهرجه من طقطق لباب وزارة العمل.. دحين أنا ابغى اعرف انت لك ساعه زمان يا سيدي وانت قاعد تنعبش في الجرايد القديمه ايش تبغى منها؟ إنا لله من دي الحرمه ابعدي من قدامي دحين وخليني ادور على اللي ابغاه من كومة الجرايد دي براحتي.. طيب قولي ايش بتدور؟ وعلى ايه وخليني اساعدك يا سيدي؟ .. يا ستي جالس با أدور على خبر قديم كنت أبغى اعلق عليه ساعتها لكن نسيت مع دوشة العمل وجا وقته دحين.. طيب يا سيدي خليني اساعدك يمكن نلاقي الجريدة اللي تبغاها؟ اهو الجرايد قدامك دوري على مهلك.. هادي يا سيدي؟ لا مو هادي.. طيب هادي؟ لا مو هادي.. ايوه أهو لقيتها اووف يا ساتر كيف الجريده مغبره.. شكلو تاريخها قديم ياسيدي؟ ايوه كانت بتاريخ 19/11/1431.. وايش بيقول الخبر اللي خلاك تنعبش في الجرايد دي كلها، بيقول يا ستي (انسحاب 115 ألف سعودي من سوق العمل)، اكيد يا سيدي في اسباب والا ما كان هدا العدد من الموظفين السعوديين تركوا اعمالهم.. صح كلامك الاسباب كتيره واولها واهمها زيادة ساعات العمل يعني مو معقوله وحرام كده لما يكون الدوام من 8 الى 4 ودول العالم كلها دوامهم للساعه 2.30 ويمسكوا الباب عشان كده لازم يشوفوا حل لهدا اللي اسمه (دمااااار) مو دوام يعني بالبلدي كده القطاع الخاص ياخدك لحم ويرميك عظم حتى زيادات سنويه ما عندهم يعني تقعد على راتبك ده سنوات طويله واذا رحت اشتكيتهم في مكتب العمل حتجلس سنوات طويله عشان تاخد حقك.. حتى لما جوو وغيروا النظام اللي له دحين 6 سنوات ما يغيروا فيه كتير حتى انهم تركوا ساعات العمل زي ماهيه لانه الحكاية كانت كلها نسخ ولصق لنظام العمل.. هدا غير الرواتب اللي بيستلموها اللي بيشتغلوا في القطاع الخاص رواتب متدنية توصل لـ 1500 ريال او 1800 ريال ايش تسوي الرواتب دي في الزمن ده يعني المفروض على الاقل يكون الراتب 4000 اقل شي هدا بالنسبة للموظفين اللي عندهم شهاده ثانوية هدا غير انه الحال بينطبق على اللي معاه شهاده جامعية لكنه مظلوم في الراتب تلاقي راتبه 6 آلاف في الشهر وتجي تشوف اخينا ابو كرفته واللي مستقدمينه بمهنة سباك او حلاق تلاقي راتبه 30.000 ريال غير البونص اللي انت خابروا يا معالي الوزير رغم انه الاتنين عندهم نفس الشهاده الجامعية وعندهم شهادات وخبرات طيب ليه كده؟ مو ولد البلد اولى.. والا دايما خيرنا لغيرنا.. هدا غير انه بعض اصحاب الكرفتات المتعنطزين يشوف نفسه على ولد البلد خاصة لو كان مسؤول عن التوظيف او مستشار في بعض المؤسسات اللي اسمها من بره الله الله ومن جوه يعلم الله لانه بيفضل حبايبه واقاربه ويوظفهم ولا يوظف ولد البلد وهادي مشكلة كبيرة بيعاني منها كتيير من اللي محتاجين وظايف او حتى اللي محتاجين انهم يترقوا لانه في بعض المؤسسات والشركات بتفضل المدير الاجنبي على المدير السعودي لحاجة في نفس يعقوب وانت ادرى وابخص يا معالي الوزير هدا غير العقوبات القاسية اللي موجوده في النظام لانه مو معقوله الموظف يكرف 30 سنه بعدين يصدر قرار بفسخ عقده من غير مكافأة ولا تعويض ولا حتى انذار عشان يقدر يدبر نفسه ويشوف له وظيفه تانية تقدر تقولي فين العداله من دي الحكاية؟ هدا غير انه في نص صريح في النظام بيقول بالفم المليان يمنح وزير العمل صلاحية اقتراح حد ادنى للاجور لكن ده النص بلينا مويته وشربناه لانه ما حصل شي منه لانه ما في رقابه على الشركات والمؤسسات وكلها بتلعب على كيفها في ظلم الموظفين في ناحية الرواتب.. هدا غير انه نظام العمل ما يجبر الشركة او المؤسسة على زيادة اجر الموظف ولو واحد موظف سعودي فكر انه يقدم شكوى يطلب فيها زيادة في الراتب يجيه الرد من مكتب العمل روووح بلط البحر عشان كده بقول دبرها يا معالي الوزير وخلي شبابنا ياكلوا ويعيشوا عيشه كريمه في بلدهم وانت قدها وقدود، وعيشوا كتييير تشوفوا كتيييير

مثل حجازي: اللي يده في المويه مو زي اللي يده في النار.

http://www.okaz.com.sa/new/Issues/20...0304403773.htm