بصراحة ولا احد يزعل

احنا نستاهل

ايه نستاهل

اقسم بالله اني حطيت ولدي في مدرسة في حي الغدير ب 11 الف ريال و 2500 ريال باص و 2000 رسوم تسجيل

واخرتها العيال يعلمون ولدي الشذوذ
ايه شذوذ

اغلب عيال النعمة مو متربين وشاذين اخلاقيا وفكريا ودينيا

والمعلمين والمشرفين ما يقدرون يعاقبون الطالب لسببين:
ان الاب ممكن يصير له واسطة وله نفوذ
او خايفين يسحب ملف عياله ثم يخسرون

اعرف زميل لي ساكن في شقة حاط عياله الثلاثة في مدارس فوق 30 الف ريال !!
يقول استثمار

اي استثمار واي بطيخ

بكرة يرمي عليك ملفه العلاقي ويقول لك وظفني

اغلب اللي يحطون عيالهم بمدارس اهلية غالية اما فشخرة والا مغفلين مصدقين ان الوظايف بالشهادة !!

عاد شفهم في جمعات الحريم أو جمعات الرجال وهم يتكلمون بفخر عن عيالهم

اللي يشوفهم يقول عيالهم اخترعوا والا ابتكروا

وشفهم وهم يمدحون المدرسة !! اللي يشوفهم يقول وكالة الطاقة الذرية على غفلة

الغريب ما تفرق المدرسة الاهلية عن اي مدرسة حكومية الا غرفة منتسوري وهي غرفة التعليم بواسطة اللعب بالاشكال

يعني ادفع دم قلبي علشان ولدي يتعلم بواسطة الاشكال !! من زين هالاشكال

تصدقون ان حطيته في مدرسة اقرب ب 3500 للترم + 1100 ريال باص + 1000 رسوم تسجيل

يعني وفرت نص المبلغ

اللي قريب منه مدرسة حكومية يحط ولده فيها والا يحطه بارخص مدرسة اهلية قريبة وجيب مدرس خصوصي لولدك بالفرق على الاقل المدرس راح يشغل ولدك علشان ما يشغلك هو

احنا لو قاطعنا المدارس الغالية راح ترخص ومن ثم ترخص المدارس الرخيصة