عندكم كفرات

فتحي حلواني

فتو.. يا بنت يافتو .. نعم يا أمي .. يا بنتي سامعة صوت حمير في الشارع روحي شوفي من الطاقة إيش الحكاية؟ ألحقي يا أمي الحقي أبويا جايب معاه اتنين حمير !! اتنين حمير إيش يبغى فيهم ده ؟ وشوية أسمع أبو فتو داخل البيت.. دحين أنت جايب معاك الحمير دولا ليش اقدر افهم ؟ عشان ياستي نبغى نرجع نعيش زي زمان اول لما كانت حياتنا على الحمير والجمال ومنها اذكرك بالبيزان اللي كان في حارة العيدروس ايام ما كانت الحمير توصل الموية لأهالي جدة واذكرك كمان بايام العيد اللي كانت بتصير في البرحة اللي قدام مدارس الفلاح ايام ما كنا نركب الحمير ونلفلف في ازقة جدة عشان كده انا استاجرت هادول الحمير عشان يساعدونا في الروحه والجية واحسن بكتيير من زحمة السيارات ونرتاح كمان من الحفر والمطبات اللي جابت لسيارتنا وجع المفاصل والكساح وابشرك انه في واحد من الحمير موديل 2011 لأنه عليه حنة يعني لونه حريمي.. وليه يا سيدي التعب ده كله واشبها السياره؟ السيارة ياستي يبغالها كفرات جديدة والكفرات الجديدة رفعوا سعرها تجار الكفرات وقطع الغيار .. طيب ياسيدي ليش ما تشتري كفرات جديده وترتاح من الدوشة ووجع الدماغ إللي إنت فيه؟ أشتري كفرات جديدة مرة وحده والله إنتي عندك كلام زي الهرج قال اشتري كفرات جديده قال تجار الكفرات وقطع الغيار ركبو موجة رفع الاسعار زي بقية التجار (وكل مين إيدو إلو) ورفعوا سعر الكفرات وقطع الغيار 20% والمصيبة انه الكفرات وقطع الغيار مو اصلية وكلها مغشوشة .. وزي منتي عارفة هادول التجار عذرهم جاهز يقولك إنه سبب ارتفاع اسعار الكفرات جا بسبب الارتفاع العالمي في الاسعار وهوه لا ارتفاع عالمي ولاشي بس هادول التجار وهوامير العقارات اللي ما يخافوا الله في عباد الله من يوم ما سمعوا عن القرارات الملكية وصرف الراتبين الا وفتحوا فمهم يبغوا ياكلوا الاخضر واليابس ويمصوا دم الغلابا لانه ما في نظام وقانون يحمي هدا المواطن الغلبان من جشع وطمع هادول التجار وطالما اسعار الكفرات وقطع الغيار ارتفعت كمان سوق الخضار برضوا حيرتفع لانه اليورو والدولار بيدخلوا في زراعة البطاطس والبامية لانه حيكون ارتفاعها عالمي لأنه البامية إللي عندنا شعرها أشقر وعيونها زرق والخيار إللي عندنا شعرو ناعم وعيونه عسليه والمواد الغذائيه والاستهلاكية إللي عندنا فيها دلع وغنج عشان كدا الاسعار صارت مرتفعه، ووزاره التجاره والمراقبين اللي فيها مو فاضين انهم يتحركوا ويشوفوا حل لهدا التلاعب والتدليس اللي جالس يصير في السوق لكنها جاهزه للاعذار وجاهزه بأي طريقة فيها حمايه للتاجر لكن المستهلك الغلبان ما له قيمه عندها .. المفروض إنه وزاره التجارة تحط إعلانات في الجرايد وفي كل المراكز التجارية بكل المنتجات سواء كانت غذائية أو استهلاكيه بأسعارها الحقيقيه عشان محد يقدر يلعب بالاسعار إذا كان قلبها على المستهلك الغلبان لكن للأسف ووزارة التجاره بتقول إنها موجوده وهيه لا موجوده ولا شي شايفه التجار يلعبو في السوق وساكته عليهم، طيب يا سيدي فين حماية المستهلك؟ هههههه ضحكتييييني الحبايب إللي في حماية المستهلك مو فاضيين.. لهم اكتر من اربعة شهور وهما جالسين يضاربوا على المنصب والكرسي الدوار وكل يوم وهما من محكمة لمحكمة وكل واحد منهم يبغى الكرسي .. يا ريتهم اهتمو بالمستهلك زي ماهتمو بالكرسي الدوار إللي بسبب الوجاهه إللي فيه ارتفعت الأسعار وراحو الغلابا فطيس .. يا وزارة التجارة عندك مرسوم ملكي صدر قبل 30 سنه بخصوص نظام الغش التجاري بيقول بالفم المليان أي تاجر يرفع الأسعار يعاقب باغلاق المحل أو السجن من اسبوع إلى تسعين يوم مع غرامة من عشرة الاف الى مائة الف ريال على كل من غش أو حاول انه يغش في أي من المتطلبات او السلع اللي يحتاجها الانسان ولكي كامل الحق في التشهير بالمخالف اللي صدر بحقه قرار نهائي بالادانة باي وسيلة من وسائل الاعلان وان يكون النشر على حساب المحكوم عليه عشان كده بقول يا وزارة التجارة عليكي بالتشهير بكل التجار المتلاعبين بالاسعار (كائنا من كان) عشان يعرفوا ان الله حق وعيشوا كتييييير تشوفوا كتييييير.

مثل حجازي: حمارتك العرجه تغنيك عن سؤال اللئيم

http://www.okaz.com.sa/new/Issues/20...0527422476.htm