ياخى قلبي وجعنى لأنى لى قصه قريبه من قصتك ,, بطول عليك بالكلام فركز زين و أفهمنى :
- إن كنت ناويها محاكم فشف لك أقرب مستشفى و أتعاقد معهم على الضغط و الإكتأب و القولون الله يبعدها عنك و عن الجميع لأنها جايتك جايتك و أسأل الناس اللى رايح تشوفهم هناك و خذ سواليفهم تعرف إنه حقك و صحتك ضايعه مع مقبرة المعاملات ( المحكمه ) و أكيد حتلقى هنا بالمنتدى ضحايا واجد لها و من كل الحالات ,, يعنى خلى الحل هذا آخر شئ لأجل صحتك و عمرك
- من كلامك شايف إن المبلغ حيكون كبير ,, على كده مالك الا محامى كبير و بصراحه أرشح لك " المحامى
صلاح الحجيلان شريك المحامى خالد أبو راشد " اللى أترافع عن قضية أبو كاب لو تذكرها " مكتبهم بجده شارع الملك عبدالله ( اللى فيه أغلى مسبح بالعالم
) و أظن له مكتب بالرياض بس ما أعرفه تحتاج تسأل , شف معاه و أظنه رايح يجب لك حقك بإذن الله .. ماقدر أتكلم أكثر بس لو تسأل عن الشخص هذا حتعرف وزنه وقوة إسمه بالمحاكم " إيه حتى المحاكم تتعامل بالأسماء و تعمل لها حساب "
- أو حول الموضوع لقضيه رأى عام ,, يعنى ترتب ورقك و تخلى صحفي له وزنه بجريده مثل عكاظ أو الوطن تتكلم عن موضوعك و بناء على الوثائق و الضحايا الموضوع ياخذ شكل قضية قريبة من قضايا النصب التجارى ( زي قضية الدريبي ) بس هاذي طريق فرعى يعنى ناتجه ماهي بذيك القوه و بالذات لو كانو خصومك من اللى يلعبو من تحت الطاوله , عموماً انا ذكرتها لك و إنت و تصرفك ولا تعتمد عليها
- حقوق إنسان و خرابيط ...
وخر عنهاااااا و الله ماراح تاخذ شئ منها الا ضياع وقت
- ناس تضرب على صدرها .. هاذولا بالذات وخر عنهم ,, صيادين فى مصايب الناس مالهم ذمه و يبيعو ذمتهم للى يدفع أكثر ... و سلامة الناس اللى تعرف ربها و تخافه
- بكل الأحوال ورقك أدلتك و لسانك و هو ساكت أقوى سلاح تستخدمه ,, انتبه لا يطلع لك نصاب يقولك عندى و انا أجيب لك و أعمل لك ووو و تعطيه سرك ,, تراهم وااجد بالحيل و بيننا و ما يحتاج لهم شرح بس لا تثق فيهم نهاااااائيا حتى و إن كنت تعرفهم أو تسمع عنهم من قبل ما تولد
- إذا كتب ربي عليك دخول المقبره ( المحكمه ) لا تنسى دعاء الفرج و أضغط على نفسك لو طبيت بقاضي سمج تراهم يلعبو فى حسبتك صح و يمكن يسألك أسئله لها علاقه بموزبيق .. خذ السؤال عادى و رد عليه بذكاء و حاول إنك تكون صامت و مركز لكل موقف و حركه و كلمه تصير و ماهى عيب لو سجلتها بورقه "
اتفرج على المحامين اللى حواليك هناك , تحس نفسك بحصة تعبير " ... مقصدي من كذا انك تجمع أكبر قدر من الأدله علشان لين تقفل معك و ترفع برقيه لأبونا أبو الشعب أبو متعب الله يحميه من كل سوء تكون الصورة واضحه لسموه و القرار اللى حياخذه أياً كان حيكون مستمد من الوقائع اللى أتقالت بالورق و بالفم ولا يهونو الشهود و أحب افهمك بأن لعبة المحكمه دايم هيا " كثير من الكلام قليل من الحقائق " فأنتبه للنقطه هاذى و ركز عليها لأنها رايح توفر عليك سنين من المراجعات "
إيه سنين و انا أخوك مادام مالك ظهر "
- لا تفرط بأى ورقه - معامله .. إلخ أى شئ حتى لو كانت مسجله على علبة سجاير ,, اليوم ببلاش و بكره بفلوس ولو تقدر خذ منها نسخ و احفظ الأصل بمكان ما يعرفه أحد
- و آخر نصيحه لك من أخ لا تعرفه ولا يعرفك ,, لا تحلف بالله حتى و إن كنت صادق و إن كنت راعى سب و لعن فأعرف بإنها أم المصايب ولازم لازم تبطلها ولا بتجيبك ورا زياده و إن كانت أخلاقك تجاريه فحاول تغيرها و لو بالغصب تراها و انا أخوك تقفل الأبواب المفتوحه و إن كان معك الريال لا تبخل به على أقرب مسكين تجى عينك عليه ,, و الله العظيم رايح تلقى خير إن ما كان من قضيتك فمن مكان ثاني ( الله سبحانه مقسم الأرزاق و اتعلم من النمله و الطير تفهم أكثر ) و هذا كلام مجرب ماهى نسخ و لصق و الكلام هذا لك ولكل الأخوان معنا هنا و اسأل الله العلي القدير بهذا الوقت إنه يفرج همك و يرد حقك كامل مكمل ما ينقصه شئ و آسف على الإطاله
31-12-2009, 05:45 AM
العرض المتطور
